ఏపీ ప్రజలకు గుడ్ న్యూస్. నవ్యాంధ్ర రాజధాని అమరావతి నిర్మాణం డిసెంబర్ నుంచి ప్రారంభం కానుంది. డిసెంబర్ 1 నుంచి అమరావతి నిర్మాణ పనులు నిరంతరాయంగా సాగనున్నాయి. మొన్న జరిగిన సార్వత్రిక ఎన్నికల్లో టీడీపీ, జనసేన, బీజేపీ కూటమి అధికారంలోకి రాగానే టీడీపీ అధినేత నారా చంద్రబాబు నాయుడు ముఖ్యమంత్రిగా బాధ్యతలు చేపట్టారు. ఆయన ముఖ్యమంత్రిగా బాధ్యతలు చేపట్టిన అనంతరం మధ్యలో నిలిచిపోయిన నవ్యాంధ్ర రాజధాని అమరావతి నిర్మాణ పనులను పూర్తి చేస్తామని ప్రకటించారు. వెంటనే దేశ రాజధాని ఢిల్లీకి వెళ్లి ప్రధానమంత్రితో అమరావతి నిర్మాణానికి సహకరించాలని కోరారు. దీంతో రాష్ట్ర రాజధాని నిర్మాణానికి రూ. 15వేల కోట్లను కేటాయిస్తూ కేంద్రం నిర్ణయం తీసుకుని కేంద్ర బడ్జెట్లోనే అనౌన్స్ చేసింది.
కేంద్ర బడ్జెట్లో ఇచ్చిన హామీ మేరకు అమరావతికి కేంద్రం గ్యారంటీతో రుణాన్ని మంజూరు చేసేందుకు.. ప్రపంచ బ్యాంకు ముందుకు వచ్చింది. ఐదేళ్లుగా నిలిచిపోయిన అమరావతి నిర్మాణ పనులకు ఊతమిచ్చేలా ప్రపంచ బ్యాంక్, ఆసియా డెవలప్మెంట్ బ్యాంక్ కన్సార్షియం నుంచి కేంద్ర ప్రభుత్వ హామీతో రుణాన్ని మంజూరు చేయడానికి సమ్మతి తెలిపాయి. గత ఐదేళ్లుగా అమరావతి పనులు నిలిచిపోవడంతో పాటు అంతకు ముందు చేపట్టిన పనులకు సంబంధించి దాదాపు రూ.9వేల కోట్ల మేర బిల్లులు బకాయి చెల్లించాల్సి ఉంది. టీడీపీ కూటమి ప్రభుత్వం అధికారంలోకి వచ్చిన వెంటనే పనుల పునురుద్ధరణ ప్రయత్నాలు ప్రారంభించారు. కేంద్ర బడ్జెట్లో అమరావతికి నిధులు గ్యారంటీగా ఇస్తామని నిర్మలా సీతారామన్ హామీ ఇచ్చారు. గతంలో ప్రపంచ బ్యాంకు, ఆసియా డెవలప్మెంట్ బ్యాంకులు అమరావతి నిర్మాణానికి రుణాలు ఇచ్చేందుకు ముందుకు వచ్చినా రాష్ట్ర ప్రభుత్వం అవసరం లేదని లేఖ రాయడంతో వాటిని ఉపసంహరించుకున్నాయి. రాష్ట్రంలో టీడీపీ కూటమి ప్రభుత్వం ఏర్పాటైన తర్వాత గతంలో మంజూరు చేసిన రుణం కోసం ప్రయత్నాలు జరిగాయి. కేంద్ర ప్రభుత్వం కూడా గ్యారంటీగా ఉండటానికి సుముఖత తెలుపడంతో రుణం మంజూరు అంశం కొలిక్కి వచ్చింది. మరి కొద్ది రోజుల్లో ఆ ప్రక్రియ కొలిక్కి రానున్న డిసెంబర్ 1 నుంచే అమరావతి నిర్మాణ పనులను ప్రారంభించేందుకు సిఆర్డిఏ సిద్ధం అవుతోంది.
