ఆ ‘టైమ్’ వచ్చింది… సినిమా పెద్ద పీ(పా)ట వేసింది

తెలుగు సినిమా పాటల తోటలో పదాల పరిమళాలు వెదజల్లుతున్న గీత రచయిత వనమాలి. హ్యాపీడేస్, శివపుత్రుడు, చందమామ, వినాయకుడు, గాయం2, రోబో, ఆర్య2, ఆరెంజ్, ఓయ్, కడలి, లైఫ్ ఈజ్ బ్యూటీఫుల్, ప్రస్థానం, కబాలి, మనం, ఫిదా, మజిలీ… ఇలా పలు చిత్రాల్లో హిట్ గీతాలు ఆయన కలం నుంచి వచ్చినవే. ఉత్తమ గేయరచయితగా ఫిలింఫేర్ అవార్డుతోపాటు రెండు సార్లు ఆంధ్ర రాష్ట్ర ప్రభుత్వ నంది పురస్కారాలు అందుకున్నారు. ఇంతవరకూ దాదాపు 800 గీతాలు రాసి, మెలోడీలకు చక్కని చిరునామాగా పేరు తెచ్చుకున్నారు. ఆయనతో ‘ది లియోన్యూస్’ జరిపిన ఇంటర్వ్యూ విశేషాలివి.
మీకు పాటల మీద ఆసక్తి ఎలా కలిగింది?
చిన్నప్పటినుంచి నాన్నగారు, పెద్దన్నయ్య పాడుతున్న పాటలు వింటూ పెరిగాను. దాంతో ఆ పాటల సాహిత్యం నన్ను బాగా ఇన్స్పైర్ చేసేది. అలాగే నేను కూడా స్కూల్లో, కాలేజీలో పాటల పోటీల్లో పాల్గొనేవాడిని. చిన్నచిన్న బహుమతులు కూడా వచ్చేవి. అలా చిన్నప్పటి నుంచే పాటల మీద ఆసక్తి పెరిగింది.
రచయిత కావడానికి ఇన్స్పిరేషన్ ?
సినారె గారు. డిగ్రీ చదువుతున్నపుడు ఆయన సిధ్దాంత గ్రంథం చదవడం జరిగింది. అందులో తెలుగు కవులు, వారి సాహిత్యానికి చెందిన విశ్లేషణలు నన్ను బాగా ఆకట్టుకునేవి. దాంతో మెల్లగా నేను కూడా కవితలు రాయడం మొదలుపెట్టాను. అలా నా మొదటి కవిత ‘ఆంధ్రప్రభ’ వారపత్రికలో అచ్చయింది. దాంతో రచయితగా నేను పనికొస్తాననే నమ్మకం కలిగింది. అలా పత్రికల్లో కవితలూ, దూరదర్శన్ లో లలిత గీతాలు రావడం మొదలైంది.
మరి సినిమాల్లోకి ఎలా వచ్చారు?
నా అభిమాన గాయకులు ఎస్పీ బాలసుబ్రహ్మణ్యంగారు. నేను రాసిన పాట ఆయన గొంతులో వినాలనే కోరిక ఉండేది. అదే నన్ను ఈ రంగంలోకి వచ్చేలా చేసింది. అయితే అది నేను ఏ ప్రయత్నమూ చేయకుండానే జరిగింది. నా ఎమ్మే అయ్యాక చెన్నయ్ లో పాత్రికేయునిగా వృత్తి జీవితం మొదలైంది. ఆ సమయంలోనే సహచర పాత్రికేయులు పసుపులేటి రామారావు గారు నన్ను దర్శకులు గీతాకృష్ణ గారికి పరిచయం చేశారు. ఆయన తన ‘టైమ్’ సినిమాలో నాతో ఐదు పాటలు రాయించారు. దానికి ఇళయరాజా సంగీత దర్శకులు. ఇందులో నేను రాసిన మొదటి పాటే బాలుగారు పాడారు. అలా నా కోరిక తీరింది. సినిమా రంగం నన్ను ఆదరించి మంచి పాటలతో పెద్ద పీట వేసింది. అలా ఈ రంగంలో స్థిరపడ్డాను.
గీత రచయితల్లో పోటీ ఎలా ఉంటుంది?
