విజయ్ ‘మాస్టర్’ (రివ్యూ)

దళపతి విజయ్, విజయ్ సేతుపతి, దర్శకుడు లోకేష్ కనకరాజ్.. ఈ కాంబినేషన్ లో సినిమా అంటేనే భారీ అంచనాలు ఎవరికైనా ఉంటాయి. మరి ఆ అంచనాలను నిజం చేయడంలో ‘మాస్టర్’  ఏమేరకు సఫలీకృతమైంది? అనేది కీలక అంశం. లాక్ డౌన్ తర్వాత విడుదలైన భారీ చిత్రం ఏదైనా ఉందంటే అది మాస్టర్ అనే చెప్పాలి. నాలుగు భాషల్లో ఈ చిత్రం విడుదలైంది. విజయ్ బంధువు జేవియర్ బ్రిట్టో, మేనేజర్ జగదీష్ ఈ చిత్రాన్ని నిర్మించారు. ఈ సినిమా ఎలా ఉందో చూద్దాం.

కథలోకి వెళితే..

ఈ సినిమాకి విలనే కథ. అందుకే విలన్ తోనే కథ మొదలవుతుంది. వరంగల్ లో భవానీ(విజయ్ సేతుపతి) తండ్రిని ముగ్గురు ప్రత్యర్థులు చంపేస్తారు. భవానీని కూడా చంపబోతే ప్రాణాలతో వదిలెయ్ మని వేడుకుంటాడు. నేరాన్ని తనపై వేసుకుని బాలనేరస్థుల కారాగారానికి వెళతాడు. అక్కడ అతను రాటు దేలతాడు. ఆ జైలులో పిల్లల్ని చేరదేసి తన నాయకత్వంలో నేరాలు మొదలు పెడతాడు. అలా వరంగల్ లో లారీల సామ్రాజ్యానికి అధిపతి అవుతాడు. ఆ జైలును తన నేరాలకు అడ్డాగా ఉపయోగించుకుంటాడు. జైలులో పిల్లలను మత్తు పదార్థాలకు బానిసలను చేసి తను చేసిన నేరాలను వారిపైకి నెట్టి అరాచకాలను సాగిస్తుంటాడు.

లారీ ఓనర్స్ అసోసియేషన్ ఎన్నికల్లో గెలవడానికి ప్రత్యర్థును మట్టుబెడుతుంటాడు. ఇలాంటి భవానీని జేడీ (విజయ్) అనే ఓ మాస్టర్ ఎదుర్కోవడమే క్లుప్తంగా కథ. ఇక జేడీ విషయానికి వస్తే అతను ఓ లెక్చరర్. మద్యానికి బానిస. స్టూడెంట్స్ వెల్ఫేర్ కోసం పోరాడుతుండటంతో విద్యార్థులంతా అతనికి వత్తాసు పలుకుతుంటారు. అలా కాలేజీలో అతను సస్పెండ్ అయినా కమిటీ అతని మీద చర్యలు తీసుకోలేకపోతుంది. కాలేజీ ఎన్నికల సందర్భంగా గొడవలు జరగడంతో దానికి బాధ్యత వహిస్తూ అతను మూడు నెలలు ఉద్యోగం కోల్పోవాల్సి వస్తుంది.

ఆ గ్యాప్ లో అతన్ని వరంగల్ కారాగారానికి మాస్టర్ గా వెళ్లాల్సి వస్తుంది. అక్కడ ఇద్దరు పిల్లల మరణం అతన్ని కలచివేస్తుంది. దాంతో మానసిక పరివర్తన చెంది ఆ జైలులో జరిగే అరాచకాలకు అడ్డుకట్ట వేయడానికి సంకల్పిస్తాడు. ఆ ప్రయత్నాల్లో అతను ఏంచేశాడన్నదే కథ. విజయ్ పనిచేసే కాలేజీలో చారులత పూసర్ల (మాళవిక మోహనన్) అనే లెక్చరర్ విజయ్ కు ఏ విధంగా సహకరించింది? అనేది కూడా ఇందులో ఓ కీలక అంశం.

