మన కరెన్సీ నోటు మీద గాంధీ బొమ్మ ఉన్నా మహాత్మా గాంధీ బస్సెక్కితే టిక్కెట్ కొట్టాలా వద్దా అని సందేహించే సమాజం కాదు మనది. ఈ మాట ఎందుకనాల్సి వచ్చిందంటే ఎప్పటి విలువలు అప్పటివే. తెలుగు సినిమా కార్మికుల కోసం చిత్రపురి కాలనీ పేరుతో హైదరాబాద్ లో వెలిగిపోతుందంటే అది ప్రభాకర్ రెడ్డి అనే వ్యక్తి చలువే. కానీ ఆయన జయంతిని అక్కడ కూడా జరుపుతున్నారా లేదా అన్నది అనుమానమే. కనీసం విగ్రహాలు పెట్టి అభిమానం చాటుకునే రోజులు కూడా కావివి. నటుడు, రచయిత ఎం. ప్రభాకర్ రెడ్డి అక్టోబరు 8న జన్మించారు. దాదాపు 500 చిత్రాల్లో నటించిన ఆయన సంపాదించిన ఆస్తి విలువ కూడా 500 కోట్ల వరకూ ఉంటుందంటారు. రీల్ హీరోలు చాలామందే ఉంటారు.. అందులో రియల్ హీరోలు కొందరే. ఆ కొందరిలో ప్రభాకర రెడ్డి కూడా ఒకరు.
ఆయన పూర్తి పేరు మందాడి ప్రభాకర్ రెడ్డి. ఊరు నల్గొండ జిల్లాలోని తుంగతుర్తి. డాక్టర్ అయినా యాక్టర్ గా మారిన వ్యక్తి ఈయన. ఎంబీబీఎస్ చదువుకుని 1961లో ‘చివరికి మిగిలేది’ అనే సినిమాతో నటన రంగంలో అడుగుపెట్టారు. ఎక్కువగా విలన్ పాత్రలు పోషించారు. ఒకప్పుడు విలన్ అంటే సత్యనారాయణ, ప్రభాకర్ రెడ్డి పేర్లే వినిపించేవి. అలా తనదైన మార్కు సాధించారు. జయప్రద మూవీస్ స్థాపించి కొన్ని సినిమాలు కూడా తీశారు. అనేక సినిమాలకు కథలు అందించారు. అందరితో కలుపుగోలుగా ఉంటూ తన మంచితనంతో, దాన గుణంతో సినిమా రంగంలో అంచెలంచెలుగా ఎదిగారాయన.
హీరోలు చేయలేని పనిని ఓ నటుడిగా ఆయన చేయడం గొప్ప విషయం. అదే చిత్రపురి కోసం ప్రభుత్వం నుంచి స్థలాన్ని సాధించడం. ఎక్కడైనా కొద్దిగా స్థలం ఉంటే స్టూడియోలు కట్టేద్దామన్న ఆలోచన ఉన్న సినిమా పెద్దమనుషులున్న ఈ సమాజంలో ప్రభాకర్ రెడ్డి సినిమా కార్మికుల కోసం ఆలోచించారు. అప్పటి ముఖ్యమంత్రి కోట్ల విజయ భాస్కరరెడ్డిని కలిసి దాదాపు 67 ఎకరాల భూమిని సాధించారు. ప్రభాకర్ రెడ్డి చేసిన ఈ కృషికి కొందరు సినిమా పెద్దలు కూడా సహకరించారు. చిత్ర పరిశ్రమ హైదరాబాద్ కు తరలి వచ్చినపుడు అందరితోపాటు ప్రభాకర రెడ్డి కూడా గచ్చిబౌలి సమీపంలో పది ఎకరాలు కొన్నారు.
ఆ స్థలాన్ని సినీ కార్మికుల కోసం దానం ఇచ్చేశారు. సినిమా కార్మికుల సంక్షేమం కోసం ఆంధ్ర ప్రదేశ్ సినీ కార్మికుల సమాఖ్యను ఏర్పాటుచేసి దానికి అధ్యక్షుడిగా పనిచేశారు. ఆ పక్కనే ప్రభుత్వం నుంచి మరికొంత భూమిని సాధించి చిత్రపురి కాలనీ ఏర్పాటుకు ఆయన నాంది పలికారు. ప్రభాకర్ రెడ్డి దానంగా ఇచ్చిన స్థలం విలువ రూ. 500 కోట్లు ఉంటుందంటారు. ఆ కాలనీకి ప్రభాకర్ రెడ్డి పేరునే పెట్టారు. 62 ఏళ్ల వయసులో 1997లో ఆయన కన్నుమూశారు. ఆయన ఎంతో చేసి సాధిస్తే దాని కోసం కొట్టుకునే వాళ్లు ఇప్పుడు ఎక్కువయ్యారు.
