Manchu Vishnu To Take Oath As MAA President
మూవీ ఆర్టిస్ట్ అసోసియేషన్ (మా) కొత్త పాలకవర్గం ఈరోజు ప్రమాణస్వీకారం చేసింది. విశేషమేమిటంటే ముందుగా బాధ్యతలు చేపట్టి అనంతరం అధ్యక్షుడిగా మంచు విష్ణు ప్రమాణ స్వీకారం చేయడం విశేషం. నిన్ననే ఆయన బాధ్యతలు చేపట్టి తొలి సంతకంగా సభ్యుల పెన్షన్ ఫైలుపై సంతకం చేశారు. మళ్లీ ఇప్పుడు ప్రమాణ స్వీకారం చేశారు. మొత్తానికి ఇది కొత్త సంప్రదాయం అనే చెప్పాలి. బహుశా మంచి ముహూర్తం కావడం వల్ల అలా చేశారేమో అనుకోవాల్సి వస్తోంది. మంచు విష్ణు ప్యానల్ సభ్యులు ప్రమాణ స్వీకారం చేశారు.
ఈ ఎన్నికల్లో ప్రకాష్ రాజ్ ప్యానల్ తరఫున గెలుపొందిన వారంతా రాజీనామాలు చేసిన సంగతి తెలిసిందే. మంత్రి తలసాని శ్రీనివాసయాదవ్ ముఖ్య అతిథిగా హాజరయ్యారు. శనివారం ఉదయం 11.30 గంటలకు ప్రమాణస్వీకార కార్యక్రమం మొదలైంది. ఈ కార్యక్రమానికి ప్రకాష్ రాజ్ ప్యానల్ మొత్తం గైర్హాజరైంది. ప్రత్యేకించి ఎవరికీ ఆహ్వానాలు పంపలేదని అంటున్నారు. కోటా శ్రీనివాస రావు, కైకాల సత్యనారాయణ, బాలకృష్ణతో పాటు కొందరు సీనియర్ నేతల వద్దకు మాత్రం మంచు విష్ణు ప్రత్యేకంగా వెళ్లి కలిసి ఆహ్వానించినట్టు తెలిసింది.
Manchu Vishnu To Take Oath As MAA President
మెగాస్టార్ చిరంజీవిని మాత్రం కలిసి ఆహ్వానించలేదని సమాచారం. మరో విశేషం ఏమిటంటే పవర్ స్టార్ పవన్ కళ్యాణ్ ను మాత్రం మంచు మనోజ్ నిన్న భీమ్లానాయక్ సెట్లో వెళ్లి కలిశారు. దాదాపు గంటపాటు టాలీవుడ్ పరిణామాలపై చర్చించినట్టు తెలుస్తోంది. కనీసం ప్రకాష్ రాజ్ ప్యానల్ సభ్యులను కూడా ఈ కార్యక్రమానికి ఆహ్వానించలేదని తెలుస్తోంది. ప్రమాణ స్వాకారానికి ముందు ఫిలిం నగర్ దైవ సన్నిధానంలో ప్రత్యేక పూజలు నిర్వహించారు. అలాగే మా కార్యాలయాన్ని ప్రత్యేకంగా అలంకరించారు. మేళతాళాలతో ఆర్భాటంగా ఈ ప్రమాణ స్వీకారోత్సవాన్ని నిర్వహించారు.
