బుల్లితెర పాపులారిటీ షో బిగ్బాస్పై నెగెటివ్ కామెంట్స్ రావడం కొత్తేమీకాదు. బిగ్బాస్కి వెళ్లొచ్చిన కంటిస్టెంట్స్ సైతం ఆ షోపై దుమ్మెత్తిపోసిన సందర్భాలున్నాయి. కాస్టింగ్ కౌచ్ మొదలుకొని షోలో ఇచ్చే టాస్కుల వరకు ఎన్నో అంశాలు వివాదాస్పదం అయ్యాయి. ఎన్ని వివాదాలు చుట్టుముట్టినా, నెగెటివ్ కామెంట్స్ వచ్చినా తెలుగుతో పాటు పలు భాషల్లో బుల్లితెరపై హంగామా చేస్తూనే ఉంది బిగ్బాస్ ప్రోగ్రాం. ఇప్పటికే తెలుగులో బిగ్బాస్ సీజన్ 4 స్టార్ట్ కాగా.. తమిళ బిగ్బాస్ ప్రారంభానికి అన్ని ఏర్పాట్లు జరుగుతున్నాయి. అక్కడ కూడా సీజన్ 4 గానే ప్రేక్షకుల ముందుకు రాబోతున్న ఈ షోకు ఎప్పటిలాగే కమల్ హాసన్ హోస్ట్గా వ్యవహరించనున్నారు.
ఇక షోలో పాల్గొనకుండానే బిగ్ బాస్పై విరుచుకుపడిన వారైతే చాలామందే ఉన్నారు. అదే బాటలో ఇప్పుడు తమిళ హీరోయిన్ లక్ష్మీ మీనన్ బిగ్ బాస్పై షాకింగ్ కామెంట్స్ చేసి వార్తల్లో నిలిచింది. తమిళ బిగ్బాస్ సీజన్ 4లో పాల్గొనబోయే కంటిస్టెంట్స్ లిస్ట్ ఇదే అంటూ సోషల్ మీడియాలో కొందరి పేర్లు ప్రచారంలోకి వచ్చాయి. ఇందులో హీరోయిన్ లక్ష్మీ మీనన్ కూడా పార్టిసిపేట్ చేయనున్నట్లు టాక్ రావడంతో ఆమె వెంటనే ఘాటుగా రియాక్ట్ అయింది. తాను బిగ్బాస్ పాల్గొనడం లేదని చెబుతూనే ఈ షోపై సంచలన వ్యాఖ్యలు చేస్తూ రెచ్చిపోవడం సినీ వర్గాల్లో హాట్ టాపిక్ అయింది.
తాను బిగ్బాస్ సీజన్ 4లో పాల్గొనడం లేదని.. అందులో పాల్గొని ఇతరుల ప్లేట్లు కడగడం, టాయ్లెట్లు శుభ్రం చేయడం లాంటి పనులు చేయనని చెప్పింది లక్ష్మీ మీనన్. అలాంటి దుస్థితి కూడా తనకు పట్టలేదంటూ బిగ్బాస్ పరువు తీసేసింది. దీంతో ఆమె చేసిన ఈ వ్యాఖ్యలు, కంటిస్టెంట్స్కి బిగ్బాస్ ఇస్తున్న టాస్కులపై జనాల్లో చర్చ మొదలైంది. ఇంతకీ లక్ష్మీ మీనన్ ఎవరంటే ‘వేదాళం’ సినిమాలో అజిత్ సోదరిగా నటించి క్రేజ్ కొట్టేసిన అమ్మడు. పలు తమిళ సినిమాలతో భారీ పాపులారిటీ కూడగట్టుకుంది.
అలాంటి ఈ హీరోయిన్ బిగ్ బాస్పై ఇలా మాట్లాడటం చూసి తమిళ సినీ వర్గాలు షాకయ్యాయి. ఇదిలాఉంటే మరో హీరోయిన్ మీరా మిథున్ బిగ్బాస్ని అడ్డుకుంటానని శపథం చేస్తుండటం ఈ షో ప్రారంభంపై అనుమానాలు రేకెత్తిస్తోంది. అంతే కాకుండా ఈ ‘షో’ పై ప్రజా సంఘాలు సైతం తప్పుపడుతున్నాయి. ప్రజలను సామజిక సృహ వైపుగా మలిచేలా ‘షో’ లు ఉండాలి కాని జనాలకు ఉపయోగం లేని ఇలాంటి ‘షో’ లు ఎందుకని వారు ప్రశ్నిస్తున్నారు.
