అద్భుతమైన బ్యాటింగ్ లైనప్, అంతర్జాతీయ స్థాయి బౌలర్లతో సమతూకంగా ఉన్న ముంబై ఇండియన్స్ టీమ్ ఈ ఏడాది ఐపీఎల్ సీజన్లో అంచనాలకు అనుగణంగా రాణిస్తోంది. ఇప్పటివరకు జరిగిన ఏడు మ్యాచ్ల్లో ఐదు గెలిచి పాయింట్ల పట్టికలో రెండో స్థానంలో ఉంది. మరోవైపు కోల్కతా కూడా మెరుగ్గానే ఆడుతోంది. ఇప్పటివరకు జరిగిన ఏడు మ్యాచ్ల్లో నాలుగు గెలిచి పాయింట్ల పట్టికలో నాలుగో స్థానంలో ఉంది. ఈ రెండు టీమ్ల మధ్య రెండో మ్యాచ్ శుకవ్రారం సాయంత్రం జరగబోతోంది.
ఈ మ్యాచ్ కోల్కతాకు చాలా కీలకం. అనుమానాస్పద బౌలింగ్ యాక్షన్ ఆరోపణలు ఎదుర్కొంటున్న ఆల్ రౌండర్ సునీల్ నరైన్ ఈ మ్యాచ్కు అందుబాటులో ఉంటాడా అనే విషయంలో ఇంకా క్లారిటీ రాలేదు. ఈ మ్యాచ్లో కోల్కతా ఓడిపోతే టాప్ ఫోర్ నుంచి వైదొలగాల్సి ఉంటుంది. ఈ రెండు టీమ్ల మధ్య జరిగిన తొలి మ్యాచ్లో కోల్కతా టీమ్ను రోహిత్ సేన 49 పరుగుల భారీ తేడాతో ఓడించింది. ఇప్పుడు ఆ మ్యాచ్ పరాజయానికి ప్రతికారం తీర్చుకోవాలని కార్తీక్ సేన కృత నిశ్చయంతో ఉంది. శుకవ్రారం సాయంత్రం 7:30 గంటలకు అబుదాబిలోని షేక్ జావేద్ స్టేడియంలో ఈ రెండు టీమ్లూ తలపడబోతున్నాయి. మరి, రోహిత్ టీమ్ జోరుకు కోల్కతా బ్రేకులు వేస్తుందో, లేదో చూడాలి.
కోల్కతా బలాలు
ఈ ఏడాది ఐపీఎల్లో కోల్కతా టీమ్ మెరుగైన ప్రదర్శనే చేస్తోంది. కీలక ఆటగాళ్లు ఫామ్లో లేనప్పటికీ విజయాలు సాధిస్తోంది. శుభ్మన్ గిల్, ఇయాన్ మోర్గాన్, నితీష్ రాణా మంచి ఫామ్లో ఉన్నారు. కెప్టెన్ దినేష్ కార్తీక్ సహకారం అందిస్తున్నాడు. బౌలింగ్ విభాగం కూడా ఫర్వాలేదనిపిస్తోంది. గత ఐదు మ్యాచ్ల్లో కోల్కతా మూడు గెలిచి విశ్వాసంతో ఉంది.
బలహీనతలు
వరుస విజయాలతో జోరు మీదున్న కోల్కతాకు గత మ్యాచ్లో బెంగళూరు బ్రేకులేసింది. అనుమానాస్పద బౌలింగ్ యాక్షన్ ఆరోపణలు ఎదుర్కొంటున్న ఆల్ రౌండర్ సునీల్ నరైన్ ఆ మ్యాచ్ ఆడలేదు. శుక్రవారం జరిగే మ్యాచ్కైనా అందుబాటులో ఉంటాడా అనేది అనుమానాస్పదంగా మారింది. కీలకమైన స్పిన్నర్గా సేవలందిస్తున్న నరైన్ కోల్కతా టీమ్లో లేకపోవడం ముంబై జట్టుకు అదనపు బలం అనే చెప్పాలి. అలాగే కోల్కతా టీమ్ నిలకడగా ఆడడంలో విఫలమవుతోంది. టీమ్లో అంతర్జాతీయ స్థాయి బౌలర్లు ఉన్నా వారు ప్రత్యర్థి బ్యాట్స్మెన్ను నిలువరించడంలో విఫలమవుతున్నారు. ముఖ్యంగా ఆల్ రౌండర్ ఆండ్రూ రస్సెల్ వైఫ్యలం కోల్కతాను ఇబ్బందిపెడుతోంది. ఇప్పటివరకు జరిగిన ఏడు మ్యాచ్ల్లో రస్సెల్ కేవలం 71 పరుగులు మాత్రమే చేయగలిగాడు.
