తెలుగు సినిమాకు దర్శకుడు రాంగోపాల్ వర్మ బొమ్మ చూపించేస్తున్నాడు. ఆయనపై ఇంకెన్ని సినిమాలు రాబోతున్నాయో అర్థం కావడంలేదు. తాజాగా బొమ్మాకు క్రియేషన్స్ లో రామ్ గోపాల్ వర్మ నిజ జీవిత సినిమా రాబోతోంది. రామ్ గోపాల్ వర్మ నిజ జీవితాన్ని మూడు భాగాలను మూడు చిత్రాలుగా నిర్మించబోతోంది. దీనికి సంబంధించిన పార్ట్ 1 సినిమా ఫస్ట్ లుక్ పోస్టర్ బుధవారం సాయంత్రం 5 గంటలకు రిలీజ్ చేయబోతున్నారు. ఈ మూడుచిత్రాల్లో ఒక్కొక్క చిత్రం నిడివి సుమారు రెండు గంటలుంటుంది.
మొత్తం మూడు సినిమాలు కలిపి 6 గంటలు ఉంటాయట. బొమ్మాకు మురళి నిర్మాణంలో రామ్ గోపాల్ వర్మ ఆధ్వర్యంలో దొరసాయి తేజ ఈ చిత్రానికి దర్శకత్వం చేయబోతున్నాడు . సెప్టెంబరులో ఈ సినిమా చిత్రీకరణ ప్రారంభం కానుంది. పార్ట్ 1 లో 20 ఏళ్ళ ఆర్జీవీ లాగా ఓ కొత్త యువ నటుడు నటించబోతున్నాడు. పార్ట్ 2 సినిమాలో లో వేరే నటుడు ఉంటాడు. పార్ట్ 3 లో ఆర్జీవీ యే స్వయంగా తన పాత్రను పోషిస్తారు. ఆర్జీవీ జీవితం లోని ఆయన వేరు వేరు వయసుల్లో జరిగిన వేరు వేరు అంశాలను ఈ సినిమాలో చూపెట్టబోతున్నారు.
మొదటి భాగం సినిమా పేరు “రాము ” రామ్ గోపాల్ వర్మ ఆరంభం. ఇందులో ఆయన విజయవాడ కాలేజ్ రోజులు, ఆయన తొలి ప్రేమలు, అప్పట్లో ఆయన పాల్గొన్న గ్యాoగ్ ఫైట్స్ తో మొదలై ఆయన ‘శివ’ సినిమా చేయడానికి ఎలాంటి పన్నాగాలు పన్నాడు, రిలేన్ షిప్స్ ను ఎలా మాయ చేసి వాడుకున్నాడు అన్నది ప్రధాన కథాంశం గా చూపెడతారు. పార్ట్ 2 “రామ్ గోపాల్ వర్మ” అండర్ వరల్డ్ తో ప్రేమాయణం. ఇది తన ముంబై జీవితంలో అమ్మాయిలు, గ్యాంగ్ స్టర్స్, అమితాబ్ బచ్చన్ లతో ఆయనకున్న అనుబంధాల గురించి ఉంటుంది. పార్ట్ 3 “RGV” ది ఇంటెలిజెంట్ ఇడియట్. ఇది ఆయన అపజయాలు, వివాదాలు, ఆయనకున్న దేవుళ్ళ పట్ల, సెక్స్ పట్ల , సమాజం పట్ల ఉన్న విపరీత ధోరణులతో పాటు చాలా మంది మీద ఆర్జీవీ ప్రభావం ఎలా ఉంటుందో చూపెడుతుంది.
