(విశాఖపట్నం నుంచి లియో న్యూస్ ప్రతినిధి)
ఖరీదైన మందు కాస్త చౌకగా దొరుకుతుందని కక్కుర్తి పడ్డారో నకిలీ మద్యం విక్రేతలను బుట్టలో పడినట్టే. ఒకటి కాదు రెండు కాదు… అనేక బ్రాండ్ల మద్యం చీప్ గా లోకల్ లో తయారు చేసి, నికార్సైన బ్రాండ్ బాటిళ్లలో నింపేసి, ఆపై చక్కని సీల్ వేసి ఒడిశాలోని బరంపురం నుంచి గుట్టుచప్పుడు కాకుండా దిగుమతి చేస్తున్నారు. బాటిల్ లో ఉండే మద్యం మాత్రమే కల్తీ…. మిగతాదంతా సేమ్ టు సేమ్. దీంతో తాగితే గాని దాని సత్తా ఏంటో కనిపెట్టడం సాధ్యం కాదు. అంత పక్కాగా కల్తీ చేస్తున్న ముఠా గుట్టును విశాఖ పోలీసులు రట్టు చేశారు.
ఒడిశాలో నకిలీ మద్యాన్ని తయారు చేసి ఆంధ్రాకు తీసుకువచ్చి విక్రయిస్తున్న ముఠాను పోలీసులు అరెస్టు చేశారు. స్పెషల్ ఎన్ఫోర్స్మెంట్ బ్యూరో ఈ దాడులు చేసి అదుపులోకి తీసుకొని లోతైన దర్యాప్తు చేస్తోంది. ఈ నెల 25న గాజువాక వడ్లపూడి వద్ద వాహనాలు తనిఖీ చేస్తుండగా ఒడిస్సా రాష్ట్రం రిజిస్ట్రేషన్ తో ఉన్న ఒక కారులో 250 మద్యం సీసాలు 180ml గుర్తించారు. బ్రాండ్లకు ఏమాత్రం తీసిపోని లేబుళ్లు ఉండడంతో అనుమానం వచ్చి కారులో ప్రయాణిస్తున్న బరంపురానికి చెందిన నాగిరెడ్డి తిరుమల, కే శ్రీనివాస్ ల ను అదుపులోకి తీసుకున్నారు.
ఈ మద్యాన్ని బరంపురంలోని ఓ ఇంట్లో తయారు చేసి ఇక్కడకు సరఫరా చేస్తున్నట్టు గుర్తించారు. పట్టుబడ్డ నిందితుడు ఇచ్చిన సమాచారం ఆధారంగా ఆ ఇంటి పై దాడి చేయగా వివిధ పండ్లతో తయారు చేసిన ఇరవై ఐదు లీటర్ల స్పిరిట్, వివిధ కాస్ట్లీ బ్రాండ్ లకు చెందిన స్టిక్కర్లు, ఖాళీ సీసాలు, సీల్ వేసేందుకు ఉపయోగించే పరికరాలు , వివిధ బ్రాండ్ల మూతలు అక్కడ లభించాయి. స్పిరిట్ రసాయనాల సహాయంతో వివిధ బ్రాండ్ల పేరిట నకిలీ మద్యాన్ని తయారు చేస్తున్నట్టు ఈ దాడులతో తేలింది. ఇప్పటికి తెచ్చుకున్న సంపాదనంతా మద్యానికి తగలేసి ఇల్లు వొళ్ళు గుల్ల చేసుకుంటున్న వారి సంఖ్య కోకొల్లలు. ఇక అటువంటి వారు ఇటువంటి కల్తీ మద్యాన్ని తాగితే.. త్వరలోనే పరలోక ప్రాప్తి తప్పదని వైద్యులు హెచ్చరిస్తున్నారు.
కరోనా వైరస్ నుంచి ఇంకా తేరుకోకముందే.. ఇప్పుడిప్పుడే వ్యాపారాలు సర్దుకుంటున్న సమయంలో… ఈ కల్తీ వ్యవహారం అధికారులకు సవాలుగా మారుతోంది. ఇటువంటి విపత్కర పరిస్థితుల్లో వీటికి అడ్డుకట్ట వేయకుంటే ప్రజలు ప్రాణాలు గాల్లో కలిసిపోయే ప్రమాదం ఉందని వైద్యులు హెచ్చరిస్తున్నారు.
