వైసీపీ అధికారంలో ఉన్నా… విపక్షంలో ఉన్నా ఆ పార్టీ సోషల్ మీడియా విభాగం మాత్రం తమదైన శైలిలో ప్రతాపం చూపుతూనే ఉంది. 2024 ఎన్నికలకు ముందు ఒకరిదక్దరి సోషల్ మీడియా యాక్టివిస్టులు మినహా మిగిలిన వారు కాస్తంత మర్యాదగానే ఉండేవారు. అయితే ఎప్పుడైతే… 30 ఏళ్ల పాటు అధికారంలో ఉంటామన్న వారి అంచనా తప్పి జగన్ పార్టీ 11 సీట్లతో కనీసం ప్రధాన ప్రతిపక్ష హోదాకు కూడా తూగని రీతిలో చతికిలబడిపోయిందో… అప్పటిదాకా సైలెంట్ గా ఉన్నవారంతా ఒక్కసారిగా ఉన్మాదులుగా మారిపోయారు. నోటికి ఏ పదం వస్తే అదే పదాన్ని అనేస్తున్నారు… చేతికి ఏ రాత వస్తే… దానినే సోషల్ మీడియాలోకి వదిలి పారేస్తున్నారు. ఫలితంగా సీఎం, డిప్యూటీ సీఎం, హోం మంత్రి, ఇతర మంత్రులు, ఎమ్మెల్యేలు, ఎంపీలు అన్న తేడా లేకుండా అందరిపైనా దూషణల పర్వం యథేచ్ఛగా కొనసాగుతోంది. దీనిని ఇలాగే వదిలేస్తే కుదరదని కూటమి సర్కారు త్వరలోనే గ్రహించినట్లుంది. వెనువెంటనే చర్యలకు ఉపక్రమించింది.
కూటమి సర్కారు చర్యలు కాస్తంత నెమ్మదిగానే మొదలుకాగా… ఒకరిద్దరు వైసీపీ సోషల్ మీడియా యాక్టివిస్టులు చట్టాల్లోని లొసుగులను ఆసరా చేసుకుని బెయిల్ తీసుకుని బయటపడిపోయారు. ఈ పరిణామం మరింత మందిని స్వైర విహారం చేయడానికి ఆస్కారమిచ్చిందని చెప్పాలి. ఏముంది అరెస్ట్ చేస్తే… బెయిల్ తీసుకుని బయటపడిపోదామని వారంతా అనుకున్నారు. అయితే ఇప్పుడు స్పీడు పెంచిన కూటమి సర్కారు అరెస్ట్ చేసిన సోషల్ మీడియా యాక్టివిస్టులకు బెయిల్ దొరకకుండా పకడ్బందీ చర్యలు చేపట్టింది. అంతేకాకుండా అసభ్యకరమైన పోస్టులు పెట్టే వారు ఎంత మంది ఉంటే… అంతమందిపైనా ఒకేసారి కేసులు బుక్ చేస్తోంది. అందరినీ పట్టేసి జైల్లోకి తోసేస్తోంది. ఇలా మొన్నటి శనివారం ఒక్కరోజే ఎన్టీఆర్ జిల్లాలో ఏకంగా 45 కేసులు నమోదు కాగా… ఆ కేసుల్లో ఆ రోజు రాత్రే 8 మందిని పోలీసులు అరెస్ట్ చేశారు. మిగిలిన వారి కోసం ఖాకీల వేట సాగుతోంది.
ఇక తాజాగా బుధవారం వైసీపీ అదినేత జగన్ సొంత జిల్లాలో సోషల్ మీడియా అసభ్య పోస్టులపై పోలీసులు దృష్టి సారించారు. ఇందులో భాగంగా జగన్ సతీమణి వైఎస్ భారతి రెడ్డికి పీఏగా వ్యవహరిస్తున్న వర్రా రవీంద్రారెడ్డిని బుధవారం ఉదయం పోలీసులు అదుపులోకి తీసుకున్నారు. ఈ అరెస్టు సందర్భంగా పలు నాటకీయ పరిణామాలు చోటుచేసుకున్నాయి. పోలీసులు తనపై కేసు నమోదు చేశారని తెలుసుకున్న వర్రా… జాగ్రత్తపడ్డాడు. అంతేకాకుండా పోలీసులు తనను అరెస్ట్ చేసేందుకు వస్తున్నారని తెలుసుకుని ఎంచక్కా మస్కా కొట్టేశాడు. తన ఇంటి నుంచి బయటపడిపోయిన వర్రా… ఊరి బయట పొలాల్లో దాక్కునేందుకు యత్నించాడు. అనుకున్నదే తడవుగా పొలాల్లోకి వెళ్లిపోయిన వర్రా… తన సెల్ ఫోన్ ను మాత్రం వాడుతూనేఉన్నాడు. ఈ క్రమంలో వర్రా చావు తెలివితేటలను గ్రహించిన పోలీసులు అతడి మొబైల్ సిగ్నల్స్ ను ట్రాక్ చేయడం మొిదలుపెట్టారు. ఈ క్రమంలో వర్రా ఉన్న చోటు పోలీసులకు తెలిసిపోగా… అక్కడికి పోలీసులు వెళ్లి అతడికి స్వాగతం పలికారు. తాను పొలాల్లో దాక్కున్నా… పోలీసులు తన వద్దకు వచ్చి నిలబడిన తీరుతో వర్రా తెగ వర్రీ అయిపోయాడట.
ఇక 2014లో టీడీపీ అధికారంలో ఉన్నప్పుడు, ఆ తర్వాత 2019లో వైసీపీ అదికారంలోకి వచ్చినప్పుడు పట్టపగ్గాల్లేని రీతిలో విర్రవీగిపోయిన పంచ్ ప్రభాకర్ పని పట్టేందుకు ఇప్పుడు పోలీసులు రంగంలోకి దిగినట్లుగా విశ్వసనీయ సమాచారం. జగన్ వ్యవహారాల్లో వరుసగా హైకోర్టులో వ్యతిరేక తీర్పులే వస్తున్నాయన్న దుగ్ధతో రగిలిపోయిన ప్రభాకర్… ఏకంగా హైకోర్టు న్యాయమూర్తులనే దూషిస్తూ పలు సంచలన కామెంట్లు చేశాడు. అతడితో పాటు మరికొందరు కూడా న్యాయమూర్తులపై అసభ్యకరమైన పోస్టులు పెట్టగా వాటిపై కేసులు నమోదయ్యాయి. అందులో కొందరు అరెస్ట్ అయినా… అమెరికాలో ఉంటున్న కారణంగా ప్రభాకర్ ఇంకా అరెస్ట్ కాలేదు. అయితే ఇప్పుడు అమెరికాలో కాదు కదా… అంతరిక్షంలో ఉన్నా వదిలేది లేదన్న రీతిలో కూటమి సర్కారు, పోలీసులు వేట సాగిస్తున్నారు. నిత్యం బూతులతో పోస్టులు పెట్టే ప్రభాకర్ కు ఈ దఫా ఎలాగైనా సరైన ట్రీట్ మెంట్ ఇచ్చి తీరాల్సిందేనని కూటమి సర్కారు గట్టి ,నిర్ణయం తీసుకోగా… నేడో, రేపో పోలీసులు అమెరికా ఫ్లైట్ ఎక్కేందుకు రెడీ అయిపోయినట్లుగా సమాచారం.
