బిగ్బాస్ షోపై సీపీఐ జాతీయ కార్యదర్శి నారాయణ సంచలన వ్యాఖ్యలు చేశారు. బిగ్బాస్ షోలో హీరో నాగార్జున దిగజారుడు మాటలు మాట్లాడుతున్నారని నారాయణ విమర్శించారు. బిగ్బాస్ షోలో ముగ్గురు అమ్మాయిల ఫోటోలు చూపించి, ఎవరితో డేటింగ్ చేస్తావ్, ఎవరిని కిస్ చేస్తావ్, ఎవరిని పెళ్లి చేసుకుంటావని హీరో నాగార్జున అడగడం మహిళలను కించపరచడమేనని ఆయన విమర్శించారు. ఆ ముగ్గురు మహిళల ఫోటోల స్థానంలో నాగార్జున ఇంటి మహిళల ఫోటోలు పెట్టి అలాంటి ప్రశ్నలు అడగ గలరా అని నారాయణ ప్రశ్నించారు.
నాగార్జున క్షమాపణ చెప్పాలి
హీరో నాగార్జున బిగ్బాస్ షోలో మహిళలను కించపరచడంపై క్షమాపణ చెప్పాలని నారాయణ డిమాండ్ చేశారు. బిగ్ బాస్ లో నాగార్జున తీరుపై హైకోర్టులో కేసు వేస్తానని, ఎంత దాకా అయినా పోరాడతామని నారాయణ హెచ్చరించారు. సినిమాల నుంచి రాజకీయాల్లోకి వచ్చి ఎన్టీఆర్, ఎంజీఆర్ మాత్రమే సక్సెస్ అయ్యారని ఇంకెవరూ కాలేదని, భవిష్యత్తులో ఇంకెవ్వరూ హీరోలు రాజకీయాల్లో సక్సెస్ కాలేరని నారాయణ జోస్యం చెప్పారు.
