ప్రకృతి పురుష.. ఇవి లేకుండా ఏ ప్రణయమూ పుట్టదు.. ఆ ప్రణయంలో నుంచి వచ్చే ప్రళయాలూ పుట్టవు.. అలా పుడితే గిట్టేవి మాత్రం ఆ రెండు జీవితాలే. బహుశా ఇదే ‘రాధేశ్యామ్’ సినిమాకు ఆయువు పట్టేమో.
ప్రభాస్, పుజా హెగ్డే జంటగా ఈరోజు విడుదలైన మోషన్ పోస్టర్ గురించి వర్ణించడానికి నాలుగు మాటలు చాలవు. ఒక్క మాటలో చెప్పాలంటే మాత్రం ప్రణయ కావ్యానికి ఓ సమ్మోహన మంత్రాన్ని జపించడమే ఈ బీట్స్ ఆఫ్ రాధేశ్యామ్. ఓ ఆలాపన మధ్య నుంచి పుట్టిన ప్రకృతి ఆరాధనలో నుంచి ఓ యువజంట కనులపంటగా కదిలింది.. కనువిందు చేసింది. ఈ మోషన్ పోస్టర్ ఆద్యంతం గ్రాఫిక్స్ తోనే ఉన్నా కెమెరా పనితనం కూడా కనిపించింది.
ఎంచుకున్న లొకేషన్లు ఎంతో ఆకర్షణీయంగా కనిపించాయి. గ్రాఫిక్స్ కూడా చక్కగా కుదిరింది. విజువల్ గ్రండియర్ గా మాత్రం ఈ టీజర్ ఉంది. అరచేతిని చూపుతూ అందులో నుంచి కథను రివీల్ చేశారంటేనే ఇందులో ఏదో మిస్టరీ దాగుందన్న అర్ధం ధ్వనించింది. కాకపోతే పాతకాలం నాటి రైలును రాజమందిరంలా తీర్చిదిద్దారు.
అప్పట్లో రైలులో అలా చేయడం సాధ్యమైనా అనిపించక మానదు. ఆ రైలు బోగీలో ఓ రాజకుమారుడు లాంటి యువకుడు, యువరాణిలాంటి యువతిని చూపించారు. బహుశా వారిద్దరూ భార్యా భర్తలని కూడా అనుకోవలసి ఉంటుంది. అక్కడి నుంచి కెమెరా రాజమందిరంలోకి వెళ్లిపోతుంది. అదే జంట అక్కడ కూడా. ఈ రెండు జంటలూ గ్రాఫిక్స్ నుంచి పుట్టినవే. మళ్లీ తలుపుల్లో నుంచి బయటికి వెళితే మళ్లీ రైలు.. అదే జంట.. పక్కన ఓ కుక్క. తెరలు తొలగిస్తూ కథని వర్తమానంలోకి తీసుకొచ్చారు.
ఆ రైలు నుంచి అందాల భామ పూజ ప్రేరణగా రైలు కమ్మీలు పట్టుకుని ప్రకృతి అందాలను ఆస్వాదించే సన్నివేశం.. కట్ చేస్తే ప్రేరణ నడుము పట్టుకుని విక్రమాదిత్యగా ప్రభాస్.. ఇద్దరూ రైలు డోర్ నుంచి వేలాడే అద్భుత సన్నివేశం.. ఆ ప్రణయ ధ్వని అక్కడితో ఆగలేదు.. జస్టిన్ ప్రభాకరన్ స్వరకల్పనలో పాటగా పల్లవించింది. ‘కృష్ణ కృష్ణ మన మోహనా.. చిత్త చోర రాధా జీవన.. నీల శ్యామ మధుసూదనా.. రాధేశ్యామ యధునందనా..’అంటూ గానామృతం కురిపించింది. అంతా బాగానే ఉందిగానీ పాట మొదట్లో సాహిత్యాన్ని సంగీతం మింగేసింది.
– హేమసుందర్ పామర్తి
