ఏపీ మంత్రి ఉషశ్రీ చరణ్ కి ఊహించని షాక్ తగిలింది. ఆమె భూకబ్జా చేశారంటూ పిటిషన్ దాఖలు కాగా..హై కోర్టు దానిని విచారణకు స్వీకరించింది.కళ్యాణదుర్గంలో 100 ఎకరాల చెరువును మంత్రి ఉషశ్రీ చరణ్ కబ్జా చేసి, ప్లాట్లుగా మార్చి అమ్ముకునేందుకు యత్నిస్తున్నారనే ఆరోపణలు వెల్లువెత్తుతుండగా, కోర్టు విచారణకు అంగీకరించడం ఆమెకు ఊహించని పరిణామంగా మారింది.
వాస్తవానికి గత కొంత కాలంగా మంత్రి ఉషశ్రీ చరణ్ పై వస్తున్న భూకబ్జా ఆరోపణలు కలకలం రేపుతున్నాయి. కళ్యాణదుర్గంలో 100 ఎకరాల చెరువును ఆమె కబ్జా చేశారంటూ నియోజకవర్గ టీడీపీ ఇన్ఛార్జి ఉమామహేశ్వర నాయుడు హైకోర్టులో పిటిషన్ దాఖలు చేశారు. చెరువును పూడ్చి, ప్లాట్లుగా మార్చి, అమ్ముకునేందుకు యత్నిస్తున్నారని పిటిషన్ లో ఆయన పేర్కొన్నారు.
దీనికి సంబంధించి అధికారులకు ఫిర్యాదు చేసినా, వారి నుంచి ఎలాంటి స్పందన రాలేదని పిటిషనర్ కోర్టుకు తెలిపారు. సర్వే నంబర్ 329లో ఉన్న వంద ఎకరాల సుబేదార్ భూమిని ఉషశ్రీ కబ్జా చేశారని పేర్కొన్న ఉమామహేశ్వర నాయుడు.. పిటిషన్ లో రెవెన్యూ శాఖ ప్రిన్సిపల్ సెక్రటరీ, జిల్లా కలెక్టర్, ఆర్డీవోలను ప్రతివాదులుగా చేర్చారు.కాగా, ఈ పిటిషన్ ను ఏపీ హైకోర్టు విచారణకు స్వీకరించింది. రెండు వారాల్లో కౌంటర్ దాఖలు చేయాలని రాష్ట్ర ప్రభుత్వాన్ని ఆదేశించింది.
