మినీ పురపోరు.. ప్రతిష్టాత్మకంగా పోరాడుతున్న పార్టీలు

తెలంగాణలో వరంగల్, ఖమ్మం కార్పొరేషన్లతో పాటు ఐదు మున్సిపాల్టీలకు జరగనున్న ఎన్నికలను అన్ని పార్టీలు ప్రతిష్టాత్మకంగా తీసుకుంటున్నాయి. ఏప్రిల్ 30న జరగనున్నవరంగల్, ఖమ్మం కార్పొరేషన్లతో పాటు అచ్చంపేట, సిద్దిపేట, నకిరేకల్‌, జడ్చర్ల, కొత్తూరు మున్సిపాలిటీల ఎన్నికలకు నేటితో ప్రచారం ముగియనుంది. వాస్తవానికి 48గంటల ముందు ప్రచారం ఆపాల్సి ఉన్నా..కోవిడ్ వేగంగా వ్యాప్తి చెందుతున్న నేపథ్యంలో ఎన్నికల సంఘం కొత్త నిబంధన విధించింది. 72గంటల ముందు ప్రచారాన్ని నిలిపివేయాలని ఆదేశాలు జారీ చేసింది. దీంతోపాటు తాజాగా పోలింగ్ ఏజెంట్లకు సంబంధించి ఆయా పోలింగ్ కేంద్ర పరిధిలోని వారే పోలింగ్ ఏజెంట్లుగా ఉండాలనే నిబంధన ఈ ఎన్నికలకు వర్తించదని, ఆయా పురపాలక సంఘ పరిధిలోని ఎవరినైనా నియమించుకోవచ్చని తెలిపింది. ఎన్నికలకు జరిగే ప్రాంతాల్లో నేటితో ప్రచారానికి తెరపడనుంది.

పార్టీలకు ప్రతిష్టాత్మకమే..

దుబ్బాక గెలుపుతో స్పీడు పెంచిన బీజేపీకి ఎమ్మెల్సీ ఎన్నికల ఫలితాలు బ్రేక్‌లు వేసిన నేపథ్యంలో ఈ సారి తన పట్టు పెంచుకోవాలని బీజేపీ భావిస్తోంది. ఈ ఎన్నికల్లో గెలిచి మళ్లీ తమకు తిరుగులేదని నిరూపించుకోవాలని టీఆర్ఎస్ భావిస్తుండగా వరుస ఓటముల నుంచి తేరుకునేందుకు ఈ ఎన్నికల్లో గెలుపు అవసరమని కాంగ్రెస్ భావిస్తోంది. ఇందుకోసం పలుచోట్ల పొత్తులు కూడా పెట్టుకున్నాయి.

బీజేపీ..

ఎన్నికలకు ముందే బీజేపీ ఆయా మున్సిపాల్టీల పరిధిలో ఇన్‌చార్జీలను నియమించింది. కొవిడ్‌ నిబంధనలు, భౌతికదూరం పాటిస్తూ ఇంటింటి ప్రచారానికి రూపకల్పన చేసింది. వరంగల్‌ కార్పొరేషన్‌ను బండి సంజయ్, ఖమ్మం కార్పొరేషన్ బాధ్యతను కిషన్ రెడ్డి, మహబూబ్‌నగర్‌ జిల్లా పరిధిలోని అచ్చంపేట, జడ్చర్ల బాధ్యతలను పార్టీ జాతీయ ఉపాధ్యక్షురాలు డీకే అరుణ, సిద్దిపేట బాధ్యత ఎమ్మెల్యే రఘునందన్‌రావు పర్యవేక్షిస్తున్నారు. ఇక ఇన్ ఛార్జిలుగా వరంగల్‌ కార్పొరేషన్‌లో పార్టీ ఎన్నికల ఇన్‌చార్జీ మాజీ ఎంపీ జితేందర్‌రెడ్డి, ఖమ్మం – మాజీ ఎమ్మెల్యే చింతల రాంచంద్రారెడ్డి చూస్తున్నారు. ఎన్నికల్లో భాగంగా టీఆర్ఎస్‌పై బీజేపీ నేతలు తీవ్ర విమర్శలు చేస్తున్నారు. పార్టీ జాతీయ కార్యదర్శి పురంధరేశ్వరి రెండురోజుల క్రితం ఖమ్మం సభలో టీఆర్ఎస్‌పై సంచలన వ్యాఖ్యలు చేశారు. పువ్వాడపై పలు ఆరోపణలు చేశారు.

టీఆర్ఎస్..

