సినిమా తీయడం ఒక ఎత్తు.. దాన్ని విడుదల చేయడం ఇంకో ఎత్తు. ఎందుకు ఈ పరిస్థితి ఏర్పడింది? ఒకప్పుడు ఏ సినిమాకి వెళ్లాలి అని ప్రేక్షకుడు అనుకున్నప్పుడు అతని ముందు చాలా ఆప్షన్లు ఉండేవి.
అది కాకపోతే ఇది.. ఇది కాకపోతే అది అనుకుంటూ ఏదో ఒకటి ఎంచుకునే వాడు. ముఖ్యంగా ఇది పెద్ద హీరో సినిమా విషయంలోనే. ఇప్పుడు ఆ పరిస్థితి లేదు. ఏ థియేటర్లో చూసినా ఒకే హీరో సినిమానే ఉంటోంది. విడుదల కావలసిన పెద్ద సినిమాలు క్యూలో ఉన్నప్పుడు ఎవరు ముందు ఎవరు వెనక అనేది ఇప్పుడు పెద్ద చర్చనీయాంశం. ఒక సినిమా ఫలానా తేదీన వస్తుంది అనుకున్నప్పుడు ఇంకో పెద్ద హీరో సినిమాని వారానికో, రెండు వారాలకో వాయిదా వేసి విడుదల చేసే పరిస్థితి ఉంది. దానికి రకరకాల కారణాలు ఉన్నాయి.
ఒక సినిమా టాక్ ప్రభావం ఇంకో సినిమా మీద పడే ప్రమాదంతో పాటు వ్యాపారపరమైన లావాదేవీలు కూడా ఉన్నాయి. అందువల్ల ఈ రోజుల్లో సినిమా తీయడం ఒక ఎత్తు అయితే ఆ సినిమా అనేక అవాంతరాలు ఎదుర్కొని విడుదల కావడం కూడా మరో ఎత్తు. దీనికి ఎలాంటి కారణాలు ఉన్నాయో పూర్తిగా విశ్లేషిద్దాం.
బాబాయ్, అబ్బాయ్.. ఎవరు ముందు?
సినిమా విడుదల విషయంలో ఎలాంటి సమస్యలున్నాయో గని, భీమ్లానాయక్ సినిమాలనే తీసుకుందాం. కిరణ్ కొర్రపాటి అనే కొత్త దర్శకుడితో వరుణ్ తేజ్ హీరోగా గని చిత్రం రూపొందింది. ఈ సినిమా డిసెంబరులోనే విడుదల కావలసి ఉంది. కానీ పుష్ప సినిమా వల్ల అప్పుడు విడుదల కాలేదు. అసలు అంతకుముందే విడుదల కావలసి ఉన్నా ఇలాంటి కారణాలతోనే వాయిదా పడుతూ వస్తోంది. చివరికి ఈ ఫిబ్రవరి 25న విడుదల చేద్దాం అనుకున్నారు. కానీ భీమ్లానాయక్ అడ్డం వచ్చేశాడు. ఓ పక్క సినిమా టిక్కెట్ల ధరల పెంపు వ్యవహారం నడుస్తోంది. అయినా భీమ్లా నాయక్ టీమ్ ఈ ఫిబ్రవరి 25న వస్తున్నట్లు ప్రకటించింది.
దాంతో గనిని మార్చి 4న విడుదల చేద్దాం అనుకుంటున్నారు. అసలు భీమ్లానాయక్ ఎప్పుడో విడుదలై ఉంటే ప్రభుత్వం సినిమా టిక్కెట్ల ధరను ఎప్పుడో పెంచేదన్న అభిప్రాయం ఉంది. మీరిప్పుడు విడుదల చేస్తే సీఎం తన నిర్ణయాన్ని మార్చుకోవచ్చు.. వాయిదా వేసుకోండి అని భీమ్లానాయక్ నిర్మాతలకు కొందరు నచ్చచెబుతున్నట్లు కూడా సమాచారం. ఒకవేళ భీమ్లానాయక్ విడుదల వాయిదా పడితే 25న గని విడుదలవుతుంది. టిక్కెట్ల రేట్ల పెంపు విషయంలో ప్రభుత్వం ఒక నిర్ణయం తీసుకున్నా జీవో రావడానికి మాత్రం ఈ నెలాఖరుదాకా టైమ్ పడుతుంది.
సినిమా విడుదల కావడానికి ఉన్న సమస్యలేమిటి?
ఒక సినిమా విడుదల కావాలంటే ఐదారుగురి మీద ఆధారపడాలి. ముందు ఆ సినిమాకి బిజినెస్ జరగాలి. బయ్యర్లు ముందుకు వస్తేనేగానీ బిజినెస్ పూర్తి కాదు. బిజినెస్ జరిగిన తర్వాత నిర్మాత చెప్పిన తేదీకి విడుదల చేయడానికి ఆ డిస్ట్రిబ్యూటర్ సిద్ధపడాలి. అతనికి ఎగ్జిబిటర్లు అడ్వాన్సులు ఇస్తేనే అతను డబ్బు కట్టగలడు. అడ్వాన్సులు రాకపోతే ఆ తేదీకి తాను విడుదల చేయలేనని.. అలా చేయాలంటే తనకు మార్జిన్ ఇవ్వమని అతను అడుగుతాడు. మార్జిన్ ఇచ్చే పరిస్థితిలో నిర్మాత ఉన్నాడా లేడా అన్నది తెలియదు.
ఇక ఎగ్జిబిటర్లు పరంగా మరో సమస్య. విడుదల కావలసిన సినిమాలు ఎక్కువ ఉంటే ‘మేం అడ్వాన్సులు ఇవ్వలేం’ అని డిమాండ్ చేస్తారు. పాతిక లక్షలు ఇవ్వడానికి తాము పది లక్షలే ఇస్తమంటారు. వారి దగ్గర డబ్బులు లేకపోతే డిస్ట్రిబ్యూటర్లు నిర్మాతకు డబ్బులు కట్టలేరు. ఇలా ఇదంతా ఒకదానితో ఇంకొకటి ముడిపడిన వ్యవహారం. సినిమా పరిశ్రమ ఏకాభిప్రాయంతో ముందుకు సాగకపోవడానికి ఇది కూడా ఒక కారణం. వ్యక్తిగతంగా ఎవరి సమస్య వారికి ఉంటుంది. ఏకాభిప్రాయం లేకపోవడమే పరిశ్రమ దెబ్బతినడానికి ఒక కారణం అని చెప్పవచ్చు.
థియేటర్ యజమాని థియేటర్ లీజుకు ఇచ్చేసుకుని ఉంటున్నాడు. క్షేత్రస్థాయిలో ఏం జరుగుతుందో ఎవరికీ తెలియదు. థియేటర్ లీజుకు ఇచ్చినా సమస్యే. కరోనా వచ్చింది కదా అంత లీజు ఇవ్వలేమనే లీజుదారులూ ఉన్నారు. ఎలాగో తంటాలు పడి సినిమా పూర్తి చేసినా సినిమా ప్రేక్షకుడి చెంతకు ఎప్పుడు చేరుతుందో ఎవరికీ తెలియదు. సినిమా విడుదలయ్యేలోగా తెచ్చిన అప్పులు తడిసిమోపెడై నిర్మాత కుదేలవుతున్నాడు. కాబట్టి ఇదో చక్రబంధం అనే చెప్పాలి. దీనికి శుభం కార్డు పడటం అనేది ఒక విధంగా ఆ నిర్మాత అదృష్టాన్ని బట్టే ఉంటుందని అనుకోవాలి.
– హేమసుందర్ పామర్తి
