కోలీవుడ్ లో విభిన్నమైన కథలకు .. విలక్షణమైన పాత్రలకు ప్రాధాన్యతనిచ్చే కథానాయకులలో కమల్ .. విక్రమ్ తరువాత స్థానంలో సూర్య కనిపిస్తాడు. పాత్ర కోసం తనను తాను మార్చుకోవడం .. పాత్రే తానుగా మలచుకోవడం సూర్య ప్రత్యేకత. అందువలన ఆయనతో సినిమాలు చేయడానికి దర్శక నిర్మాతలు ఉత్సాహాన్ని చూపుతుంటారు. హిట్ .. ఫ్లాప్ అనే విషయాలను పక్కన పెట్టేసి, వరుస సినిమాలు చేయడానికే సూర్య ఎక్కువ ఆసక్తిని చూపిస్తుంటాడు. ఇక ఒకసారి ఒక దర్శకుడు హిట్ ఇచ్చాడంటే, ఆ దర్శకుడిపై సూర్య పూర్తి నమ్మకం పెట్టేస్తాడు.
అందువల్లనే ఆయన ఒకే దర్శకుడితో వరుస సినిమాలు చేసిన సందర్భాలు కనిపిస్తూ ఉంటాయి. ముఖ్యంగా దర్శకుడు హరితో కలిసి ‘సింగం’ సిరీస్ లో ఆయన వరుస సినిమాలు చేశాడు. పవర్ ఫుల్ పోలీస్ ఆఫీసర్ పాత్రలో కనిపించాలనే తన కుతూహలాన్ని పూర్తిగా తీర్చేసుకున్నాడు. పోలీస్ ఆఫీసర్ గా చేయాలనుకున్న హీరోలు, సూర్య చేసింది కాకుండా తాము ఇంకా ఏం చేయగలమని ఆలోచించుకునే స్థాయికి తీసుకెళ్లాడు. ఫైటింగులతోనే కాదు .. డైలాగులతోను దడపుట్టించాడు. అలాంటి ఈ ఇద్దరి కాంబినేషన్లో మరో సినిమా సెట్స్ పైకి వెళ్లనున్నట్టు తెలుస్తోంది.
పోలీస్ కథలు చేసి చేసి అలసిపోయిన దర్శకుడు హరి, ఇటీవల కొత్తగా ఒక కథను సిద్ధం చేశాడట. లాక్ డౌన్ కాలంలో ఆయన ఈ కొత్త కథపై ఒక రేంజ్ లో కసరత్త్తు చేశాడు. సూర్యను దృష్టిలో పెట్టుకుని తయారు చేసిన ఈ కథను, ఇటీవలే ఆయనకి వినిపించాడట. కథ వినగానే సూర్య దానిని ఇక పట్టాలపైకి పట్టుకెళదామని అన్నాడట. ఇది గ్రామీణ నేపథ్యంలో సాగే కథ అని తెలుస్తోంది. ఒక పల్లెటూరి బుల్లోడుగా ఈ సినిమాలో సూర్య కనిపించనున్నాడని అంటున్నారు. ఫ్యామిలీ ఎమోషన్స్ తో సాగే ఈ కథలో సూర్య కొత్త లుక్ తో కనిపిస్తాడని చెబుతున్నారు. ఏదేమైనా హరి ఆలోచనా విధానం మారింది .. అదే సంతోషం అంటున్నారు సూర్య ఫ్యాన్స్.
Must Read ;- తమిళనాట మోదీకి ‘చిన్నమ్మ’ పెద్దదెబ్బ.. ఏబీసీ న్యూస్-సీ ఓటర్ సర్వే
