అక్కినేని నాగచైతన్య ప్రస్తుతం శేఖర్ కమ్ముల దర్శకత్వంలో ‘లవ్ స్టోరీ’ మూవీలో నటిస్తోన్న సంగతి తెలిసిందే. సాయిపల్లవి కథానాయికగా నటిస్తోన్న ఈ సినిమా చిత్రీకరణ దాదాపు పూర్తికావచ్చింది. దీని తర్వాత చైతూ.. ‘థాంక్యూ’ అనే మరో సినిమానూ మొదలుపెట్టాడు. విక్రమ్ కె కుమార్ దర్శకత్వంలో ఈ సినిమా రూపొందుతోంది. ఇక ఈ రెండు మూవీస్ కాకుండా చై.. మరో క్రేజీ మూవీకి గ్రీన్ సిగ్నల్ ఇచ్చినట్టు తెలుస్తోంది. దీనికి దర్శకుడు మరోవరో కాదు.. యాక్షన్ కింగ్ అర్జున్.
ఎయిటీస్ లో తెలుగు ప్రేక్షకుల్ని తన యాక్షన్ మూవీస్ తో అలరించిన అర్జున్ సర్జా.. ఆతర్వాత తమిళంలోనూ ఫుల్ బిజీఅయిపోయాడు. కన్నడిగుడు అయినప్పటికీ తెలుగు, తమిళ సినిమాలతో బాగా పాపులరైన అర్జున్.. ఆ తర్వాత దర్శకుడిగానూ సత్తా చాటుకున్నాడు. ‘సేవగన్’ తమిళ సినిమాతో అర్జున్ దర్శకుడిగా మారాడు. ఆ సినిమా సూపర్ హిట్టైంది. ఆ తర్వాత ‘జైహిద్, శివకాశి, ఏళుమలై, జైహింద్ 2, వాయుపుత్ర’, లాంటి సినిమాల్ని తెరకెక్కించాడు అర్జున్. ఆయన ఇప్పటివరకూ దాదాపు 12 సినిమాలకు దర్శకత్వం వహించడం విశేషం.
త్వరలోనే అర్జున్.. నాగచైతన్యతో ఓ వెరైటీ యాక్షన్ మూవీని తెరకెక్కించనున్నాడట. ఆ మేరకు ఇద్దరి మధ్యా కథపరమైన చర్చలు జరుగుతున్నాయట. ఈ వార్త కనుక నిజమైతే.. నాగచైతన్య కెరీర్ లోనే ఇదొక భారీ యాక్షన్ మూవీ కానుందట. యాక్షన్ సినిమాల్లో నటించడమే కాకుండా.. వాటిని భారీ గా తెరకెక్కించడంలో కింగ్ అయిన అర్జున్.. చైతూ తో ఏ తరహా సినిమా తీస్తాడో చూడాలి.
