వైఎస్ఆర్ సీపీ ప్రభుత్వ పోకడలు ఆ పార్టీ పట్ల ప్రజల్లో మరింత అయిష్టత పెరిగేలా ఉంటున్నాయి. మూడు రాజధానుల ఏర్పాటులో భాగంగా ముఖ్యమంత్రి జగన్ తన క్యాంపు కార్యాలయం సహా, కొన్ని శాఖల ఆఫీసులను విశాఖకు తరలించేందుకు రెడీ అయ్యారు. డిసెంబరు 8న సీఎం క్యాంప్ ఆఫీసు తరలింపునకు ముహూర్తం పెట్టారు. ఆ మరుసటి రోజే జగన్ సతీమణి భారతి రెడ్డి పుట్టిన రోజు కావడం విశేషం. ఆమె బర్త్ డే గిఫ్ట్ గా జగన్ కొత్త ప్యాలెస్లోకి అడుగుపెడుతున్నట్లుగా తెలుస్తోంది. త్వరలో తన కాపురాన్ని విశాఖపట్నానికి తరలిస్తున్నానంటూ ఆరేడు నెలల క్రితం జగన్ ప్రకటించిన సంగతి తెలిసిందే. అది వాయిదాలమీద వాయిదాలు పడి చివరికి డిసెంబరు 8కి ఫిక్స్ అయింది.
ఎన్నికలకు 6 నెలల ముందు చేసే శంకుస్థాపనలు నమ్మొద్దు, అవన్నీ మోసాలే అని విపక్ష హోదాలో పదే పదే వాదించిన జగన్.. ఇప్పుడు అవే పనులు చేస్తున్నారు. ‘చెప్పేవన్నీ శ్రీరంగ నీతులు.. చేసేవన్నీ దొమ్మరి పనులు’ అని ఓ సందర్భంలో జగనే అన్నారు. ఈ మాటకు తగ్గట్లుగానే జగన్ వ్యవహార శైలి ఉంటోంది. అమరావతి నుంచి ప్రభుత్వ కార్యాలయాలను విశాఖకు తరలించడానికి వీల్లేదనే హైకోర్టు ఆదేశాలు ఉన్నాయి. అందుకని, కొన్ని ఆఫీసులను దొడ్డిదారిలో తరలించడానికి ప్రత్యేక కుట్ర పన్నారు. తమ ప్రభుత్వం ఉత్తరాంధ్రను డెవలప్ చేయాలని కంకణం కట్టుకుందని, ఆ అంశంపై తరచూ సమీక్షలు, పర్యటనలు చేయాల్సి ఉన్నందున ఆయా శాఖల ముఖ్యకార్యదర్శులు విశాఖలోనే ఉండాలని ఇప్పటికే ఉత్తర్వులు ఇచ్చారు. ఇందులో భాగంగా అన్ని శాఖల అధికారులకు, మంత్రులకు విశాఖలో కార్యాలయాలు ఎంపిక చేశారు.
చంద్రబాబు ప్రభుత్వం ఉన్నప్పుడు ఓ వెలుగు వెలిగిన విశాఖలో మిలీనియం టవర్స్ను మంత్రుల కార్యాలయాల కోసం వాడుతున్నారు. నిజానికి ఈ మిలీనియం టవర్స్ లో అనేక ఐటీ కంపెనీలు ఉండేవి. చంద్రబాబే వాటిని రప్పించారు. వైఎస్ఆర్ సీపీ అధికారంలోకి రాగానే వాటిని వెళ్లగొట్టేశారు. ఆ భవనం ఖాళీగా ఉండడంతో మిలీనియం టవర్స్లో మంత్రులు, అధికారుల ఆఫీసులు ఏర్పాటు చేస్తున్నట్లుగా జీవోలో సీఎస్ వివరించారు. మొత్తం 35 శాఖలకు క్యాంపు కార్యాలయాలు అవసరమని గుర్తించగా.. దాంట్లో 16 శాఖలకు భవనాలను కేటాయించారు.
ఒక పద్ధతి, ప్రణాళిక లేకుండా తాను పట్టిన కుందేలుకు మూడే కాళ్లు అనే రకంగా మొండిగా జగన్ ప్రభుత్వం వ్యవహరిస్తున్న తీరుపై సొంత పార్టీ నేతలే అసహనం వ్యక్తం చేస్తున్నారు. ఎన్నికలకు ముందు ఆయన అమలు చేస్తున్న ట్రిక్కులు జగన్ కు కలిసిరాకపోగా, తీవ్ర నష్టం చేకూర్చేవిగా భావిస్తున్నారు.
