ప్రస్తుతానికి పాయింట్ల పట్టికలో ఢిల్లీ రెండో స్థానంలోనూ, కోల్కతా మూడో స్థానంలోనూ ఉన్నాయి. ఈ సీజన్లో తొలి రెండు మ్యాచ్ల్లోనూ విజయాలు సాధించిన ఢిల్లీ టీమ్ మంగళవారం జరిగిన మ్యాచ్లో హైదరాబాద్ చేతిలో ఓటమి పాలైంది. ఇక, ఓటమితో సీజన్ను ప్రారంభించిన కోల్కతా ఆ తర్వాత అద్భుతంగా పుంజుకుని రెండు వరుస విజయాలు సాధించింది. ఈ రెండు టీమ్లు ఈ రోజు జరుగబోయే రెండో మ్యాచ్లో తలపడుతున్నాయి. ఈ రెండు టీమ్ల మధ్య ఈ రోజు సాయంత్రం 7:30 గంటలకు షార్జా క్రికెట్ స్టేడియంలో మ్యాచ్ జరుగబోతోంది. ఈ మ్యాచ్లో గెలుపొందిన టీమ్ పాయింట్ల పట్టికలో నెంబర్ వన్ స్థానానికి చేరుకుంటుంది.
ఢిల్లీ క్యాపిటల్స్ బలాలు
ఈ సీజన్ను ఢిల్లీ టీమ్ అద్భుతంగా ప్రారంభించింది. పంజాబ్, చెన్నైలపై విజయాలు సాధించింది. స్టార్ ప్లేయర్స్ లేకపోయినా సమష్టిగా రాణిస్తూ విజయాలు అందుకుంటోంది. మెరుగైన రన్ రేట్ సాధిస్తూ పాయింట్ల పట్టికలో రెండో స్థానంలో నిలిచింది. గాయం కారణంగా గత రెండు మ్యాచ్లకు దూరమైన స్టార్ స్పిన్నర్ అశ్విన్ ఈ మ్యాచ్కు అందుబాటులో ఉండబోతున్నట్టు వార్తలు వస్తున్నాయి. ఇక, శ్రేయస్, ధవన్, పృథ్వీ షా, స్టోయినిస్ సమష్టి ప్రదర్శనతో ఢిల్లీ విజయాలు అందుకుంటోంది. అలాగే బౌలర్లు కూడా మంచి లైన్ అండ్ లెంగ్త్తో బౌలింగ్ చేస్తున్నారు.
బలహీనతలు
మూడో మ్యాచ్లో హైదరాబాద్ చేతిలో ఓడిపోవడం ఢిల్లీకి కాస్త నిరాశ కలిగించింది. హైదరాబాద్తో మ్యాచ్లో ఢిల్లీ బౌలర్లు మెరుగైన ప్రదర్శనే చేసినప్పటికీ బ్యాట్స్మెన్ తీవ్రంగా నిరాశపరిచారు. 163 పరుగుల లక్ష్యాన్ని ఛేదించలేకపోయారు. 34 పరుగులు చేసిన ధవనే టాప్ స్కోరర్ అంటే పరిస్థితి అర్థం చేసుకోవచ్చు. స్పిన్ ఆడడంలో ఢిల్లీ బ్యాట్స్మెన్ తడబాటు మరోసారి బయటపడింది. ఇక, ఈ రోజు మ్యాచ్ జరుగబోతున్న షార్జా స్టేడియంలో ఢిల్లీకిదే తొలి మ్యాచ్. పిచ్ మీద అవగాహన లేకపోవడం కూడా టీమ్కు కాస్త ఇబ్బంది కలిగిస్తుందని చెప్పవచ్చు.
ఢిల్లీ టీమ్ (అంచనా)
పృథ్వీ షా, శిఖర్ ధవన్, శ్రేయస్ అయ్యర్, రిషబ్ పంత్, హెట్మేయర్, స్టోయినిస్, అక్షర్ పటేల్, రబాడా, నోర్ట్జే, అమిత్ మిశ్రా/అశ్విన్, ఇషాంత్.
