తెలుగు సినిమా రంగంలోకి ఎప్పటికప్పుడు ఇతర భాషలకు చెందిన తారలు అరంగేట్రం చేయడం చూస్తున్నదే. అందంతో పాటు మంచి అభినయాన్ని పలికించగల ఎందరో మలయాళీ భామలకు తెలుగు చిత్ర పరిశ్రమ అవకాశాలను ఇచ్చింది. ఈ కోవలోనే తాజాగా మరో మలయాళీ భామ నజ్రియా నజిమ్ ఫాహద్ అడుగుపెట్టబోతోంది. పువ్వు పుట్టగానే పరిమలించును అన్నట్లుగా బాలతారగా మలయాళంలో నిరూపించుకొని, ఆ తర్వాత టీవీ రంగంలో కూడా యాంకర్ గా, హోస్టుగా రాణించింది.
ఇలా ప్రతిభాపాటవాలు ప్రదర్శించిన వారెందరికో సినీరంగంలో అవకాశాలు వెతుక్కుంటూ వచ్చాయి. నజ్రియా కూడా అలానే హీరోయిన్ అయ్యింది. గత కొన్నేళ్లుగా మలయాళ, తమిళ సినిమాలు చేస్తూ.. తన నట విన్యాసాన్ని అక్కడి ప్రేక్షకులకు పంచిన ఆమె ఇప్పుడు తెలుగులో నాని సరసన నటించబోతోంది. ప్రముఖ చిత్ర నిర్మాణ సంస్థ మైత్రీ మూవీ మేకర్స్ నాని హీరోగా కొత్త చిత్రాన్ని ప్రకటించింది.
వివేక్ ఆత్రేయ దర్శకత్వం వహించే ఈ చిత్రంలో నజ్రియా నటనకు మంచి అవకాశం ఉన్న పాత్రలో నటించనున్నట్లు తెలిసింది. మరోవైపు నజ్రియా కూడా తెలుగులో అవకాశం రావడం పట్ల ఆనందాన్ని వ్యక్తం చేస్తూ తనదైన అందం, అభినయాలతో ఇక్కడి ప్రేక్షకులను కూడా ఆకట్టుకుంటానని అంటోంది.ముందు ముందు ఈ భామ ఏ రేంజ్లో తన ప్రతిభను చాటుకుని బిజీ అవుతుందో వేచిచూడాల్సిందే.
