అమ్మోరు తల్లి (రివ్యూ)

తమిళనాడులో స్టార్ డమ్ సంపాదించుకున్న నయనతార పౌరాణిక పాత్రలకు కూడా చక్కగా సరిపోతుంది. సౌందర్య, రమ్య కృష్ణల తరహాలో ఇలాంటి పాత్రలు చేయాల్సి వస్తే ఎవరైనా నయనతార వైపే మొగ్గుచూపుతారు. నయనతార ‘అమ్మోరు తల్లి’గా నటించిన చిత్రం ఈరోజు డిస్నీప్లస్ హాట్ స్టార్ లో విడుదలైంది. ఆర్జే బాలాజీ ఇందులో ఓ కీలకపాత్ర పోషించడమే కాకుండా దర్శకత్వంలోనూ భాగం పంచుకున్నారు. ఈ సినిమా రివ్యూ చూద్దాం.

కథలోకి వెళితే..

అది కాశీబుగ్గ ఆకుల పల్లి అనే ఊరు. ఆ ఊరిలో ఓ టీవీ ఛానెల్ రిపోర్టర్ రామస్వామి (ఆర్జే బాలాజీ). ఇంటి బాధ్యత అంతా అతనిదే. అమ్మ, తాతయ్యలతో పాటు ముగ్గురు చెల్లెళ్ల బాధ్యత కూడా అతనిదే. పేద కుటుంబం. అంతమందిని పోషించాలి. ఉన్నది చిరుద్యోగమే. ఆ ఊరిలో ఓ దొంగబాబా కూడా ఉంటాడు. అతని పేరు భగవతి బాబా (అజయ్ ఘోష్). ఎక్కడ భూమి ఉన్నా అతని కన్ను పడితీరుతుంది. దాదాపు 11 వేల ఎకరాల భూమి అతని ఆక్రమణలోనే ఉంటుంది.

ఆ భూమిలో రియల్ ఎస్టేట్ వ్యాపారం చేయాలనేది ఆ బాబా ప్లాన్. ఈ నేపథ్యంలోనే రామస్వామి తన మొక్కు చెల్లించుకునేందుకు కుటుంబంతో కలసి తమ కులదేవత గుడికి వస్తారు. అక్కడ అతనికి అమ్మోరు (నయనతార) ప్రత్యక్ష మవుతుంది. ఆమెను ముక్కపుడక అమ్మోరు అంటారు. ఆ దేవత మన రామస్వామిపై ఓ బాధ్యత పెడుతుంది. దాన్ని నెరవేర్చడంలో అతను ఎలాంటి ఇబ్బందులను ఎదుర్కొన్నాడు? దానికి అమ్మోరు ఎలా సహకరించింది అనేదే ఈ కథ.

ఎలా తీశారు? ఎలా చేశారు?

ఈ తరహా పాత్రలను చేయడం నయనతారకు కొట్టినపిండే. అచ్చు అమ్మోరులానే చక్కటి నిండుతనంతో కనిపించింది. అయితే ఇది నటనకు అవకాశం ఉన్న పాత్ర కాదు. సరదాగా, సాఫీగా సాగిపోయే పాత్ర. ఇక ఆర్జే బాలాజీ విషయానికి వస్తే తను రేడియో జాకీ కాబట్టి ఎలాంటి పాత్రనైనా అవలీలగా చేసేయగలనన్న ఓవర్ కాన్షిడెన్స్ ఉన్నట్టుంది. కొన్ని కొన్ని సన్నివేశాల్లో అతిగా అనిపిస్తుంది.

నటి ఊర్వశి కామెడీ బాగుంది. సినిమా చూసే వారికి ఇది కాస్త రిలీఫ్ కలిగిస్తుంది. విలన్ నటనలోనూ ఏదో లోటు కనిపించింది. డబ్బింగ్ పరంగా అలాంటి లోటు ఉంది. వాయిస్ విషయంలో ఇంకాస్త జాగ్రత్త తీసుకుని ఉంటే బాగుండేది. ఇది సోషియో ఫాంటసీ కథ కాబట్టి వినోదం పాళ్లు ఎక్కువే ఉంది. ఈ సినిమాకు ఇద్దరు దర్శకులు కావడం వల్లనేమో ఒకే తరహాలో సినిమా ముందుకు వెళుతున్నట్టు అనిపించదు.

అమీర్ ఖాన్ పీకే కొందామని ఆర్జే బాలాజీ ఎందుకు కొందామని అనుకున్నారోగానీ ఈ సినిమా ద్వారా కూడా ఆయన పీకిందేమీ లేదు. సినిమా పబ్లిసిటీ చూసి ఏదేదో ఉందనుకుని ఊహించుకుని చూస్తే మాత్రం నిరాశ తప్పదు. ఎలాంటి అంచనాలు లేకుండా కాలక్షేపానికి చూద్దాం అనుకుంటే మాత్రం చూడొచ్చు.

నటీనటులు: నయనతార, ఆర్‌.జె.బాలాజీ, ఊర్వశి, స్మృతి వెంకట్‌, మధు, అభినయ, అజయ్‌ ఘోష్‌, తిరునవక్కరసు, మౌళి తదితరులు.
సంగీతం: గిరీష్‌ గోపాలకృష్ణన్‌, కెమెరా: దినేష్ కృష్ణన్, ఎడిటర్: సెల్వ ఆర్.కె., కథ-కథనం: ఆర్జే బాలాజీ అండ్ ఫ్రెండ్స్,
నిర్మాణం: కె. గణేష్
దర్శకత్వం: ఆర్జే బాలాజీ, ఎన్.ఎస్. శరవణన్
విడుదల తేదీ: 14-11-2020
వేదిక: డిస్నీప్లస్ హాట్ స్టార్
ఒక్కమాటలో: కాలక్షేపం కోసమే
రేటింగ్: 2.5/5

– హేమసుందర్ పామర్తి