‘సన్నాఫ్ ఇండియా’ హీరో మోహన్ బాబు ‘కుండబద్దలు’ సుబ్బారావును ‘నన్నాఫ్ యువర్ బిజినెస్’ అంటారేమో! ఒకప్పుడు ‘ఎన్ కౌంటర్’ ఎడిటర్ పింగళి దశరథరామ్ తన పదునైన రాతలతో నేతల గుండెల్లో రైళ్లు పరుగెత్తించే వారు.. ఇప్పుడు అంతకంటే పదునైన మాటలతో ‘కుండబద్దలు’ సుబ్బారావు దుమ్ముదులిపేస్తుంటే ఎవరికైనా దిమ్మతిరగక మానదు.
సినీ నటుడు మోహన్ బాబును ‘నువ్వు మనిషివా.. మోహన్ బాబువా’ అంటూ మరోసారి ‘కుండబద్దలు’ కొట్టేశారు. ఆయన అంతగా బద్దలు కొట్టి సుద్దులు చెప్పడానికి మోహన్ బాబు స్థాపించిన శ్రీవిద్యా నికేతన్ లో జరుగుతున్న తంతే కారణం. ఇటీవల కాలంలో ఈ సంస్థపై ఆరోపణలు వెల్లువెత్తుతున్నాయి. వార్తలు సోషల్ మీడియాలో వైరల్ అవుతున్నాయి. ఆ సంస్థ నిర్లక్ష్య వైఖరిని విద్యార్థులు, వారి తల్లిదండ్రులు ఎండగడుతున్నారు. సీక్రెట్ గా వీడియోలు తీసి యూట్యూబ్ లో పోస్టు చేస్తున్నారు. విద్యార్థులపై బౌన్సర్లతో దాడులు చేయించడం, మోహన్ బాబు వారిని బండబూతులు తిట్టడం, సెల్ ఫోన్లు నేలకేసి కొట్టడం లాంటి పరిణామాలెన్నో అక్కడ చోటుచేసుకున్నాయి.
తిరుపతి సమీపంలో ఉన్న ఈ సంస్థలో విద్యార్థులు పడుతున్న అవస్థల గురించి సోషల్ మీడియాలో కుప్పలు తెప్పలుగా వీడియోలు వైరల్ అవడంపై కుండబద్దలు సుబ్బారావు స్పందించారు. అనేక మంది ఆ సంస్థలో తమ పిలల్ని చేర్చి ఇబ్బందులు పడుతున్న వైనాన్ని ప్రస్తావించారు. ‘మమ్మల్ని కాపాడండి.. మమ్మల్ని రక్షించండి.. అంటూ ఆర్తనాదాలు చేస్తున్నారు. బౌన్సర్లు మమ్మల్ని కొడుతున్నారు.. మా ఫోన్లు పగులగొడుతున్నారు. మోహన్ బాబు బండ బూతులు తిడుతున్నారు. మా రిజల్ట్స్ ఇవ్వరు.. పరీక్షలు వాయిదా వేయరు అంటూ విద్యార్థులు రహస్యంగా వీడియోలు పెడుతున్నారు’ అని వివరించారు. ఆ సంస్థ హాస్టల్ లో 150 మంది విద్యార్థుల దాకా కోవిడ్ వచ్చినా పట్టించుకోకపోవడం, విద్యార్థులపై దాడులు లాంటి పరిణామాలపై తనదైన రీతిలో కాటా సుబ్బారావు స్పందించారు.
కొడాలి నానీని మించి అట..
‘మోహన్ బాబు అనే ప్లేసులో ఆయన ఏ పదం పెట్టుకుంటారో ఆయనే చూసుకోవాలి. గత ప్రభుత్వంలో ఫీజు రియింబర్స్ బాకీలు లేకపోయినప్పటికీ కూడా నేను చెబుతున్నాను.. వారికి న్యాయం చేయండి అంటూ రోడ్డు పై పడుకుని పోజులు కొట్టిన మోహన్ బాబు ఈ ప్రభుత్వంలో ఫీజు రీయింబర్స్ మెంటు లేదు.. వాడి తలకాయ లేదు. ఎంతగా వేధిస్తున్నాకేవలం ఆ విద్యార్థుల్ని ఫీజుల కోసమో, ప్రభుత్వం మద్దతు కోసమో బౌన్సర్లతో వారిపై దౌర్జన్యాలు చేయడం, వారి సెల్ ఫోన్లు పగులగొట్టడం, నోరుంది కదా అని బండబూతులు తిట్టడం ఏమిటి?’ అని పశ్నించారు.
పైగా బండబూతులు తిట్టడంలో మనకిప్పుడు కొడాలి నాని ఫ్యామస్ గానీ సినిమాల్లో పనిచేసే వాళ్ల మాటల ప్రకారం చూస్తే మోహన్ బాబు ముందు కొడాలి నాని ఎందుకూ పనికి రాడంటూ తేల్చిపారేశారు. మోహన్ బాబు ఆర్టిఫిషియల్ బేస్ వాయిస్ తో కృత్రిమ గొంతుతో అందరినీ బండబూతులు తిట్టడం, తను టైమ్ కు వస్తాడు కనుక తానే గొప్పవాడ్ని అని చెప్పుకోవడం ఆయన నైనజం అన్నారు. తన గురించి ఏదైనా గొప్పలు చెప్పుకోవాలంటే నేనూ ఎన్టీరామారావు గారూ అంటూ అన్నగారిని కలుపుకుని మరీ చెప్పడంలాంటి అతని అసహ్యకరమైన ప్రవర్తన సినిమా ఫీల్డులో పనిచేసేవారికి మాత్రమే తెలుస్తుందంటూ అస్త్రాలు సంధించారు.
