వైసీపీలో అంతర్గత కలహాలు, నాయకుల అహంకార ధోరణి మరోసారి రోడ్డెక్కాయి. ప్రతిపక్షంలో ఉన్నా ఆ పార్టీ నేతల తీరు మారలేదనడానికి తూర్పు గోదావరి జిల్లా కోరుకొండ మండలంలో జరిగిన ఘటనే నిదర్శనం అంటున్నారు. సొంత పార్టీ అభ్యర్థినే నమ్ముకోకుండా, కనీస గౌరవం ఇవ్వకుండా దౌర్జన్యానికి దిగిన వైసీపీ నేతల బరితెగింపు స్థానికంగా సంచలనం సృష్టించింది.
బుచ్చెంపేట గ్రామంలో వైసీపీకి చెందిన మాజీ ఎమ్మెల్యే, ఆ పార్టీ రాష్ట్ర యువజన విభాగం అధ్యక్షుడు జక్కంపూడి రాజా అరాచకం వెలుగులోకి వచ్చిందట. వైసీపీ ఎంపీటీసీ అభ్యర్థిగా ఉన్న అనపర్తి మణికంఠ తన నామినేషన్‌ను ఉపసంహరించుకుంటున్నారన్న సమాచారం పార్టీ వర్గాల్లో కలకలం రేపింది. ఈ విషయం తెలుసుకున్న జక్కంపూడి రాజా శుక్రవారం అర్ధరాత్రి ఒంటిగంటన్నర ప్రాంతంలో అర్ధరాత్రి పూట హడావుడిగా అనుచరులతో కలిసి గ్రామానికి చేరుకున్నారు.
నామినేషన్ ఎందుకు వెనక్కి తీసుకుంటున్నావంటూ మణికంఠను నిలదీశారట. ఈ క్రమంలో ఇద్దరి మధ్య తీవ్ర వాగ్వాదం జరిగిందని.. మాటలు పెరగడంతో విచక్షణ కోల్పోయిన జక్కంపూడి రాజా.. ఏకంగా తన చెప్పు తీసి సొంత పార్టీ అభ్యర్థి మణికంఠపై విసిరి దాడికి పాల్పడ్డారని ఆరోపిస్తున్నారు. పార్టీ కోసం పనిచేయాల్సిన నాయకుడే, కార్యకర్త అని కూడా చూడకుండా అర్ధరాత్రి రోడ్డుపై బహిరంగంగా చెప్పుతో కొట్టడం పట్ల తీవ్ర విమర్శలు వ్యక్తమవుతున్నాయి.
ఒకే పార్టీ శ్రేణుల మధ్య జరిగిన ఈ దాడి, తోపులాటతో ఆ ప్రాంతంలో ఉద్రిక్తత నెలకొంది. అయితే, సొంత నాయకుడి దౌర్జన్యంతో భయపడిపోయిన బాధితుడు అనపర్తి మణికంఠ నుంచి ఇప్పటివరకు పోలీసులకు ఎలాంటి ప్రత్యక్ష ఫిర్యాదు అందలేదు. అయినప్పటికీ, ఈ ఘటనపై గ్రామ రెవెన్యూ అధికారి ఇచ్చిన ఫిర్యాదు మేరకు శనివారం ఉదయం కోరుకొండ పోలీసులు కేసు నమోదు చేసి విచారణ జరుపుతున్నారు.
మరోవైపు, వైసీపీ నేతల అరాచకాలు, సొంత కార్యకర్తలకే రక్షణ లేని వైనంపై కూటమి నేతలు తీవ్రంగా స్పందించారు. రాజానగరం ఎమ్మెల్యే బత్తుల బలరామకృష్ణ, రుడా ఛైర్మన్ బీవీఆర్ చౌదరి, ఇతర కూటమి నాయకులు వెంటనే గ్రామానికి వెళ్లి బాధితుడు మణికంఠను, గ్రామస్థులను కలిసి ధైర్యం చెప్పారట. అధికారంలో లేకపోయినా వైసీపీ నేతల అహంభావం, సొంత కార్యకర్తల గొంతునొక్కే రాక్షస రాజకీయాలు ఇంకా పోలేదనడానికి ఈ ఘటనే ప్రత్యక్ష సాక్ష్యమని ప్రజలు మండిపడుతున్నారు.