కోల్కతా జట్టు (అంచనా)
శుభ్మన్ గిల్, దినేష్ కార్తీక్, నితీష్ రాణా, ఇయాన్ మోర్గాన్, ఆండ్రూ రస్సెల్, టామ్ బాంటన్, రాహుల్ త్రిపాఠి, కమిన్స్, నాగర్కోటి, వరుణ్ చక్రవర్తి, ప్రసీద్ కృష్ణ.
ముంబై ఇండియన్స్ బలాలు
డిఫెండింగ్ ఛాంపియన్స్గా బరిలోకి దిగిన ముంబై ఇండియన్స్ టీమ్ ఈ సీజన్లోనూ అదే స్థాయి ఆటతీరుతో ఆకట్టుకుంటోంది. అద్భుతమైన బ్యాటింగ్ లైనప్, డెత్ ఓవర్లలో కూడా అద్భుతంగా బౌలింగ్ చేయగల బౌలర్లతో సమతూకంగా ఉంది. గత నాలుగు మ్యాచ్ల్లో ముంబై టీమ్ ఒక్కటి కూడా ఓడిపోలేదు. ఎప్పటిలాగానే రోహిత్ శర్మ భీకర ఫామ్లో ఉన్నాడు. రోహిత్తోపాటు డికాక్, సూర్య కుమార్ యాదవ్, ఇషాన్ కిషన్ కూడా పరుగల వరద పారిస్తున్నారు. ఇక, బౌలింగ్ విభాగంలో బుమ్రా, బౌల్ట్, ప్యాటిన్సన్, రాహుల్ చాహర్ అదరగొడుతున్నారు. అలాగే హార్దిక్ పాండ్యా, కృనాల్ పాండ్యా, కీరన్ పోలార్డ్ వంటి ఆల్ రౌండర్లూ మంచి ఫామ్లో ఉన్నారు. ఇక, ఇప్పటికే ఒకసారి కోల్కతాను ఓడించడం ముంబై టీమ్లో ఆత్మవిశ్వాసాన్ని పెంచుతోంది.
బలహీనతలు
వరుస విజయాలతో దూసుకుపోతుండడంతో ముంబై టీమ్లో బలహీనతలు బయటపడడం లేదు. అటు బౌలర్లు, ఇటు బ్యాట్స్మెన్ మంచి ఫామ్లో ఉండడం ముంబైని పెద్దగా బలహీనతలు లేని టీమ్గా నిలబెడుతోంది. అయితే మిడిలార్డర్ వైఫల్యం ఒక్కటే ముంబై టీమ్ను ఇబ్బంది పెడుతోంది.
ముంబై టీమ్ (అంచనా)
రోహిత్ శర్మ, డికాక్, సూర్యకుమార్ యాదవ్, ఇషాన్ కిషన్, హార్దిక్ పాండ్యా, కీరన్ పోలార్డ్, కృనాల్ పాండ్యా, ప్యాటిన్సన్, రాహుల్ చాహర్, ట్రెంట్ బౌల్ట్, బుమ్రా.
మ్యాచ్ ఫేవరెట్
ఈ మ్యాచ్లో డిఫెండింగ్ ఛాంపియన్స్ ముంబై ఇండియన్స్ ఫేవరెట్గా బరిలోకి దిగుతోంది. ఇప్పటికే ఒకసారి కోల్కతాను ఓడించడం టీమ్లో ఆత్మవిశ్వాసాన్ని పెంచుతోంది. కోల్కతా కంటే అన్ని విభాగాల్లోనూ మెరుగ్గా ఉంది. అయితే ఈ సీజన్లో కోల్కతా కూడా ఆశించిన స్థాయిలోనే రాణిస్తోంది. పాయింట్ల పట్టికలో నాలుగో స్థానంలో ఉంది. కాబట్టి ఈ మ్యాచ్లో హోరాహోరీ పోరు ఖాయం అని చెప్పొచ్చు.
