జగన్ ప్రభుత్వం హయాంలో ఏపీలో అనుసరించిన విధానాలు, వైసీపీ విధ్వంస పాలన రాష్ట్రాన్ని ఆర్థికంగా ఎంతగా వెనక్కి నెట్టాయో ప్రపంచ బ్యాంకు బృందం తాజాగా వెల్లడించింది. 2014-19 మధ్య ప్రతిపక్ష నేతగా, 2019-24 నడుమ ముఖ్యమంత్రిగా జగన్ అనుసరించిన విధ్వంసక విధానాల ప్రభావం ప్రపంచ బ్యాంకుపై గట్టిగానే పడింది. అమరావతిపై వైసీపీ చేసిన కుట్రలను మరోసారి ప్రపంచ బ్యాంకు ప్రతినిధులు గుర్తు చేసుకున్నారు. రాష్ట్రంలో పెట్టుబడులకు, అభివృద్ధి కార్యక్రమాలకూ నిధులిచ్చేందుకు సానుకూలంగా ఉన్నప్పటికీ.. వైసీపీ నుంచి తమకు తీవ్రమైన చేదు అనుభవాలు ఎదురయ్యాయని వరల్డ్‌ బ్యాంకు బృందం స్పష్టం చేసింది.
గడిచిన పదేళ్ల కాలంలో రాజధాని అమరావతి నిర్మాణానికి ప్రపంచ బ్యాంకు నుంచి నిధులు సిద్ధమైన కీలక తరుణంలో ఊహించని పరిణామాలు చోటుచేసుకున్నాయని ఆ బృందం గుర్తుచేసింది. కేవలం రాష్ట్రం నుంచే కాకుండా అమెరికా, ఇంగ్లండ్‌ తదితర విదేశాల నుంచి కూడా తమకు వరుసగా ఈ-మెయిల్‌ సందేశాలు వచ్చాయని తెలిపింది. ప్రభుత్వం తీసుకునే అప్పులను తిరిగి తీర్చలేని దుస్థితి రాష్ట్రంలో నెలకొంటుందంటూ హెచ్చరికలతో కూడిన మెయిళ్లు ఏకంగా వైసీపీ వర్గాల నుంచే తమకు అందాయని ప్రపంచ బ్యాంకు బృందం వెల్లడించింది.
ఈ పరిణామాల కారణంగానే ఆంధ్రప్రదేశ్‌కు రుణాలు మంజూరు చేయాలంటే గతంలో తీవ్రంగా ఆలోచించాల్సిన పరిస్థితి వచ్చిందని ప్రపంచ బ్యాంకు ప్రతినిధులు కుండబద్దలు కొట్టారు. రాష్ట్ర ఆర్థిక వ్యవస్థను దెబ్బతీసేలా జరిగిన ఈ ఘటనలు అంతర్జాతీయ సంస్థలనూ ఆందోళనకు గురిచేశాయని స్పష్టమైంది. అయితే, ప్రస్తుత సమావేశంలో రాష్ట్ర ఆర్థిక శాఖ స్పందిస్తూ.. గతంలో పరిస్థితులు వేరని, ఇప్పుడా దుస్థితి లేదని, రాష్ట్రంలో ఆర్థిక క్రమశిక్షణతో కూడిన పాలన సాగుతోందని వివరణ ఇచ్చింది.
ప్రస్తుత మార్పులను గమనించిన ప్రపంచ బ్యాంకు బృందం..ఆంధ్రప్రదేశ్‌ సమగ్ర అభివృద్ధికి, పునర్నిర్మాణానికి మళ్లీ సహకరించేందుకు సిద్ధంగానే ఉన్నామని సానుకూలత వ్యక్తం చేసింది. గత పాలకుల అరాచకాలు, రాజకీయ కక్షసాధింపు చర్యలు ఏకంగా రాష్ట్రానికి రావాల్సిన అంతర్జాతీయ నిధులను కూడా ఏ విధంగా అడ్డుకున్నాయనేదానికి ఈ ఉదంతం ఒక నిదర్శనంగా నిలిచింది.
