శిఖరానికి చేరుకోవటం కష్టమే. కానీ.. దాన్ని సాధించిన తర్వాత అసలు తిప్పలు మొదలవుతాయి. శిఖరానికి చేరుకోవటానికి పడిన శ్రమ కంటే కూడా అక్కడే ఉండటానికి అంతకు మించి కష్టపడాల్సి ఉంటుంది. ఇలాంటప్పుడు ఎదురయ్యే అవరోధాలతో పాటు.. అప్పటి వరకు అనుకూలంగా ఉండే కాలం ఏ మాత్రం తేడా కొట్టినా.. కిరీటం చేజారినట్లే. అందుకే అత్యున్నత స్థానానికి చేరిన నాటి నుంచి దాని నుంచి ఏదో రోజు వైదొలగాల్సి వస్తుందన్న వాస్తవిక ఆలోచన అనవసర తప్పులకు అవకాశం ఇవ్వదు.
చేయకూడని తప్పులు
అయితే.. చాలామంది ఈ విషయంలో తప్పుల మీద తప్పులు చేస్తారు. ఉన్నత స్థానానికి చేరుకోగానే అప్పటి వరకు ఉన్న ఆత్మవిశ్వాసం కాస్తా.. ఓవర్ కాన్ఫిడెన్స్గా మారుతుంది. ఇలాంటి వేళలోనే చేయకూడని తప్పులు జరుగుతాయి. దుబ్బాక ఉప ఎన్నిక సందర్భంగా మంత్రి హరీశ్ కూడా ఇలాంటి తప్పులే చేశారు. ఎన్నికల ప్రచారం సందర్భంగా తనకు ఓటమి అన్నది లేదని.. తాను ఎరగనని.. హరీశ్ అన్నోడు రంగంలోకి దిగితే ఎదురు ఉండదంటూ గొప్పలు చెప్పేసుకున్నారు. చుట్టూ ఉన్న అభిమానగణం ఇలాంటి మాటలకు చప్పట్లతో ఉత్సాహ పరిచేస్తుంటారు.
కానీ.. వీటిని వినే వారి స్పందనలు ఏమిటన్నది తర్వాత రోజుల్లో కీలకంగా మారతుంది. తన మేనమామ తనకు టాస్కులు ఇస్తే చాలు.. దాన్ని సాధించుకు రావటం అలవాటున్న హరీశ్కు దుబ్బాకలో భారీ ఎదురు దెబ్బ తగిలింది. ఇప్పటి వరకు ఆయనకున్న ట్రబుల్ షూటర్.. టాస్క్ మాస్టర్ లాంటి విలువైన టైటిళ్లకు దుబ్బాక దెబ్బేసిందనే చెప్పాలి. దీనికి కారణం హరీశ్ మాటలు.. చేతలేనని చెబుతున్నారు.
మితి మీరిన ఆత్మవిశ్వాసం
ఎంత అధికారం చేతిలో ఉంటే మాత్రం.. మితి మీరిన ఆత్మవిశ్వాసం పనికి రాదన్న ప్రాధమిక సూత్రాన్ని మర్చిపోవటంతో పాటు తాను తలుచుకుంటే ఏమైనా చేయొచ్చన్న ధోరణి కూడా తప్పులు చేసేలా చేసిందని చెప్పాలి. ఇదే.. ఈ రోజున గులాబీ పార్టీలో హరీశ్ కున్న విలక్షణత మీద ప్రభావం చూపేలా చేసిందని చెప్పక తప్పదు. ఎంతలో ఎంత తేడా కొట్టేసింది. ఇప్పటి వరకు ఇచ్చిన టాస్కుల్ని తాను పూర్తి చేశానని.. అది తన ట్రాక్ రికార్డు అని గొప్పలు చెప్పుకున్న హరీశ్.. ఇకపై ఆయనకు అలాంటి అవకాశం లేకుండా చేసింది దుబ్బాక.
