ప్రముఖ టీవీ ఛానల్ టీవీ9 నుంచి న్యూస్ ప్రజంటర్ రజనీకాంత్ తప్పుకోనున్నారని ప్రచారం జరిగింది. ఆయనకు టీవీ9 కొత్త యాజమాన్యానికి పొసగడం లేదని వార్తలు ప్రచారం జరిగాయి. దీంతో రవిప్రకాష్, జాఫర్, బిత్తిరి సత్తి లాగే రజనీకాంత్ ను కూడా టీవీ9 యాజమాన్యం ఇంటికి పంపనుందని అందరూ అనుకున్నారు. కానీ అందరి అంచనాలను తలకిందులు చేస్తూ టీవీ9 మేనేజిమెంట్ ఓ సరికొత్త నిర్ణయం తీసుకుంది. రజనీకాంత్ ను కొనసాగిస్తూ సింగారావును చీఫ్ ఆపరేటింగ్ ఆఫీసర్ బాధ్యతల నుంచి తప్పుకోమని చెప్పినట్లు వార్తలు ప్రచారం జరిగాయి. ఆ ప్రచారాన్ని నిజం చేస్తూ సింగరావు టీవీ9 నుంచి తప్పుకున్నట్లు ప్రకటించారు.
ఎగ్జిట్ కు కారణమిదే
తీవ్ర నష్టాలలో ఉన్న స్టార్ మా టీవీకి హైయెస్ట్ టీఆర్పీ రావడంలో సింగారావు కీలక పాత్ర పోషించారు. ఆ తరువాత 10టీవీ బాధ్యతలు తీసుకున్న ఆయన ఈ ఛానల్ కు కూడా తన సరికొత్త విధానాలతో డిమాండ్ పెంచారు. ఎవరికీ పెద్దగా తెలియని ఈ ఛానల్ ను రెండు తెలుగు రాష్ట్రాలలో ప్రజలకు దగ్గరగా చేర్చారు. ఈయన సమర్థతపై ఎవరికీ అనుమానం లేదు. ఈ నేపథ్యంలోనే రవిప్రకాష్ నుంచి కొత్త యాజమాన్యం బాధ్యతలు తీసుకున్నప్పుడు ఏరికోరి మరి సింగరావుకే చీఫ్ ఆపరేటింగ్ ఆఫీసర్ బాధ్యతలు అప్పగించారు. పనిలో నిక్కచ్చిగా ఉండే ఆయన వ్యవహర శైలితో టీవీ9కి చాలా మంది దూరమయ్యారు.
ఈ మధ్యకాలంలో సింగరావు-రజనీకాంత్ మధ్య విభేదాలు వచ్చినట్లు తెలుస్తోంది. రజనీకాంత్ పర్సనల్ అజెండాతో ముందుకు పోవడం తప్పని సింగరావు వారించడం ఈ విభేదానికి కారణమైందంటూ వార్తలు వినబడ్డాయి. ఈ నేపథ్యంలో టీఆర్పీల విషయంలో బార్క్ కూడా కఠినంగా వ్యవహరించడంతో టీవీ9 రేటింగ్ పడిపోయింది. అప్పటి వరకు మొదటి స్థానంలో ఉన్న టీవీ 9 తాజా రేటింగ్స్ లో రెండో స్థానానికి పడిపోయింది. ఈ రేటింగ్ పడిపోవడం వెనుక సింగారావు నిర్ణయాలు ఉన్నాయని రజనీకాంత్ వర్గం ప్రచారం చేశారని సమాచారం. దీంతో టీవీ9ని మునుపటి స్థాయిలో తీర్చి దిద్దాలనే ఆలోచనతో సింగరావే స్వయంగా చీఫ్ ఆపరేటింగ్ ఆఫీసర్ పదవి నుంచి తప్పుకోవాలని నిర్ణయానికి వచ్చినట్లు టాక్. అందుకే టీవీ9 మేనేజిమెంట్ రజనీకాంత్ నే కొనసాగించేలా నిర్ణయానికి వచ్చినట్లు సమాచారం.
సమర్ధతకు పట్టం
సింగరావు సమర్థత గురించి ప్రత్యేకంగా చెప్పవలసిన అవసరం లేదు. ఆయన స్వయంగా ఆఫీసర్ బాధ్యతల నుంచి తప్పుకోవడానికి కూడా సంస్థ అభివృద్ధి కోసమేనంటూ టీవీ9 ఇన్సైడ్ వర్గాలు చెబుతున్నాయి. 10టీవీ, టీవీ9 రెండు సంస్థలు ఒకే మేనేజిమెంట్ కింద పని చేస్తున్న సంగతి తెలిసిందే. బయట జరుగుతున్న నెగటివ్ వార్తలకు బ్రేక్ వేస్తూ కొత్త యాజమాన్యానికి సింగరావుకు ఎలాంటి విభేదాలు లేవు. సింగరావు సమర్థతను గురించి తెలిసిన కొత్త యాజమాన్యం తిరిగి ఆయనకు 10టీవీ బాధ్యతలు అప్పగించారు. అతి త్వరలోనే ఆయన 10టీవీ బాధ్యతలు తీసుకోనున్నారు.