ఆమె ఓ పహల్వాన్.. ఆమె ఓ పటాఖా.. అంతకుమించిన పాగ్లైట్. ఆమె ఇంకెవరో కాదు సాన్యా మల్హోత్రా. సినిమా అనే దంగల్ లో ప్రవేశించాక ఇక వెనుతిరిగి చూసుకోవాల్సిన అవసరం కనిపించలేదామెకు. అమీర్ ఖాన్ దంగల్ లోనే తన తడాఖా చూపించింది. అటు సెక్స్ ప్యాక్ అయినా, ఇటు సిక్స్ ప్యాక్ అయినా సాన్యా ఓకే అనకుండా ఉండదు. లూడో ఆటలో ఆమె సత్తా ఏంటో తెలుస్తుంది. క్రీడారంగం నుంచి నటనా రంగంలోకి అడుగుపెట్టి ఆల్ రౌండర్ గా సత్తా చాటుతోంది. ఢిల్లీ గల్లీ నుంచి సినిమా గల్లీలో అడుగుమోపిన ఈ భామ ఐదేళ్ల వ్యవధిలోనే ఎదిగిపోయింది. ఎందుకో తెలియదుగానీ ఆమె ఆఫ్ బీట్ సినిమాలకే ఎక్కువ ప్రాధాన్యం ఇస్తోంది.
తిరస్కరణలు సహజమే
అసలు సినిమా ప్రయత్నాల్లో ఉన్న ఆమెను నువ్వు సినిమా రంగానికి పనికిరావని అన్నవారు కూడా ఉన్నారట. బ్యాలెట్ డ్యాన్స్ లో ట్రైనింగ్ తీసుకుని మరీ సినిమా రంగంలోకి అడుగుపెట్టింది. ఆమె డ్యాన్స్ గురువు ధర్మేష్ యెలాండే కూడా ఓ ఆడిషన్ లో ఆమెను పరిశీలించి ఆమెను రిజక్ట్ చేసినట్టు అంగీకరించారు. 2016లో ‘దంగల్’ సినిమాలో అవకాశం వచ్చినప్పుడు ఆమె ఓ సాధారణ యువతిగానే అందరూ భావించారు. ఆమె ఓ నిప్పురవ్వ అనే సంగతి ఇప్పుడు అందరికీ అర్థమవుతోంది.
పటాఖా, బదాయి హో చిత్రాల్లో ఆమెను చూసినప్పుడు ఆమెను సరికొత్త కోణంలో చూసినట్టుందంటూ రిషి కపూర్ లాంటి వారే వ్యాఖ్యానించారు. గావ్ కి చోరీ, స్మార్ట్ అప్ టౌన్ గర్ల్ చిత్రాలు ఆమెలోని విభిన్న కోణాన్ని ఆవిష్కరించాయి. ఫొటోగ్రాఫ్, శకుంతలాదేవి సినిమాలు కూడా ఆమెలోని బహుముఖ నటిని చూపించాయి. వాటిలో నవాజుద్దీన్ సిద్ధిఖి, విద్యాబాలన్ లతో నటించింది. అలాంటి నటులతో సమానంగా తన ప్రతిభాపాటవాలను ప్రదర్శించింది.
వరుసగా ఆమెలోని నటి ఎలాంటిదో అందరికీ తెలిసింది.
లూడో, పాగలైట్ చిత్రాలతో మరో మెట్టు పైకి ఎక్కింది. బాలీవుడ్ లో ఆఫ్ బీట్ చిత్రాలు రూపొందితే మొదటి ఆప్షన్ సాన్యా మల్హోత్రే అవుతుందనడంలో ఎలాంటి అతిశయోక్తి కాదు. పాగలైట్ అనేది ఓ వితంతువు కథ. తన భర్త చనిపోయాక మాత్రమే తన చుట్టూ ఉన్న సమాజం ఏంటో తెలుసుకునే పాత్ర అది. ఎలాంటి పాత్రను పోషించడానికైనా సాన్యా వెనుకాడదు అనేది అందరికీ అర్థమైంది. ముఖ్యంగా ఓటీటీకి బెస్ట్ ఆప్షన్ సాన్యేనే అని చెప్పాలి. నటనా రంగంలో ఊహించిని మలుపులతో ఆమె కెరీర్ సాగుతోంది. ఇది ఆమెను ఏ తీరాలకు చేరుస్తుందో చూడాలి.
Also Read:బాలీవుడ్ ‘విక్రమ్ వేదా’ లో హీరోలు వీరే!
