సినిమా రంగంలో మరో వారసుడు వచ్చేశాడు. ఎందరినో సినిమా నటులను తీర్చిదిద్దిన దేవదాస్ కనకాల వారసుడిగా రాజీవ్ కనకాల వచ్చిన సంగతి తెలిసిందే. ఇప్పుడు రాజీవ్ కనకాల వారసుడిగా అతని కుమారుడు రోషన్ కార్తీక్ హీరోగా అడుగుపెడుతున్నాడు. ఒక విధంగా యాంకర్ సుమకు కూడా వారసుడే అనుకోవాలి. ఆమె కూడా నటిగానే అడుగుపెట్టి బిజీ యాంకర్ గా మారింది. రోషన్ కార్తీక్ హీరోగా ఓ సినిమా ఈరోజు ప్రారంభమైంది. ఈ విషయాన్ని రాజీవ్ కనకాల తన ట్విట్టర్ ద్వారా షేర్ చేశారు.
జెబి ఎంటర్టైన్మెంట్స్ బ్యానర్పై కొత్త దర్శకుడు విజయ్ దర్శకత్వంలో ఈ సినిమా రూపొందుతోంది. తమ కుమారుడు హీరో అవుతున్నందుకు తామెంతో ఆనందంగా ఉన్నామని ఈ దంపతులు తెలిపారు. ‘మా అబ్బాయి రోషన్ కార్తీక్ని హీరోగా మీ ముందుకు తీసుకువస్తున్నాం. దీనికి మేం ఎంతో సంతోషంగా ఉన్నాం. మీ ఆశీస్సులు మా అబ్బాయికి ఇవ్వండి’ అని సుమ, రాజీవ్ కనకాల తెలిపారు. ఈ సినిమాకి సంబంధించిన మరిన్ని విషయాలను త్వరలోనే తెలియజేస్తామని అన్నారు.