రాజధాని నిర్మాణం కోసం రూ. 15,000 కోట్ల రుణం ఇచ్చేందుకు వరల్డ్ బ్యాంక్, ఏడీబీ కన్సార్షియం ఆమోదం తెలుపుతూ కేంద్ర ప్రభుత్వానికి సమాచారం ఇచ్చాయి. మొత్తం రూ.15 వేల కోట్లూ ప్రస్తుత ఆర్థిక సంవత్సరంలోనే సీఆర్డీఏకి అందుతాయని ఆర్థిక శాఖ అధికారులు అంచెనా వేస్తున్నారు. అమరావతి మాస్టర్ప్లాన్లో భాగంగా మౌలిక వసతుల అభివృద్ధి, రాజధాని నిర్మాణం కోసం భూ సమీకరణలో భూములిచ్చిన రైతులకు కేటాయించిన లేఅవుట్లను అభి వృద్ధి చేయడం, పరిపాలన నగరంలో శాసనసభ, హైకోర్టు, సచివాలయం, విభాగాధిపతుల కార్యాలయ భవనాల టవర్ల నిర్మాణం వంటి పనులకు రూ.49 వేల కోట్లు ఖర్చు చేయాల్సి ఉంది. ఈ మేరకు సవరించిన అంచనాలను సీఆర్డీఏ ఇటీవల సిద్ధం చేసింది.
రూ.15 వేల కోట్లను ప్రస్తుత ఆర్థిక సంవత్సరంలోనే విడుదల కానున్నాయి. ఇప్పటికే టెండర్ల ప్రక్రియను సిఆర్డిఏ ప్రారంభించింది.
ప్రపంచబ్యాంకు, ఏడీబీల నుంచి మంజూరైన రుణం విడుదల కోసం కావాల్సిన ప్రక్రియను ఇప్పటికే ప్రారంభించారు. ప్రపంచబ్యాంకు బృందం మూడు నాలుగు దఫాలుగా రాజధానిలో పర్యటించింది. ఢిల్లీలో కేంద్ర ఆర్థికశాఖ, ప్రపంచబ్యాంకు, సీఆర్డీఏ అధికారులతో కీలక సమావేశం గురువారం జరగనుంది. నవంబరు 8న తుది సమావేశం జరగనుంది. నవంబర్ 15 నాటికి ఒప్పందాలు పూర్తవుతాయి. ఈ ప్రక్రియ పూర్తయితే రూ.15 వేల కోట్లు మంజూరైనట్టేనని అధికారులు చెబుతున్నారు. రుణం మంజూరుపై ఒప్పందం కుదిరిన వెంటనే మొత్తం రుణంలో 25 శాతంగా… రూ.3,750 కోట్లు అడ్వాన్స్ రూపంలో అందనుంది. డిసెంబర్ నాటికి ఈ నిధులు అందుతాయని అంచనా వేస్తున్నారు. అక్టోబర్ , నవంబర్ లో టెండర్ల ప్రక్రియ, ఇతర పనులు పూర్తి చేసి పనులు డిసెంబర్ మొదటి వారంలోనే ప్రారంభమయ్యేలా చూడనున్నారు. బడా నిర్మాణ సంస్థల్ని రంగంలోకి దింపి.. అన్ని పనుల్ని ఏకకాలంలో జరిగేలా చేసేందుకు ప్రయత్నిస్తున్నారు. సమాంతరంగా కేంద్ర ప్రభుత్వ భవనాలు, ఇతర ప్రైవేటు సంస్థల పెట్టుబడులు వచ్చేలా చూడనున్నారు. దీంతో 2019లో టీడీపీ ఓడిపోయే ముందు అక్కడ ఇరవై నాలుగు గంటలూ జరుగుతున్న పనుల్లాగా.. వచ్చే డిసెంబర్ తర్వాత అమరావతి వెలిగిపోయే అవకాశాలున్నాయి.
