కొన్ని ప్రేమజంటలను చూసినప్పుడు ఆ అమ్మాయి ఈ అబ్బాయికి ఎలా పడిందో, ఈ అబ్బాయికి ఆ అమ్మాయి ఎలా నచ్చిందో అని అనుకోవడం సహజంగా జరుగుతూ ఉంటుంది. అయినా పొంతన .. పోలిక చూసుకోవడానికి వాళ్లు కవలలు కాదు గదా .. ప్రేమికులు. ప్రేమికుల ఎంపికలో ఆ మాత్రం తేడా లేకపోతే ప్రేమ గుడ్డిదని ఎందుకంటారు? ప్రేమ వెనుక ఎప్పుడూ రిస్క్ ఉంటుంది. నిజం చెప్పాలంటే రిస్క్ లేకపోతే అది ప్రేమే కాదు .. ప్రేమకథనే కాదు. అలాంటి ప్రేమకథతోనే ‘ఉప్పెన’ ఈ నెల 12వ తేదీన ప్రేక్షకుల ముందుకు వచ్చింది.
వైష్ణవ్ తేజ్ – కృతి శెట్టి జంటగా నటించిన ఈ సినిమాకి బుచ్చిబాబు దర్శకుడిగా వ్యవహరించాడు. కథాకథనాల పరంగా .. సంగీతం పరంగా ఈ సినిమా యూత్ హృదయాలను చాలావరకూ కొల్లగొట్టగలిగింది. తెలుగు రాష్ట్రాల్లో ఈ సినిమా ఒక రేంజ్ లో దూసుకుపోతోంది. తొలి మూడు రోజుల్లో ఈ సినిమా 28.29 కోట్ల షేర్ ను రాబట్టింది. మూడు రోజుల్లో భారీ వసూళ్లు సాధించిన టాప్ ఆరు చిత్రాల జాబితాలో ఉప్పెన చేరడం విశేషం. ఒక కొత్త హీరో సినిమాకి ఈ స్థాయి వసూళ్లు రాబట్టడం నిజంగా గొప్ప విషయమని ఇండస్ట్రీలో చెప్పుకుంటున్నారు. ఈ స్థాయిలో వసూళ్లు ఉంటే ఫుల్ రన్ లో ఎంత వసూళ్లు సాధిస్తుందన్న అంచనా వేయడం కష్టం. మరో హిట్ వచ్చే వరకూ ఉప్పెన హవా ఇలాగే కొనసాగుతుంది.
‘ఉప్పెన‘ సినిమా గ్రామీణ నేపథ్యంలో .. సముద్రతీరంతో ముడిపడిన కథ కావడం వలన, ఈ సినిమా నుంచి వదిలిన పాటల కారణంగా మొదటి నుంచి ప్రేక్షకుల్లో అంచనాలు పెరుగుతూ వచ్చాయి. ఇంతగా థియేటర్లకు ప్రేక్షకులు ఎగబడటానికి, వైష్ణవ్ తేజ్ మెగా ఫ్యామిలీ నేపథ్యం నుంచి రావడం ఒక కారణమైతే .. హీరోయిన్ కృతి శెట్టి గ్లామర్ మరో కారణంగా చెప్పుకోవచ్చు. థియేటర్ బయటికి వచ్చిన ప్రేక్షకులంతా, ఊహ తెలిసిన దగ్గర నుంచి ఇలాంటి పిల్లను మా ఊళ్లో అయితే చూడలేదని చెబుతున్నారు. అలాంటప్పుడు ఇక వసూళ్లు పెరగకుండా ఎలా ఉంటాయి? కాబట్టి ఈ వసూళ్లలో సింహభాగం క్రెడిట్ హీరోయిన్ కృతిశెట్టికే దక్కుతుందనడంలో అతిశయోక్తి లేదు.
Must Read ;- ఉప్పెన హీరోయిన్ కి బంపర్ ఆఫర్?