విద్యాదానం కాదు విద్యా వ్యాపారమట..
‘శ్రీవిద్యానికేతన్ స్థాపించి విద్యాదానం చేస్తున్ననని చెప్పుకుంటాడుగానీ అతను విద్యావ్యాపారం చేస్తున్నాడు. ఆ డబ్బులతో తన కొడుకులు, కూతురితో చెత్త సినిమాలు తీసి మనల్ని వేధిస్తున్నాడు.అసలు ఈ సంస్థకు పిల్లలు కడుతున్న డబ్బులతో తన పిల్లలతో సినిమాలు తీయించి, వాళ్లని సినిమా పరిశ్రమలోకి వదిలి మనల్ని వేధించడం తప్ప అతను సాధించింది ఏమీ లేదు. పైగా మోహన్ బాబు జీవిత చరిత్ర మొత్తం సినీ పరిశ్రమలో వారికి మాత్రమే తెలుస్తుంది. అప్పట్లో జగన్ మోహన్ రెడ్డి ప్రభుత్వానికి కొమ్ము కాసి అందరిలానే చంద్రబాబుపై తను కూడా ఓ రాయి వేసే ప్రయత్నం చేశాడు.
మనిషివా మోహన్ బాబువా అనే డైలాగ్ విద్యార్థులు కనిపెట్టింది కాదు.. ఆంధ్రప్రదేశ్ లో చాలా మంది నువ్వు మనిషివా మోహన్ బాబువా అని ఎప్పట్నుంచో అంటూ ఉంటారు. ఒక విద్యా సంస్థను ఎందుకింత దారుణమైన స్థితికి తీసుకొచ్చాడు. విద్యార్థుల భవిష్యత్తుతో ఆటలాడుకునే హక్కు మోహన్ బాబుకు ఎవరిచ్చారు?’ అని ప్రశ్నించారు. ‘నీకూ ముగ్గురు పిల్లలున్నారు.. నీ పిల్లల భవిష్యత్తుకోసం ఆంధ్ర ప్రదేశ్ లోని పిల్లల భవిష్యత్తులో ఆటలాడుకుంటారా? ఇది ఎంతవరకు సమంజసం మోహన్ బాబు గారూ. మీరు టీచర్ గా ప్రస్థానం ప్రారంభించారు. ఆ తర్వాత అసిస్టెంట్ డైరెక్టర్, ఆ తర్వాత నటుడు ఎలా అయ్యారు? ఎవరి ప్రోత్సాహంతో అయ్యారు. ఎవరి ప్రాపకంతో అయ్యారు అనేది సినిమా పరిశ్రమలో ఉన్నవారికి మాత్రమే తెలుస్తాయి.
మీ నోటి దూల.. మీ నోటి దురద, మీ ఆభిజాత్యం, నేను గొప్పవాడిని అనే దరిద్రపు స్వాభిమానం.. ఇవన్నీ మీలో మూర్తీభవించినటువంటి మనిషికి ఉండకూడనటువంటి దుర్లక్షణాలు అనేది ఆంధ్రప్రదేశ్ ప్రజలకు తెలియదు. మీ సంగతి సినీ పరిశ్రమలో తప్ప బయటికి వారికి తెలియదు అని ఇలా ప్రవర్తిస్తున్నారా? లేకపోతే వృద్ధాప్యంలో మీకేమైనా మతి భ్రమించిందా? నోరుంది కదా అని మీ సహజ ధోరణిలో పిల్లల్ని బూతులు తిడితే ఎలాగండీ.. మీ పిల్లల్ని మీరెలా ముద్దుగా చూసుకుంటారో అందరి పిల్లల్నీ వారి తల్లిదండ్రులు అలాగే చూసుకుంటూ వారు కష్టపడి సంపాదించిన సొమ్మంతా మీకు కట్టి మీ కాలేజీకి పిల్లల్ని పంపిస్తే ఇలా చేస్తారా?’ ఘాటైన పదజాలాలతో విరుచుకు పడ్డారు కుండబద్ధలు సుబ్బారావు.
అసలిలాంటి కాలేజీ నడపకపోతే ఏంపోయింది మీకు. సినిమాలు తీసి మా మీదకు వదులుతూనే ఉన్నారు. అవి చూడలేక మేం చచ్చిపోతున్నాం. కాలేజీ ఛైర్మన్ గా ఎంతటి పెద్ద మనిషి తనంతో ఉండాలి? ఎలాంటి భాష మాట్లాడాలి.. మిమ్మల్ని చూసి రేపు ఆ విద్యార్థులు రేపు ఏం నేర్చుకోవాలి. బండబూతులు నేర్పడమే శ్రీవిద్యా? ఇంత మంచి పేరు మీ సంస్థకు పెట్టుకుని మీరు విద్యార్థులకు నేర్పల్సింది విద్యా? బూతులా? మీరు రాజ్యసభకు వెళ్లినప్పుడే పెద్ద సెటైర్లు వచ్చాయి. మీ భాషను అక్కడ వాడితే ఆ బాషను చూసి 13 భాషలు తెలిసిన ప్రధాని పీవీ నరసింహారావు కూడా ఇదేదో కొత్త భాష అనుకుని ఆయన కూడా అది నేర్చుకుంటారేమోనని అప్పట్లో ఓ సటైర్ కూడా ఉండేదని గుర్తుచేశారు. కుండబద్దలు సుబ్బారావు తనపై ఇలా స్పందిస్తారని బహుశా మోహన్ బాబు కూడా ఊహించి ఉండరు. మరి దీనిపై ఆయన ఏవిధంగా ప్రతిస్పందిస్తారో చూడాలి.
