ఐపీఎల్ కు సమయం దగ్గర పడుతోంది. క్రికెట్ లోకంలో పండుగ వాతావరణం ఆసన్నమవుతోంది. ఈ సమయంలో కొవిడ్ కలవర పెడుతోంది. ఐపీఎల్ నిర్వహణపై మళ్లీ నీలినీడలు కమ్ముకునేలా చేస్తోంది. అసలీ పరిస్థితుల్లో ఐపీఎల్ నిర్వహణ సాధ్యమేనా అనే సందేహం సర్వత్రా నెలకొంది. ఒకవేళ షెడ్యూల్ ప్రకారమే మ్యాచ్ లు జరిగినా.. ముంబయిలో నిర్వహణ సాధ్యం కాదనే సంకేతం వినిపిస్తోంది. అదే నిజమైతే ప్రత్యామ్నాయ వేదిక హైదరాబాద్ లో ఐపీఎల్ నిర్వహణ ఆశలు ఇంకా సజీవమే!
వాంఖడేలో కరోనా వణుకు…
ఇండియన్ ప్రీమియర్ లీగ్(ఐపీఎల్) 14వ సీజన్ కు సమయం ఆసన్నమవుతోంది. ఈ సమయంలో కరోనా మళ్లీ విజృంభిస్తోంది. ప్రత్యేకించి మహారాష్ట్రలో కొవిడ్ ప్రభావం ఎక్కువగా కనిపిస్తోంది. ప్రత్యేకించి.. వాంఖడే స్టేడియం సిబ్బందిలో 10 మందికి, ఈవెంట్ మేనేజ్ మెంట్ కు సంబంధించి ఆరుగురికి పాజిటివ్ వచ్చింది. ఈ నేపథ్యంలో ముంబయిలో పరిస్థితి చేయిదాటేలానే కనిపిస్తోంది. ఒకవేళ అలా జరిగితే మంబయిలో నిర్వహించాల్సిన 10 మ్యాచ్ లు హైదరాబాద్, ఇండోర్ లలో నిర్వహించే అవకాశాలు ఉన్నాయి.
ఐసోలేషన్ లో అక్షర్…
ఢిల్లీ ఆటగాడు అక్షర్ పటేల్ కు కరోనా పాజిటివ్ వచ్చింది. ముంబయిలో తను బసచేసిన హోటల్ లో గత నెల 28న అతనికి పరీక్ష చేయగా నెగిటివ్ గా తేలింది. కానీ మరోసారి కరోనా పరీక్ష చేయగా పాజిటివ్ అని వచ్చింది. ఆ తర్వాత అతన్ని ఐసోలేషన్ లో ఉంచి చికిత్స అందిస్తున్నారు. అయితే.. అక్షర్ ఇంకా శిబిరానికి వెళ్లలేదు కాబట్టి మిగతా ఆటగాళ్లకు ఎటువంటి ఇబ్బంది లేదు. తొలుత కోల్ కతా నైట్ రైడర్స్ హిట్టర్ నితీశ్ రాణా వైరస్ బారిన పడ్డారు.
షెడ్యూల్ యథాతథం!
ఓ వైపు కరోనా కలవర పెడుతుంటే… బీసీసీఐ వర్గాలు మాత్రం షెడ్యూల్ యథావిధిగా కొనసాగుతుందని చెబుతున్నాయి. మహారాష్ట్రలో లాక్ డౌన్ పెట్టాల్సిన పరిస్థితి ఏర్పడినా ఎటువంటి ఇబ్బంది లేదని బీసీసీఐ అధికారి ఒకరు తెలిపారు. ప్రేక్షకులకు ఎలాగూ అనుమతి లేదు కాబట్టి ముంబయిలో ఐపీఎల్ సజావుగా సాగుతుందని ఆశాభావం వ్యక్తం చేశారు. ఒకవేళ అవసరమైతే హైదరాబాద్, ఇండోర్ ప్రత్యామ్నాయ వేదికలు సిద్ధంగా ఉన్నాయని గుర్తు చేశారు.
Also Read : ఈ సారి ఐపీఎల్ నిబంధనల్లో మార్పులేంటో తెలుసా..?
