వయసు పెరుగుతున్న కొద్దీ మనకు ఆరోగ్య సమస్యలు తలెత్తుతూ ఉంటాయి. అయితే చిన్న చిన్న చిట్కాలతో, మనం రోజూ వాడే సామాగ్రితో వాటిని కంట్రోల్ చేసుకోవచ్చు.అటువంటి వాటిలో వంట నూనె ఒకటిగా చెప్పుకోవచ్చు. మన శరీరంలో ఏర్పడే ఎన్నో సమస్యలను వంట నూనెతో కూడా కంట్రోల్ చేసుకోవడంతో పాటు తగ్గించుకోవచ్చని వైద్యులు సూచిస్తున్నారు.
అయితే వంట నూనెలు అన్నీ మంచివి కావు.కానీ కొన్ని మాత్రం మన ఆరోగ్యానికి మంచి చేస్తాయి. సహజంగా మన దేశంలో వంట కోసం ఎన్నో నూనెలను ఉపయోగిస్తుంటారు.పూర్వం రోజువారీ వంటల్లో సంప్రదాయ నెయ్యినే వాడేవారు. కాలం మారుతున్న కొద్దీ ఇప్పుడు అనేక వంట నూనెలు వాడుకలోకి వచ్చేశాయి. ముఖ్యంగా వేరుశనగ, పొద్దుతిరుగుడు, రైస్ బ్రాన్, కోకోనట్ ఇలా చాలా రకాల నూనెలు మన రోజువారీ వాడకంలో ఉన్నాయి. మరి ఆరోగ్యానికి సాయపడే వంట నూనె ఏదన్న? సందేహం రావచ్చు. దీనికి నిపుణుల వివరణ ఈ విధంగా ఉంది..
కనోలా ఆయిల్ (ఆవ నూనె) :
కనోలా సీడ్స్ అంటే ఆవ గింజల నుంచి తీసే నూనె ఇది. ఇది మన గుండె ఆరోగ్యానికి చాలా మేలు చేస్తుందట. ఇందులో శాచురేటెడ్ ఫ్యాట్స్ చాలా తక్కువగా ఉంటాయి. ఈ నూనె మనలో ప్రవహించే రక్తంలో కొలెస్ట్రాల్ తక్కువగా ఉండేందుకు బాగా సాయపడుతుంది.అంతేకాదు.. ఇందులో గుండెకు మేలు చేసే ఒమెగా ఫ్యాటీ 3 ఫ్యాటీ యాసిడ్ అయిన ఆల్ఫా లినోలెనిక్ యాసిడ్ కూడా ఉంటుంది. ఇది రక్తంలో కొలెస్ట్రాల్, ఇన్ ఫ్లమ్మేషన్ తగ్గించడానికి సాయపడుతుంది. రక్తపోటును కూడా అదుపులో ఉంచుతుందట.
మస్టర్డ్ ఆయిల్ :
ఆవ నూనెను మన పూర్వీకులు సైతం ఉపయోగించారట. వాస్తవానికి మిగితా నూనెలతో పోలిస్తే ఆవనూనె వాసన కొంత భిన్నంగా ఉంటుంది. అందుకే ఎక్కువ మంది దీన్ని ఉపయోగించరు. కానీ, ఈ నూనె ఆరోగ్య దాయనిగా చెబుతుంటారు.ఈ మస్టర్డ్ ఆయిల్ లో మోనో అన్ శాచురేటెడ్ ఫ్యాటీ యాసిడ్స్ ఉంటాయి. దీనిని వాడడం వల్ల మనం మన రక్తంలో ఏర్పడే చెడు కొలెస్ట్రాల్ తగ్గించుకోవచ్చు. అంతేకాదు దీని వల్ల రక్తప్రసరణ కూడా సజావుగా సాగుతుంది. ఇందులో శాచురేటెడ్ ఫ్యాట్స్ తక్కువగానూ , ఒమెగా 3, ఒమెగా 6 ఫ్యాటీ యాసిడ్స్ మోటాడుకు తగ్గట్టుగానూ ఉంటాయి.
