వెంకీతో చేయాలనే తన కల నిజమైందంటున్న బ్యూటీ

ఈ మధ్య కాలంలో తెలుగు తెరకి పరిచయమైనవారిలో ‘నవీన రెడ్డి’ పేరు ఎక్కువగా వినిపిస్తోంది. ‘F2’ సినిమా ద్వారా తెలుగు తెరకి ఈ అమ్మాయి పరిచయమైంది. ఆ సినిమాలో బ్రహ్మాజీని ఫ్రస్టేషన్ కి గురిచేసే భార్య పాత్రలో ఆమె కొన్ని నిమిషాలే మెరిసినా, లుక్ పరంగా ప్రేక్షకులను ఆకట్టుకుంది. ఆ తరువాత నవీన రెడ్డి ‘వెంకీమామ’..’హిట్’ సినిమాల్లోను నటించింది. ‘హిట్’ మూవీలో బాల్యం నుంచే పగ – ప్రతీకారాలు పెంచుకుని, ఒక యువతిని హత్య చేసే పాత్రలో ఆమె నటన ఆకట్టుకుంటుంది. తనకి నచ్చిన పాత్రలను అంగీకరిస్తూ, నిదానమే ప్రధానమన్నట్టుగా కెరియర్ ను కొనసాగిస్తున్న ఈ అమ్మాయి తాజా ఇంటర్వ్యూలో తన గురించిన విశేషాలను ఆవిష్కరించింది.

*”మాది వ్యవసాయ సంబంధమైన కుటుంబం .. చిన్నప్పటి నుంచి సినిమాలపై ఆసక్తి ఉండేది. చిరంజీవిగారి సినిమాలంటే నాకు ఎంతో ఇష్టం. నటిగా నా కెరియర్ ను మొదలుపెడదామనే నిర్ణయాన్ని ఇంట్లో చెప్పినప్పుడు వాళ్లు ఒప్పుకోలేదు. అయినా పట్టువీడకుండా అదే పనిగా నేను ప్రయత్నిస్తూనే వచ్చాను .. అలా రెండేళ్లు గడిచిపోయాయి. ఇక నా బాధను భరించలేక అంగీకరించారు. నేను ఎంచుకుంటున్న పాత్రలను చూసి, ఇప్పుడు బాగానే ప్రోత్సహిస్తున్నారు. F2′ సినిమాలో తొలిసారిగా అవకాశం వచ్చింది. చిన్న పాత్రే అయినా టెన్షన్ పడుతూనే చేశాను. ఆ పాత్ర నాకు మంచి గుర్తింపును తెచ్చిపెట్టింది.

* ‘హిట్’ సినిమాలో నెగెటివ్ షేడ్స్ కలిగిన పాత్రను చేశాను. కెరియర్ తొలినాళ్లలోనే అలాంటి పాత్ర పడటం నా అదృష్టంగా భావిస్తున్నాను. చాలామంది ఆర్టిస్టులకు ఒక గుర్తింపు వచ్చిన తరువాత అలాంటి పాత్రలు వస్తాయి. ఆరంభంలోనే అలాంటి పాత్ర నాకు దక్కడం నిజంగా గొప్ప విషయం. నేను నెగెటివ్ షేడ్స్ కలిగిన పాత్రలను కూడా బాగా చేయగలననే విషయం ఈ సినిమా వల్లనే నాకు అర్థమైంది. ‘వెంకీమామ’ సినిమాలో నేను వెంకటేశ్ సిస్టర్ పాత్ర చేశాను. చేసింది చిన్న పాత్రే అయినా, బాగా చేశానంటూ సురేశ్ బాబుగారు మెచ్చుకోవడం నాకు ఎంతో ఆనందాన్ని కలిగించింది. రానా ‘విరాటపర్వం’ సినిమాలోను చేసేదానినే .. కానీ నేను వెళ్లి డైరెక్టర్ గారిని కలిసే సరికి ఆలస్యమైపోయింది.

*వెంకటేశ్ గారితో కలిసి నటించాలని ఉండేది .. ‘వెంకీమామ’ సినిమాతో ఆ కల నిజమైంది. ప్రస్తుతం బోయపాటి దర్శకత్వంలో రూపొందుతున్న బాలకృష్ణ సినిమాలోను నటిస్తున్నాను. ఇక చిరంజీవిగారితో .. నాగార్జునగారితో కలిసి నటించే అవకాశం ఎప్పుడు వస్తుందో చూడాలి. కంటెంట్ నచ్చితే హీరోయిన్ గా చేయడానికి నేను సిద్ధంగానే ఉన్నాను .. ఆల్రెడీ హీరోయిన్ గా రెండు సినిమాలు చేస్తున్నాను కూడా. స్క్రిప్ట్ ను బట్టి గ్లామరస్ గా కనిపించడానికి అంగీకరిస్తాను. ఇండస్ట్రీలో అందరితోను కలుపుగోలుగా ఉండాలి .. కానీ నేను అంత త్వరగా కలవలేను. ఒకసారి స్నేహితులయ్యాక మాత్రం చనువుగానే వుంటాను. నన్ను నేను మార్చుకుంటూ .. మరిన్ని అవకాశాలను అందుకోవాలనే ఆలోచనలో ఉన్నాను. ‘ఉప్పెన’లోను ఒక మంచి పాత్ర చేశాను .. ఆ సినిమా విడుదల కోసం ఎదురుచూస్తున్నాను” అని చెప్పుకొచ్చింది.