మేం ఎప్పుడూ పోటీలు పడి పాటలు రాయం. కాకపోతే ఏ సీజన్ లో ఎవరి పాట హిట్ అవుతుందో వారికి డిమాండు ఎక్కువగా ఉంటుంది. మళ్లీ కొన్నాళ్లకు ఇంకో రచయిత పాట హిట్ అవుతుంది. అంతా అతని వెంట పడతారు. ఇదో సైకిల్.. అంతే! ఇది కళాత్మక వ్యాపారం. కాబట్టి ఎవరి పాట చెల్లుబాటవుతుందో వారి కోసం దర్శకనిర్మాతలు పోటీ పడతారు. అంతకుమించి మా మధ్య పోటీ ఉండదు.
ఆడియో ఫంక్షన్లలో గీత రచయితల్ని పట్టించుకోరన్న అపవాదు ఉంది?
ఏ సినిమా ఫంక్షన్ అయినా అది జనంలో తమ సినిమాల్ని ప్రమోట్ చేసుకునే భాగంలో ఒకటిగా జరుగుతుంటుంది. అలాంటప్పుడు ప్రజల్లో ఎవర్ని చూపిస్తే, ఎవరి గురించి హైలైట్ చేస్తే ప్లస్ అవుతుందో దానికే ప్రాధాన్యం ఇస్తారు. ఇందులో వారిని తప్పు పట్టాల్సింది ఏమీ లేదు. కానీ అందరూ అలాగే చేస్తారని చెప్పలేం. వైవిఎస్ చౌదరి గారు ‘నిప్పు’సినిమా ఆడియో ఫంక్షన్ లో రచయితల కటౌట్స్ పెట్టించారు. అలాగే శేఖర్ కమ్ములగారు, కృష్ణవంశీ గారు కూడా. ఇలాంటి అరుదైన గౌరవాలు కూడా అప్పుడప్పుడూ మా రచయితలకు దక్కుతుంటాయి.
ప్రతి సంగీత దర్శకుడికీ వారికంటూ ఓ రైటర్స్ బ్యాచ్ ఉంటుందట… నిజమేనా?
కొందరు టెక్నియన్స్ కి కొందరితో కలిసి వర్క్ చేయడం కంఫర్ట్ గా ఫీలవుతారు. అలాంటప్పుడు మంచి ఫలితం రాబట్టుకోవచ్చనే అభిప్రాయం ఉంటుంది. దానివల్ల వారి బాణీలకు ఎవరు చక్కటి పదాలతో పాటలు రాస్తారో వారిని రికమండ్ చేయడం జరుగుతుంది. ఇందులో ఎలాంటి తప్పూ లేదని నా అభిప్రాయం. ఒక్కోసారి వారే దర్శకులకు ఎవరు నచ్చుతారో వారితో రాయిస్తుంటారు. కాబట్టి ఇక్కడ ఇలాగే జరగాలనే రూల్సు పనిచేయవు. మీరు పాట రాసి ఓకే అయినా… సీడీల్లో మరొకరి పాట ఉంటుంది. మీరు రాసింది ఉండదు. ఫైనల్ గా సినిమాకు ఏది ప్లస్సవుతుందో దానికే ఇక్కడ పెద్ద పీట.
ఇటీవల ‘అరణ్య’ చిత్రం ప్రోమోస్ లో మీ పేరు మాటల రచయితగా కూడా కనిపించింది?
అది యాదృచ్చికంగా జరిగింది. తొలుత ఈ చిత్రానికి పాటల రచయితగానే పిలుపొచ్చింది. కానీ అనుకోకుండా మాటలు కూడా రాయాల్సి వచ్చింది. ఈ చిత్ర దర్శకుడు ప్రభు సాల్మన్ తమిళుడు. నాక్కూడా తమిళం వచ్చు కాబట్టి ఆయన కథని చక్కగా అర్థం చేసకోగలనని, తెలుగులో సంభాషణలు నాతో రాయించారు. ఈ చిత్రం తెలుగుతో పాటు తమిళంలో కూడా విడుదలవుతోంది. చిత్రమేమిటంటే తమిళ చిత్రానికి కూడా పాటలు రాయించారు దర్శకులు.
పాటలతో పాటు మాటలు కూడా కంటిన్యూ చేస్తారా?
నా మొదటి ప్రాధాన్యం పాటలకే. కానీ ఈ చిత్రానికి మాటలు రాస్తున్నానని తెలిసి, ఆది పినిశెట్టి హీరోగా నటిస్తున్న ‘క్లాప్’అనే చిత్రానికి కూడా సంభాషణలు రాయించారు. త్వరలో జగపతిబాబు నటించే చిత్రానికి కూడా మాటలు రాసే అవకాశం వచ్చింది. అదింకా ఒప్పుుకోలేదు. కానీ ఎప్పటికైనా నా పేరు చెబితే పాటల రచయితగానే గుర్తుండిపోవాలన్నది నా కోరిక.