మంగళవారం సాయంత్రం విజయవాడ గన్నవరం నుంచి ప్రత్యేక విమానంలో బయలుదేరిన సీఎం, 4.45గం.లకు కడప విమానాశ్రయం చేరుకున్నారు. అనంతరం అప్పటికే అక్కడ సిద్ధంగా ఉన్న ప్రత్యేక హెలికాప్టర్లో 5.10గం.లకు ఇడుపులపాయకు బయల్దేరారు. 5.30గం.లకు ఇడుపులపాయ హెలిప్యాడ్ చేరుకున్నారు.
ప్రభుత్వ చీఫ్ విప్ శ్రీకాంత్ రెడ్డి, ఎమ్మెల్యేలు ఎస్. రఘురామిరెడ్డి, చెవిరెడ్డి భాస్కర్ రెడ్డి, ఎంఎల్సి జకియా ఖానం, కలెక్టర్ సి.హరికిరణ్, జాయింట్ కలెక్టర్ (అభివృద్ధి) సి.ఎం.సాయి కాంత్ వర్మ, కడప, రాజంపేట సబ్ కలెక్టర్లు పృథ్వి తేజ్, కేతన్ గార్గ్, పాడా ఓఎస్డి అనిల్ కుమార్ రెడ్డి, డిసిసిబి ఛైర్మన్ తిరుపాల్ రెడ్డి, మాజీ ఎమ్మెల్యే ఆకేపాటి అమర్నాథరెడ్డి, ప్రముఖ నాయకులు వైయస్ మనోహర్ రెడ్డి, వైయస్ మధుసూదన్ రెడ్డి, వైఎస్ అభిషేక్ రెడ్డి, ఇతర అధికారులు తదితరులు ఇడుపులపాయలో ముఖ్యమంత్రికి సాదరంగా ఆహ్వానం పలికారు.
ఆహ్వానం పలికిన వారిని జగన్ పేరు పేరునా ఆత్మీయంగా పలకరించారు. కోవిడ్ నేపథ్యంలో ఇడుపులపాయలో స్టాండర్డ్ ఆపరేషనల్ ప్రోటోకాల్ మేరకు కట్టుదిట్టమైన భద్రతా ఏర్పాట్లు చేశారు. దివంగత ముఖ్యమంత్రి డాక్టర్ వైయస్ రాజశేఖర రెడ్డి వర్ధంతిని పురస్కరించుకొని బుధవారం ఉదయం ఇడుపులపాయలో కుటుంబ సభ్యులతో కలిసి వైయస్సార్ ఘాట్ వద్ద నివాళులు అర్పించనున్నారు.
