అందంగా ఉన్నవారే కథానాయికలు అవుతారు .. కథానాయికలు అంటేనే అందంగా ఉంటారు. అందాన్ని నిర్వచించడం .. నిదర్శనాలు చూపడం కష్టం. ఎవరి అందం వారిది .. అందంలో ఎవరి ప్రత్యేకత వారిది. ఒకనాయిక నవ్వుతో ఆకట్టుకుంటే .. మరో నాయిక నడకతో ఆకర్షిస్తుంది. అలాగే ఒకరు నాజూకు నాసికతో కట్టిపడేస్తే, వేరొకరు గులాబీ రేకుల్లాంటి పెదాలతో పడేస్తారు. అందమంటే కంటికి నచ్చేది .. మనసు మెచ్చేది .. హృదయాన్ని ఉప్పొంగించేది అనేది ప్రేక్షకుల మాట. అందమైన కథానాయికలకు ఆరాధకులు ఎప్పుడూ ఉంటారు .. తమ ఊహలపల్లకిలో ఆ నాయికలను ఊరేగిస్తూనే ఉంటారు.
అలా అందంగా ఉండే ఎంతోమంది కథానాయికలు తెలుగు తెరకి పరిచయమయ్యారు. తొలి సినిమాతోనే తమ గ్లామర్ తో కుర్రకారు హృదయాలను హోల్ సేల్ గా దోచేసిన వాళ్లున్నారు. తెరపై పూలరథంలా కదులుతూ, అమృత ఘడియాల్లా అప్పుడే సినిమా అయిపోయిందా? అనిపించేలా చేసినవారున్నారు. సినిమా నడుస్తూ ఉండగానే సీట్లపై నుంచి దూకెళ్లి, వెండితెరకే ఓ దిష్టిచుక్క పెట్టేద్దామనిపించిన సొగసైన భామలు ఉన్నారు. అలాంటి ఓ కొత్తమ్మాయి తెలుగు తెరకు పరిచయం కాబోతోంది. వచ్చే ఏడాది తెలుగు తెరకి మరింత మెరుపు తీసుకురాబోతోంది. ఆ అమ్మాయి పేరే .. నజ్రియా నజీమ్.
నజ్రియా నజీమ్ పేరు వినగానే ఆకాశాన్ని బంధించే కళ్లు .. అమృతాన్ని కురిపించే కళ్లు గుర్తొస్తాయి. ఆ కళ్లు పడుచు మనసులు ఇష్టపడి చేరే చెరసాల్లా కనిపిస్తాయి .. కొంటె చూపులతో కోరికలను రేకెత్తించే కేంద్రాలుగా అనిపిస్తాయి. అలాంటి అమ్మాయి తెలుగు తెర వాకిట్లో అడుగుపెడుతుందంటే వయసులో ఉన్న ప్రేక్షకులు వద్దంటారా? ఆల్రెడీ తమిళ .. మలయాళ భాషా ప్రేక్షకులను మంత్ర ముగ్ధులను చేసిన నజ్రియా నజీమ్, నానీ హీరోగా చేస్తున్న ‘అంటే .. సుందరానికీ!’ అనే సినిమా ద్వారా పరిచయమవుతోంది. కొత్తగా కొత్త ఏడాదిలో ఎంట్రీ ఇస్తున్న కొత్త కథానాయికలకు ఈ బ్యూటీ ఏ రేంజ్ లో పోటీ ఇస్తుందో చూడాలి.
Must Read ;- అందంతో కనికట్టు చేస్తోన్న ‘నాగిని 5’ బ్యూటీ
