ఏపీ సీఎం చంద్రబాబు పాలనపై ప్రముఖ జాతీయ మీడియా ది ప్రింట్ అదిరిపోయే ఆర్టికల్ రాసింది. ఒకప్పుడు ఐటీ, కంప్యూటర్లు, పెద్ద కంపెనీలంటూ టెక్నాలజీ ఇమేజ్ ఉన్న బాబు.. ఇప్పుడు రూటు మార్చి నేరుగా పల్లెటూళ్లు, వ్యవసాయంపై పూర్తి ఫోకస్ పెట్టారని ది ప్రింట్ చెప్పింది. డిజిటల్ స్క్రీన్‌ల నుంచి నేరుగా పొలాలకు నీళ్లే టార్గెట్‌గా ఆయన సాగిస్తున్న ప్రయాణాన్ని ఈ ఆర్టికల్‌లో వివరించారు.
గతంలో టెక్నాలజీ గురించి ఎక్కువగా ఆలోచించడం వల్ల 2004, 2014 ఎన్నికల్లో గ్రామీణ ప్రాంతాల్లో ఎదురైన దెబ్బలను ఈసారి చంద్రబాబు పక్కాగా కవర్ చేసుకుంటున్నారని ది ప్రింట్ విశ్లేషించింది. ప్రతిపక్షాలు తనపై వేస్తున్న రైతు వ్యతిరేకి ముద్రను చెరిపేయడానికి ఆయన సాగునీటి ప్రాజెక్ట్‌లను కార్పొరేట్ ప్రాజెక్ట్‌లా డీల్ చేస్తున్నారని తెలిపింది. రూ.35,000 కోట్లతో పోలవరం పనులను పరుగులు పెట్టించడం, వెలిగొండ, హంద్రీ-నీవా ప్రాజెక్ట్‌లతో కరువు జిల్లాలకు నీళ్లు తెచ్చి శాశ్వత పరిష్కారం చూపుతుండటాన్ని జాతీయ మీడియా బాగా మెచ్చుకుంది.
ఇక వ్యవసాయంలో AI, డ్రోన్లు, రియల్ టైమ్ వాటర్ ఆడిటింగ్ వంటి లేటెస్ట్ టెక్నాలజీని వాడి అగ్రికల్చర్‌ను లాభాలు వచ్చేలా మారుస్తున్నారని కథనంలో రాసుకొచ్చారు. అన్నదాత సుఖీభవ వంటి పథకాలు, రైతుల కోసం చేస్తున్న పనులతో ఊర్లలోని ఓటర్లను గట్టిగా కలుపుకుపోతున్నారని, కూటమిలోని బీజేపీ, జనసేన పార్టీలు కూడా ఈ గ్రౌండ్ వర్క్‌తో బాగా బలపడుతున్నాయని విశ్లేషకులు చెబుతున్నారు.
ఈ మార్పు కేవలం వచ్చే ఎన్నికల కోసమే కాదట! రాబోయే 2029 ఎలక్షన్ల నాటికి వైసీపీకి ఉన్న గ్రామీణ ఓటు బ్యాంకును గట్టిగా దెబ్బకొట్టేలా చంద్రబాబు ఆడుతున్న లాంగ్ గేమ్ అని ‘ది ప్రింట్’ తేల్చిచెప్పింది. ఒకనాడు కంప్యూటర్ స్క్రీన్‌లు బాబుకు పేరు తెస్తే..ఇప్పుడు పారే కాలువలు, పచ్చని పొలాలే ఆయన పొలిటికల్ లెగసీని డిసైడ్ చేస్తాయని జాతీయ మీడియా కొనియాడడం ఇప్పుడు రాజకీయ వర్గాల్లో హాట్ టాపిక్ అయింది!
ఇక, ఈ ఆర్టికల్‌ను తన ఎక్స్‌ వేదికగా షేర్ చేసిన సీఎం చంద్రబాబు..ఇంట్రెస్టింగ్ ట్వీట్ చేశారు. మనం చేసే పనుల వల్ల ప్రజల రోజూవారీ జీవితాలు మారాలన్నదే తన ఆశయమన్నారు చంద్రబాబు. 90వ దశకంలో రాష్ట్రంలో టెక్నాలజీని పెంచి, కొత్త అవకాశాలు సృష్టించడమే లక్ష్యంగా ఉండేదని, కానీ ఇప్పుడు దశాబ్దాలుగా నీళ్ల కోసం ఎదురుచూస్తున్న చివరి భూముల రైతులకు కూడా నీరు అందించడమే తన ప్రాధాన్యత అని చంద్రబాబు చెప్పుకొచ్చారు. అది కంప్యూటర్ పిక్సెల్స్ అయినా, పొలాలకు వెళ్లే వాటర్ పైప్స్ అయినా.. తన ఉద్దేశం ఒక్కటేనన్నారు చంద్రబాబు. సమస్యలను పరిష్కరించడం, రైతుల జీవితాలను నిలబెట్టడం, ఏపీలోని ప్రతీ కుటుంబానికి మంచి భవిష్యత్తును ఇవ్వడం తన లక్ష్యమన్నారు.!
