(విశాఖపట్నం నుంచి లియో న్యూస్ ప్రతినిధి)
దీపావళి పండుగపై అనేక ఆంక్షలు ప్రభుత్వం విధించింది. దీంతో లక్షలాది రూపాయల పెట్టుబడితో వ్యాపారం చేసే వర్తకులు ఆందోళన మొదలైంది. మరోవైపు వాతావరణం కూడా అనుకూలించకపోవడంతో నష్టాల ఊబిలో కూరుకు పోతామని భయం వ్యక్తం చేస్తున్నారు. ఈసారి దాదాపుగా విశాఖలో సగానికి పైగా దుకాణాలు తగ్గిపోతున్నాయి. ఈ ఏడాది బాణసంచా విక్రయాలు నిలిపివేయాలని ఇప్పటికే గోపాలపట్నం, ఎన్ఏడి, సింహాచలం, కంచర పాలెం ప్రాంతాలకు చెందిన వర్తకులు గురువారం నిర్ణయం తీసుకున్నారు. ఇందుకు అనేక కారణాలు దోహదపడుతున్నాయి.
గ్రీన్ క్రాకర్స్ మాత్రమే విక్రయించాలని ప్రభుత్వం ఆంక్షలు విధిస్తూ జీవో జారీ చేసింది. అసలు గ్రీన్ క్రాకర్స్ అంటే ఏంటో అనేక మంది వర్తకులకు సైతం తెలియక పోవడం గమనార్హం. ఢిల్లీ లాంటి కాలుష్యకారక నగరాల్లో ఎన్నో ఏళ్లుగా గ్రీన్ క్రాకర్స్ వినియోగం, తయారీ ఉంది. సాధారణ క్రాకర్స్ తో పోలిస్తే వాటి ధర కూడా ఎక్కువే. అటు వంటి నగరాల్లో ప్రత్యామ్నాయం లేదు కనుక గ్రీన్ క్రాకర్స్ వినియోగిస్తూ వస్తున్నారు. అదే విశాఖ లాంటి నగరాల్లో ఇప్పటివరకు గ్రీన్ క్రాకర్స్ వినియోగం జరగలేదు. దీంతో వర్తకులు సరుకు కొనుగోలుకు వెనుకడుగు వేశారు. ఇప్పటికీ లక్షలాది రూపాయలు సరుకు కొనుగోలు చేసిన వర్తకులు ఆందోళనలో ఉన్నారు.
కొత్తగా అనుమతులు..
విశాఖలో ప్రతి ఏటా మాదిరిగానే ఈ ఏడాది కూడా వర్తకులు బాణసంచా విక్రయాల కోసం ఇరవై రోజుల క్రితమే దరఖాస్తు చేసుకున్నారు. సుమారు 550 దుకాణాలు ఏర్పాటు చేసి, నగర పరిధిలో ప్రతియేటా మందుగుండు సామగ్రిని విక్రయిస్తుంటారు. పొల్యూషన్ కంట్రోల్ బోర్డు, పోలీసు, అగ్నిమాపక శాఖ, ఎలక్ట్రికల్ వైరింగ్, జీవీఎంసీ శాఖల నుంచి అనుమతి పత్రాలు తీసుకోవాల్సి ఉంటుంది. ఆయా శాఖలకు చలానాలు కూడా చెల్లించాల్సి ఉంటుంది. ఈ ప్రక్రియ అంతా పూర్తి చేసిన తరువాత తాజాగా బుధవారం రాత్రి పోలీసు అధికారులు, వర్తకులకు పిడుగులాంటి వార్త చెప్పారు.
అనుమతుల కోసం మరోమారు దరఖాస్తు చేసుకోవాలని నిబంధనల్లో అనేక మార్పులు చేస్తున్నామని చెప్పుకొచ్చారు. ఇప్పటికిప్పుడు మళ్లీ దరఖాస్తు చేయడం, అనుమతులు తెచ్చుకోవడం, సరుకు కొనుగోలు చేయడం, స్టాల్స్ నిర్మించడం ఇవన్నీ రెండు రోజుల్లో జరిగే పని కాదని ఒక నిర్ణయానికి వచ్చిన వర్తకులు అంతా సమావేశమై విక్రయాలకు స్వస్తి పలికారు. ఈ ప్రాంతాలకు చెందిన సుమారు 150 దుకాణాలు ఈ ఏడాది లేనట్టే. పోలీసు శాఖ రాత్రికి రాత్రి సింగిల్ విండో విధానంలో వీరికి అనుమతులు ఇస్తే తప్ప బాణాసంచా విక్రయాలు ఈ ప్రాంతాల్లో ఉండే అవకాశం లేదు.
