బిగ్ బాస్ షో పై ఏపీ హై కోర్టు కీలక వ్యాఖ్యలు చేసింది. రియాలిటీ షో పేరుతో ఏది పడితే అది చూపిస్తాం అంటే కుదరదని, తాము కళ్లు మూసుకుని కూర్చోలేమని రాష్ట్ర అత్యున్నత న్యాయస్థానం తేల్చి చెప్పింది.హింసను ప్రేరేపించే అంశాలను ప్రోత్సహిస్తూ దానిని సంస్కృతి అని ఎలా అంటారని కోర్టు ప్రశ్నించింది.
తెలుగు యువశక్తి అధ్యక్షుడు, సినీ దర్శక నిర్మాత అయిన కేతిరెడ్డి జగదీశ్వర్రెడ్డి బిగ్బాస్ షో అసభ్యతను, అశ్లీలతను ప్రోత్సహించేలా ఉందని పేర్కొంటూ గతంలో హైకోర్టులో పిల్ వేశారు.కాగా, ఈ వ్యాజ్యాన్ని అత్యవసరంగా విచారించాలని కోరుతూ ఆయన తరపు న్యాయవాది గుండాల శివప్రసాద్రెడ్డి ఇటీవల కోర్టును అభ్యర్థించారు. దీంతో కోర్టు ఈ కేసు విచారణకు స్వీకరించింది.
ఇక ఈ కేసు పై విచారణ జరిపిన జస్టిస్ అసనుద్దీన్ అమానుల్లా, జస్టిస్ ఎస్.సుబ్బారెడ్డితో కూడిన ధర్మాసనం పిటిషనర్ సరైన కారణంతోనే పిల్ వేశారని అభిప్రాయపడింది.ఇదే అంశంపై సెంట్రల్ బోర్డ్ ఆఫ్ ఫిలిం సర్టిఫికేషన్ తరఫున సీనియర్ న్యాయవాది సీవీ మోహన్ రెడ్డి తన వాదనలు వినిపిస్తూ.. పిటిషనర్ ఇలాంటి వ్యాజ్యాన్నే తెలంగాణ హైకోర్టులో వేసి ఉపసంహరించుకున్నారని కోర్టుకు తెలిపారు. అదేసమయంలో రియాలిటీ షోల నిర్వహణకు విధివిధానాలు ఉంటాయని ఆయన తన వాదనలో పేర్కొన్నారు. వివిధ సంస్కృతుల ఆధారంగా షోలు ఉంటాయని కోర్టుకు తెలిపారు.
అయితే మోహన్ రెడ్డి వాదనలను న్యాయస్థానం తప్పుబట్టింది. హింసను ప్రోత్సహించడం సంస్కృతి ఎలా అవుతుందని ధర్మాసనం నిలదీసింది.ఇదే క్రమంలో న్యాయవాది సివి మోహన్ రెడ్డి తన వాదనలు కొనసాగిస్తూ, 2019లో ఈ వ్యాజ్యం దాఖలైనట్టు కోర్టు దృష్టికి తీసుకెళ్లారు. దీనిపై అత్యవసర విచారణ జరపాలని ప్రధాన న్యాయమూర్తి నేతృతంలోని బెంచ్ను పిటిషనర్ తరపు న్యాయవాది కోరారని, అయితే అందుకు అనుమతి రాలేదని అన్నారు. పిటిషనర్ ఈ విషయాన్ని ఇన్చార్జ్ కోర్టుకు చెప్పకుండా విచారణకు అనుమతి పొందారని ఆయన ధర్మాసనానికి తెలిపారు.
ఇక ఈ వ్యాజ్యాలపై విచారణ జరపాలని సీజే నేతృత్వంలోని బెంచ్ను కోరడం నిజమేనని పిటిషనర్ తరపు న్యాయవాది అంగీకరించారు. అలా కోరే హక్కు పిటిషనర్కు ఉందని ఆయన తెలిపారు.అయితే ఈ విషయం పై స్పందించిన న్యాయస్థానం ఆ అంశాన్ని ఎందుకు దాచారని ప్రశ్నించింది.అదేసమయంలో ప్రతీ ఒక్కరూ కోర్టులో నిజాయతీగా వ్యవహరించాలని సూచించింది. కాగా, ఈ వ్యాజ్యంపై అత్యవసర విచారణ అవసరమని భావిస్తే ప్రధాన న్యాయమూర్తి నేతృత్వంలోని బెంచ్ ఎదుట అభ్యర్థించేందుకు పిటిషనర్కు వెసులుబాటు కల్పిస్తున్నట్టు చెప్పిన న్యాయస్థానం ఈ వ్యాజ్యాన్ని విచారణ నుంచి తొలగిస్తున్నట్టు ప్రకటించింది.