కోల్కతా బలాలు
ఈ టోర్నీలో సూపర్ ఫామ్లో ఉన్న రాజస్థాన్ను ఓడించడం కోల్కతా టీమ్లో ఆత్మవిశ్వాసాన్ని పెంచిందని కచ్చితంగా చెప్పవచ్చు. లో స్కోరింగ్ మ్యాచ్లో కోల్కతా బౌలర్లు అద్భుత ప్రదర్శన చేశారు. ముఖ్యంగా లోకల్ ప్లేయర్లు శివమ్ మావి, నాగర్ కోటి, వరుణ్ చక్రవర్తి పరుగులను నియంత్రించడమే కాకుండా రెండేసి వికెట్లు తీశారు. వీరితో పాటు మిగిలిన బౌలర్లు కూడా తలో వికెట్ తీయడం గమనార్హం. ఈ టోర్నీలో సూపర్ ఫామ్లో ఉన్న ఓపెనర్ శుభ్మన్ గిల్ మరోసారి రాణించాడు. టాప్ స్కోరర్గా నిలిచాడు. అలాగే ఇయాన్ మోర్గాన్ ఫామ్లోకి రావడం కోల్కతా టీమ్లో ఆత్మవిశ్వాసాన్ని పెంచుతోంది. మిగిలిన్ బ్యాట్స్మెన్ కూడా చెప్పుకోదగ్గ స్థాయిలోనే పరుగులు చేశారు.
కోల్కతా బలహీనతలు
స్టార్ ఆల్ రౌండర్లు సునీల్ నరైన్, ఆండ్రూ రస్సెల్ ఇంకా పూర్తి స్థాయిలో తమ మార్క్ చూపించలేదు. అలాగే దినేష్ కార్తీక్ కెప్టెన్ ఇన్నింగ్స్ ఆడడంలో విఫలమవుతున్నాడు. ఇక, భారీ ధర వెచ్చించి కొనుకున్న ప్యాట్ కమిన్స్ ఆశించిన స్థాయిలో రాణించలేకపోతున్నాడు. వరుస అవకాశాలు అందుకుంటున్న నితీష్ రాణా ఆకట్టుకోలేకపోతున్నాడు. ఇక, తటస్థ వేదికల్లో ఇప్పటివరకు ఢిల్లీతో కోల్కతా నాలుగు సార్లు తలపడింది. ఒక్క మ్యాచ్లో కూడా కోల్కతా గెలవలేకపోయింది. ఈ రోజు మ్యాచ్ కూడా తటస్థ వేదికలోనే జరుగబోతోంది.
కోల్కతా జట్టు (అంచనా)
శుభ్మన్ గిల్, సునీల్ నరైన్, నితీష్ రాణా, ఆండ్రూ రస్సెల్, దినేష్ కార్తీక్, ఇయాన్ మోర్గాన్, ప్యాట్ కమిన్స్, నాగర్కోటి, శివమ్ మావి, కుల్దీప్ యాదవ్, వరుణ్ చక్రవర్తి.
మ్యాచ్ ఫేవరెట్
టోర్నీలోని ఆసక్తికర మ్యాచ్ల్లో ఇది ఒకటి. సమాన స్థాయిలో ఉన్న ఈ టీమ్లు తలపడుతున్న మ్యాచ్లో గెలిచిన జట్టు పాయింట్ల పట్టికలో నెంబర్ వన్ స్థానానికి చేరుకుంటుంది. కాబట్టి రెండు టీమ్లు సర్వశక్తులు ఒడ్డి పోరాడబోతున్నాయి. మరి, ఎవరు విజయాన్ని అందుకుని నెంబర్ వన్ స్థానానికి చేరుకుంటారో చూడాలి..
