Life Of Kathi Mahesh :
సినిమా కలలు ఎందరికో ఉంటాయి. అలాంటి కలే కత్తి మహేష్ ను సినిమాల వైపు నడిపించింది. కత్తి మహేష్ చిత్తూరు జిల్లా వాసి. హైదరాబాద్ సెంట్రల్ యూనివర్శిటీలో డిగ్రీ చేశారు. ఆ తర్వాత జర్నలిజం వైపు మొగ్గు చూపారు. ఆ కోర్సు కూడా పూర్తిచేశారు. సినిమా దర్శకుడు అవ్వాలన్నది ఆయన చిరకాల వాంఛ. ఆ ప్రయత్నాల కెసం రామానాయుడు ఫిలిం ఇన్ స్టిట్యూట్ లోనూ చేరారు. అక్కడే ఆయనకు వెంకట సిద్ధారెడ్డి, మహా లాంటి వారితో స్నేహం ఏర్పడింది. 2011లో తిలక్ కథ ‘ఊరు చివర ఇల్లు’ ఆధారంగా ఓ షార్ట్ ఫిలిం తీశారు.
ఆయనలోనే మంచి రచయిత, విశ్లేషకుడు ఉన్నారు. ‘మిణుగురులు’ చిత్రానికి రచనా సహకారం అందించారు. దర్శకుడిగా మారే అవకాశం కూడా వచ్చింది. అదే ‘పెసరట్టు’ చిత్రం. అది సరిగా ఆడలేదు. దాంతో నటన వైపు దృష్టి మళ్లింది. అనేక చిత్రాల్లో చిన్నా చితకా వేషాలు వేశారు. నేనే రాజు నేనే మంత్రి, హృదయకాలేయం, కొబ్బరిమట్ట, అమ్మరాజ్యంలో కడప బిడ్డలు, క్రాక్ లాంటి సినిమాల్లో నటించారు. సోషల్ మీడియాలో యాక్టివ్ గా ఉండటంతో బిగ్ బాస్ హౌస్ కి వెళ్లే అవకాశం వరించింది. దాదాపు 27 రోజుల పాటు హౌస్ లో కొనసాగారు.
Life Of Kathi Mahesh :
కత్తి లాంటి రివ్యూల పేరుతో సినిమా సమీక్షలు చేసేవారు. కత్తి మహేష్ మరణం సినీ పరిశ్రమ దిగ్బ్రాంతికి గురయ్యేలా చేసింది. ఈ మధ్య టీన్ఆర్ అనే సీనియర్ జర్నలిస్టు కరోనాతో మరణించిన వార్తను మరువక ముందే కత్తి మహేష్ మరణ వార్త మరో విషాదాన్ని సినీ పరిశ్రమలో నింపింది. తరచూ ఏదో విధంగా వార్తల్లో కనిపించే కత్తి మహేష్ ఇక లేడన్న విషయాన్ని జీర్ణించుకోలేకపోతున్నారు.
అతన్ని ద్వేషించేవారు సైతం కత్తి మహేష్ కోలుకోవాలని ప్రార్థనలు చేశారు. గత అసెంబ్లీ ఎన్నికల్లో ఓ రాజకీయ పార్టీ టిక్కెట్ కోసం కూడా కత్తి మహేష్ ప్రయత్నించినట్టు వార్తలొచ్చాయి. మహేష్ కుటుంబ సభ్యులు, బంధువులకు ప్రగాఢ సానుభూతిని తెలుపుతూ పలువురు సినీ ప్రముఖులు సోషల్ మీడియాలో మెసేజ్ లు పెడుతున్నారు.
Must Read ;- నటుడు, సినీ విమర్శకుడు కత్తి మహేష్ కన్నుమూత