Must Read ;- విజయ్ ‘మాస్టర్’ సినిమా లైవ్ అప్ డేట్

ఎలా తీశారు? ఎలా చేశారు?

సినిమాలు చేయడం వేరు.. స్టార్ హీరోతో సినిమా చేయడం వేరు. ఈ మాట అక్షరాలా లోకేష్ కనకరాజ్ కు వర్తిస్తుందనే అనుకోవాలి. అతను ఇంతకుముందు చేసిన ‘ఖైదీ’ని ఊహించుకుని ఈ సినిమాకి వెళితే మాత్రం నిరాశే ఎదురవుతుంది. కథనం మాట ఎలా ఉన్నా కథను ఎంచుకోవడంలోనే అతను గందరగోళానికి గురయ్యాడు అనిపిస్తుంది. భవానీ పాత్రను మలిచిన విధానంపై పెట్టిన శ్రద్ధ కథపైనా, కథనంపైనా పెట్టి ఉంటే సినిమా మరోలా ఉండేది. హీరో జేడీ పాత్రను మలిచిన తీరులోనూ ప్రత్యేకత ఏమీ లేదు.

అసలు హీరో, విలన్ లు ఒకరికొకరు తారసపడకుండా దర్శకుడు ఎందుకు సాగదీశాడో అర్థం కాదు. ఒక్క క్లైమాక్స్ లో మాత్రమే ఇద్దరూ ఢీకొంటారు. అంతకుముందు భవానీ అడ్డాలోకి ప్రవేశించి, భవానీకి పట్టుకుని కూడా వెళ్లిపోతాడు. లోకేశ్ పేలవమైన స్క్రీన్ ప్లే  ప్రధానంగా ఈ సినిమాకు మైనస్. విజయ్ బాడీ లాంగ్వేజ్ ను దృష్టిలో ఉంచుకుని పాత్రను మలిచినట్టుంది.  ఫైట్స్ బాగున్నాయి. ముఖ్యంగా ఇంటర్వెల్ ముందు పోలీస్ స్టేషన్ లో జరిగే ఫైట్స్  సినిమా మీద హైప్ పెంచింది.

భవానీ గురించి అక్కడే తెలిసినా విజయ్ వెంటనే రియాక్ట్ కాకపోవడానికి కారణం ఏమిటో తెలియదు. అనిరుధ్ రవిచంద్రన్ బీజీఎం, పాటలు బాగున్నాయి.  హీరోయిన్లు మాళవికా మోహనన్, ఆండ్రియా పాత్రల ప్రయోజనం ఏమిటో అర్థంకాదు. కరోనా తర్వాత వచ్చిన సినిమా కదా.. కాస్త కనికరించి మంచి రేటింగ్ ఇవ్వాలని ఉన్నా సాధ్యమయ్యేలా కనిపించడం లేదు. తమిళంలో ఎలా ఫలితం ఉంటుందో గాానీ తెలుగులో మాత్రం జనం మాస్టర్ ను ఆదరించడం కష్టంగానే చెప్పాలి.

హైలైట్స్: అనిరుధ్ రవిచంద్రన్ బీజీఎం, ట్రైన్ లో ఫైట్, ఇంటర్వెల్ బ్యాంగ్, భవానీ నటన.

నటీనటులు: విజయ్, విజయ్ సేతుపతి, మాళవికా మోహనన్, ఆండ్రియా జెరిమియా, అర్జున్ దాస్, రమ్య సుబ్రమణియన్, ఆంటోనీ వర్గిస్, శంతను భాగ్యరాజ్ తదితరులు
ఎడిటింగ్ : ఫిలోమిన్ రాజ్
కెమెరా: సత్యన్ సూర్యన్
సంగీతం: అనిరుధ్ రవిచంద్రన్,
నిర్మాణం: ఈస్ట్‌కోస్ట్ ప్రొడ‌క్ష‌న్స్ బ్యాన‌ర్‌
దర్శకత్వం: లోకేష్ కనకరాజ్
విడుదల : 13-1-2021

ఒక్క మాటలో:  టార్చర్

రేటింగ్: 2/5

__ హేమసుందర్ పామర్తి