టాలీవుడ్లో యువ హీరోలంతా ఇప్పుడు ఫుల్ బీజీగా ఉన్నారు. ఎవరికి వారు కొత్త కాన్సెప్టులను ఎంచుకుంటూ తమ జోరు చూపిస్తున్నారు. తమకంటూ ఒక ప్రత్యేకమైన ఇమేజ్ ను సెట్ చేసుకోవడానికి గట్టిగానే ట్రై చేస్తున్నారు. యువ దర్శకులతో కలిసిపోయి ఒక టీమ్ గా ఏర్పడిపోయి, కథా చర్చల దగ్గర నుంచి తాము కూడా ఇన్వాల్వ్ అవుతూ వెళుతున్నారు. అలాంటి యువకథానాయకులలో ‘నాగశౌర్య‘ పేరు కూడా కనిపిస్తుంది. ఇప్పుడున్న యువ హీరోల్లో ఒడ్డూపొడుగు ఉన్న అందగాడిగా నాగశౌర్యకి అమ్మాయిల్లో మంచి ఫాలోయింగ్ ఉంది.
తెలుగు తెరపై విజయాలను అందుకోవడానికి నాగశౌర్య పెద్దగా కష్టపడలేదనే అనుకోవాలి. ‘ఊహలు గుసగుసలాడే’ .. ‘దిక్కులు చూడకు రామయ్య’ .. ‘జ్యో అచ్యుతానంద’ సినిమాలు ఆయనకు విజయాలను అందించాయి. లవర్ బాయ్ ఇమేజ్ ను తెచ్చిపెట్టాయి. ఇక ఆ మధ్య వచ్చిన ‘ఛలో’ సినిమా .. ఆయన కెరియర్లోనే పెద్ద హిట్ గా చెప్పుకోవచ్చు. ఈ సినిమా యూత్ కి ఆయనను మరింత దగ్గరగా తీసుకెళ్లింది. అయితే తన ఇమేజ్ కి తగిన కథలను కాకుండా కాస్త కొత్తగా ట్రై చేయడానికి నాగశౌర్య ప్రయత్నించాడు. ఆ నిర్ణయమే ఆయనకి సక్సెస్ దొరక్కుండా చేసింది.
యూత్ లో తనకి గల క్రేజ్ ను యూజ్ చేసుకోకుండా, ‘@నర్తనశాల’ .. ‘ అశ్వద్ధామ’ వంటి ప్రయోగాలు చేసి దెబ్బతిన్నాడు. ప్రస్తుతం ‘వరుడు కావలెను’ .. ‘లక్ష్య’ .. ‘పోలీసు వారి హెచ్చరిక‘ సినిమాలతో దూకుడుమీదే ఉన్నాడు. ఈ మూడు సినిమాల్లోను ఆయన పోషిస్తున్న మూడు పాత్రలు విభిన్నమైనవే కావడం విశేషం. ఈ ఏడాది వరుస సక్సెస్ లతో మరో మెట్టుపైకి చేరుకోవాలని అనుకుంటున్నాడు. కథాకథనాల విషయంలో ఎక్కువగా జోక్యం చేసుకుంటాడనే విమర్శ ఆయనపై ఉంది. అలాంటి విమర్శలకు ఆయన దూరంగా ఉంటూ దర్శకులపై బాధ్యత పెట్టడమే మంచిది. ఈ రోజున పుట్టినరోజు జరుపుకుంటున్న ఆయన, మరిన్ని విజయాలను అందుకోవాలని ఆశిద్దాం…
Must Read ;- వరుడుగా నాగశౌర్య బర్త్ డే సర్ ప్రైజ్.. !
