కేంద్రంలో రాజ్యమేలుతున్న భారతీయ జనతాపార్టీ ఆంధ్రప్రదేశ్లోను తన ఉనికిని చాటుకునేందుకు ఉవ్విళ్లూరుతోంది. వచ్చే సాధారణ ఎన్నికల్లో పరిస్థితులు అనుకూలిస్తే జనసేనతో కలసి అధికారం అందిపుచ్చుకోవాలని తహతహలాడుతోంది. అందుకు రూపొందిస్తున్న కార్యాచరణలో భాగంగా రాష్ట్ర అధ్యక్షుడు సోము వీర్రాజు నేతృత్వంలో కొత్త కార్యవర్గాన్ని నియమించింది. ఈ కార్యవర్గంలో రాష్ట్రంలోని అన్ని జిల్లాలకు ప్రాతినిధ్యం కల్పించినప్పటికీ విజయనగరానికి అవకాశం కల్పించకపోవడంపై విమర్శలు వెల్లువెత్తుతున్నాయి.
స్థానిక నాయకుల్లో చోటుచేసుకున్న కీచులాటలే దానికి కారణమని ఆ పార్టీ నాయకులే బాహాటంగా విమర్శిస్తుండటం చర్చనీయాంశమవుతోంది. కొన్ని దశాబ్దాలుగా బీజేపీ రాష్ట్ర కార్యవర్గంలో జిల్లాకు సముచిత స్థానం ఉండేది. కన్నా లక్ష్మీ నారాయణ నేతృత్వంలోని రాష్ట్ర కార్యవర్గంలోనూ జిల్లాకు చెందిన పాకలపాటికి కోశాధికారి పదవి లభించింది.
వీర్రాజు నేతృత్వంలోని కార్యవర్గంలో జిల్లాకు ఎటువంటి పదవీ లభించకపోవడానికి కారణం ఇక్కడ నాయకుల మధ్య చోటు చేసుకున్న అంతర్గత విభేదాలేనని స్పష్టమవుతోంది. అంతేకాకుండా జిల్లాలో బీజేపీ సీనియర్ నాయకులు పాకలపాటి సన్యాసిరాజు (మురళి) గతంలో కోశాధికారిగా వ్యవహరించి అనేక అవకతవకలకు పాల్పడినట్లు ఆరోపణలు ఉన్నాయి.
గత సాధారణ ఎన్నికల్లో అసెంబ్లీ నియోజకవర్గాలలో ప్రచారానికి , ఇతరత్రా అవసరాలకు అధిష్టానం విడుదల చేసిన నిధులను దుర్వినియోగం చేసారనే ఫిర్యాదులు వెల్లువెత్తాయి. వృద్ధాప్యం ముంచెత్తుతున్నా, పార్టీ పొమ్మంటున్నా అంటిపెట్టుకుని ఉండటంతో పాటు జిల్లాలో ఇతరులకు అవకాశం దక్కకుండా అడ్డుకుంటున్నారనే విమర్శలు ఉన్నాయి.
ఈ నేపథ్యంలోనే జిల్లాలో బీజేపీ కి అండ దండగా, పార్టీ అభివృద్ధికి అహర్నిశలూ కష్టపడుతున్నవారున్నప్పటికీ అవకాశాలు రావడం లేదని చాలామంది నాయకులు నిరాశ, నిస్పృహలకు గురవుతున్నారు. ఈ పరిణామాలు ఆ పార్టీ జిల్లాలో కనుమరుగయ్యే పరిస్థితికి దారితీసే అవకాశాలు ఉన్నాయనే బాహాటంగానే అనుకుంటున్నారు.
కొన్ని జిల్లాల నుంచి అయిదుగురి వంతున కూడా రాష్ట్ర కార్యవర్గంలో చోటు కల్పించారు. ఒకే పట్టణం నుంచి ఇద్దరు ముగ్గురికి పదవులు అప్పజెప్పడం కూడా జరిగింది. అయినప్పటికీ.. విజయనగరం జిల్లాను మాత్రం పూర్తిగా పట్టించుకోకపోవడం.. ఈ జిల్లాలోని కార్యకర్తలు, నాయకుల్ని బాధిస్తోంది. పార్టీని పటిష్టపరచాలంటే.. ఏ మొహం పెట్టుకుని ప్రజల ఎదుటకు వెళ్లగలం అని వారు ప్రశ్నిస్తున్నారు.