ఆలివ్ ఆయిల్ :
ఆలివ్ ఆయిల్, ఎక్స్ ట్రా వర్జిన్ ఆలివ్ ఆయిల్ మనకు తెలియని అనేకమైన ప్రయోజనాలు కలిగి ఉన్న వంట నూనె.మన గుండె ఆరోగ్యానికి ఈ నూనెతో మంచి జరుగుతుందని ఎన్నో అధ్యయనాలు తేల్చాయి. మనం ఇళ్ళల్లో చేసుకునే వేపుడు కూరలకు ఈ నూనె చాలా అనుకూలంగా ఉంటుంది.ఈ నూనెలో విటమిన్ ఈ, పాలీఫెనాల్స్, యాంటీ ఆక్సిడెంట్లు కలిగి ఉంటాయి.ఇవి కేన్సర్, గుండె జబ్బుల నుంచి మనకి రక్షణనిస్తాయి.దీని వాడకం మనలోని మలబద్దకాన్ని నివారించడమే కాకుండా.. పేగుల ఆరోగ్యానికి ఎంతగానో మేలు చేస్తుంది.
పొద్దుతిరుగుడు నూనె :
సన్ ఫ్లవర్ ఆయిల్.. ఇది కూడా వేపుళ్లకు అనుకూలంగా ఉండే నూనె.ఈ నూనెతో చేసే పూరిలు కానీ, గారెలు కానీ చాలా రుచికరంగా ఉండడమే కాదు మన ఆరోగ్యానికి మంచివి. అయితే అధిక స్మోక్ పాయింట్ ఈ నూనె సొంతంగా చెప్పుకోవచ్చు. కాగా, నూనెను మళ్లీ మళ్లీ కాచి వాడకూడదు. అలా చేయడం వల్ల ఆ నూనెలోని నాణ్యత కోల్పోయి, ట్రాన్స్ ఫ్యాట్స్ విడుదల అవుతాయి.
సిసేమ్ ఆయిల్ (నువ్వుల నూనె)
ఆవ నూనె మాదిరిగానే ఇదీ పూర్వం నుంచి వాడుకలో ఉన్న నూనె ఇది. ముఖ్యంగా నువ్వుల నూనెకు వేలాది సంవత్సరాల చరిత్ర ఉంది. మోనో, పాలీ అన్ శాచురేటెడ్ ఫ్యాట్స్ కు ఇది నిలయం.అవి గుండె జబ్బుల రిస్క్ ను, రక్తపోటును తగ్గిస్తాయి.
ఫ్లాక్స్ సీడ్ :
ఇందులో ఉండే పొటాషియం, ఒమెగా 3, 6 ఫ్యాటీ యాసిడ్స్ వల్ల అనేక ఉపయోగాలున్నాయి. ప్రధానంగా ఇందులో ఉండే ఒమెగా 3 ఆరోగ్యానికి చాలా మంచిది. జీర్ణాశయం ఆరోగ్యానికి, కొలెస్ట్రాల్ తగ్గించేందుకు ఈ నూనె ఒక పరిష్కారంగా పరిగణిస్తారు.
వేరు శనగ నూనె :
ఎక్కువ మంది రోజువారీ వంటలలో ఉపయోగించే వంట నూనెల్లో ఇది కూడా ఒకటిగా చెప్పుకోవచ్చు. ఇందులో మోనో అన్ శాచురేటెడ్, విటమిన్ ఈ, పాలీ అనుశాచురేటెడ్ ఫ్యాట్స్ ఉంటాయి. కనుక దీనివల్ల గుండెకు మేలు అని చెబుతుంటారు.
వీటిల్లో వేరుశనగ నూనె, పొద్దుతిరుగుడు నూనెల మంచి, చెడుపై భిన్నాభిప్రాయాలు ఉన్నాయి. ఒమెగా ఫ్యాటీ 3 యాసిడ్స్ గుండెకు మంచి చేస్తాయి. అదే ఒమెగా ఫ్యాటీ 6 యాసిడ్స్ ఎక్కువగా తీసుకుంటే రక్తపోటు, రక్తంలో క్లాట్స్ ఏర్పడి హార్ట్ ఎటాక్, స్ట్రోక్ రిస్క్ పెరుగుతుందని కొందరు వాదిస్తుంటారు. మరి కొందరు అయితే ఒమెగా 6 ప్రభావాన్ని ఒమెగా 3 ఫ్యాటీ యాసిడ్స్ న్యూట్రలైజ్ చేస్తాయన్ని నిపుణులు చెబుతారు.