ఇక టీఆర్ఎస్ కూడా ఇన్‌ఛార్జిలను నియమించింది. తొలుత వరంగల్, ఖమ్మం మున్సిపల్‌ కార్పొరేషన్ల పరిధిలో మంత్రి కేటీఆర్‌ రోడ్ షోలకు ప్రణాళిక వేసినా కొవిడ్ కారణంగా రద్దయ్యాయి. దీంతో కమిటీని ఏర్పాటుచేసి ముఖ్య నేతలద్వారా ప్రచారం చేయిస్తోంది. వరంగల్‌ పరిధిలో మంత్రి ఎర్రబెల్లి దయాకర్‌రావు ఆధ్వర్యంలో ఏడుగురు సీనియర్ లీడర్లతో కమిటీ వేశారు.మంత్రులు ఈటల రాజేందర్, సత్యవతి రాథోడ్‌, కొప్పుల ఈశ్వర్‌ ప్రచార బాధ్యతలు చూస్తుండగా ఖమ్మం కార్పొరేషన్‌ పరిధిలో మంత్రి పువ్వాడ అజయ్‌కుమార్‌, సీపీఐ నాయకులు, రాష్ట్ర హోం మంత్రి మహమూద్‌ అలీ ప్రచారం చేస్తున్నారు. వీరు కాకుండా సిద్ధిపేటలో హరీష్‌రావుకు ఈ ఎన్నిక కీలకంగా మారింది. ఇక్కడ మెదక్‌ ఎంపీ కొత్త ప్రభాకర్‌రెడ్డి, ఎమ్మెల్సీ ఫారూక్‌ హుస్సేన్‌, కొత్తూరులో మంత్రి శ్రీనివాస్‌గౌడ్‌, ఎమ్మెల్యే అంజయ్య యాదవ్‌, అచ్చంపేటలో మంత్రి నిరంజన్‌రెడ్డి, ఎమ్మెల్యే గువ్వల బాలరాజు, నకిరేకల్‌లో మంత్రి జగదీశ్‌రెడ్డి, ఎమ్మెల్యే లింగయ్య , జడ్చర్లలో మాజీమంత్రి లక్ష్మారెడ్డి, ఎమ్మెల్యేలు మర్రి జనార్దన్‌రెడ్డి, ఆల వెంకటేశ్వర్‌ రెడ్డిలు ప్రచారం చేస్తున్నారు.

కాంగ్రెస్ పార్టీ..

వరుస ఓటములతో ఉక్కిరిబిక్కిరి అవుతున్న కాంగ్రెస్ పార్టీ ఈ ఎన్నికల్లో గెలిచి మళ్లీ శ్రేణుల్లో ఉత్సాహం నింపాలని చూస్తోంది. ప్రత్యేకంగా ఎన్నికల కమిటీలను ప్రకటించింది. వరంగల్‌ కార్పొరేషన్‌కు 13మందితో, ఖమ్మం నగరపాలక సంస్థకు 11మంది సభ్యులతో కూడిన కమిటీ ప్రకటించింది. వరంగల్‌ కమిటీలో కన్వీనర్‌గా ఎమ్మెల్సీ జీవన్‌రెడ్డి, కో-కన్వీనర్‌గా ఎమ్మెల్యే శ్రీధర్‌బాబు, ఖమ్మం కార్పొరేషన్‌కు కమిటీ కన్వీనర్‌గా టీపీసీసీ వర్కింగ్ ప్రెసిడెంట్‌ పొన్నం ప్రభాకర్, సభ్యులుగా భట్టి విక్రమార్క, డీసీసీ అధ్యక్షుడు దుర్గా ప్రసాద్, మాజీ కేంద్ర మంత్రులు రేణుకా చౌదరి, బలరామ్‌ నాయక్‌ తదితరులు ఉన్నారు. పార్టీ కీలక నేతలు రేవంత్‌రెడ్డి, సీతక్క, జీవన్‌రెడ్డితో పాటు పలువురు నేతలు సుడిగాలి పర్యటనలు చేస్తున్నారు. ఖమ్మంలో 18వ డివిజన్‌లో కాంగ్రెస్ పార్టీ టిక్కెట్ పై పోటీచేస్తున్న అయినాల పద్మ టీఆర్ఎస్‌లో చేరడంతో పాటు మరో వార్డు కూడా టీఆర్ఎస్‌కు ఏకగ్రీవమైంది.

Must Read ;- ఏకగ్రీవానికి రాయబారం.. బండి సంజయ్‌కి తెలియకుండా టీఆర్ఎస్ మద్దతా?