ఓటీటీ అనేది మనిషి జీవితంలో భాగం కాబోతోందా? ఓటీటీ సేవలు మున్ముందు ఇంకెన్ని రాబోతున్నాయి? లాంటి ప్రశ్నలకు సమాధానం తెలుసుకోవాల్సిందే. అభివృద్ది చెందిన దేశాల్లో ఇప్పుడు ఓటీటీదే హవా. డిజిటల్ ఫ్లాట్ ఫామ్స్ లో ఇప్పుడిదే పైచేయి సాధిస్తోంది. ఇప్పుడు ఈ ఓటీటీ లైవ్ టీవీల దిశగా అడుగులు వేస్తోంది.
ఓటీటీకి పూర్తి రూపం ఓవర్ ది టాప్. పేరుకు తగ్గట్టే అన్నిట్లోనూ ఇప్పుడిదే టాప్ గా నిలుస్తోంది. ఇప్పటికే కొన్ని ఓటీటీల్లో లైవ్ టీవీ ప్రసారాలు ఉన్నాయి. అమెజాన్, డిస్నీప్లస్ హాట్ స్టార్, జీ 5 లాంటి సంస్థలు లైవ్ టీవీ ప్రసారాలను ప్రారంభించాశాయి. నెట్ ఫ్లిక్స్ త్వరలోనే లైవ్ టీవీ ప్రసారాలను ప్రారంభించనుంది. ప్రస్తుతం ఫ్రాన్స్ లో ప్రయోగాత్మకంగా లైవ్ టీవీని ప్రారంభించింది. ఇది కేవలం వెబ్ బ్రౌజర్ల వరకే పరిమితమైంది. మొబైల్ యాప్స్ ద్వారా లైవ్ టీవీ లేదు. దీన్ని విస్తరించాలన్న ఆలోచనలో నెట్ ఫ్లిక్స్ ఉంది.
ఇక ముందంతా డిజిటల్ యుగమేనా?
డిజిటల్ ఫాట్ ఫారాలు పెరిగాక వీటి ప్రభావం ఇతర సాధనాలపై పడేలానే ఉంది. ఇప్పటికే ఓటీటీల కారణంగా సినిమా థియేటర్లకు కూడా ఇబ్బందికరంగానే ఉంది. ఇక ఓటీటీల ద్వారా లైవ్ టీవీ ప్రసారాలు కూడా మొదలైతే శాటిలైట్, యూట్యూబ్ లాంటి వేదికలకు కూడా గడ్డుకాలమే. వాటికి చందాలు ఎలాగూ కడుతున్నారు కాబట్టి ఇతర ఫ్లాట్ ఫారాల వైపు మొగ్గుచూపటం తక్కువగానే ఉంటుంది. ప్రకృతి వైపరీత్యాల వంటివి తలెత్తినప్పుడు శాటిలైట్ ప్రసారాలకు కూడా అంతరాయం కలుగుతోంది. ఏ కాస్త వర్షం కురిసినా డీటీహెచ్ ప్రసారాలకు కూడా అంతరాయం కలుగుతోంది. ఇక ఎంటర్ టైన్ మెంట్ టీవీలకు కూడా గడ్డుకాలంగానే చెప్పాల్సి ఉంటుంది. టెన్నాలజీలో కొత్త మార్పులు వచ్చినప్పుడు పాతవి వెనకడుగు వేయడం ఎప్పట్నుంచో జరుగుతోంది.
2007 నుంచే నెట్ ఫ్లిక్స్ ఓటీటీ ఆలోచన
నెట్ ఫ్లిక్స్ సంస్థకు 2007లోనే ఓటీటీ ఆలోచన వచ్చింది. SVOD అంటే సబ్ స్క్రిప్షన్ బేస్ డ్ వీడియో ఆన్ డిమాండ్.. అనే ఆలోచన నుంచి పుట్టిందే ఈ ఓటీటీ. టీవీ షోలు, సినిమాలను ఈ తరహాలో ప్రసారం చేయవచ్చన్న ఆలోచన వచ్చింది. దాంతో ఇతరులు కూడా నెట్ ఫ్లిక్స్ ను ఫాలో కావొచ్చన్న ఆలోచన వచ్చింది. కంటెంట్ ఒకరు ఇస్తే, ఇంకొకరు ప్రసారం చేయవచ్చన్న తరహాలోనే ఈ వ్యాపారం మొదలైంది. అమెజాన్ లాంటి సంస్థలకు హెబీఓ టీవీ కంటెంట్ ప్రొవైడర్ గా మారింది. కాలక్రమేణా అనేక ఓటీటీ సంస్థలు పుట్టుకొచ్చాయి.
ఒక దశలో తామే కంటెంట్ ప్రొవైడర్ గా కూడా మారాలన్న ఆలోచన కూడా ఈ సంస్థలకు వచ్చింది. ప్రస్తుతం లైవ్ స్ట్రీమింగ్ మీద ఈ సంస్థలు ఎక్కువగా దృష్టిపెడుతున్నాయి. ఓటీటీల్లో ఇప్పుడున్న కంటెంట్ కు ఇది అదనంగా తోడవుతుంది. యూట్యూబ్ లో వచ్చే ప్రతి కంటెంట్ ఓటీటీకి కూడా పనికొచ్చేలా మార్పులు చేర్పులు చేస్తున్నాయి. సాధారణంగా యూట్యూబ్ లో ఏదైనా కాపీ కంటెంట్ ఉంటే కొన్ని ఇబ్బందికర పరిస్థితులు ఏర్పడుతున్నాయి. పైగా యూట్యూబ్ ద్వారా వచ్చే ఆదాయం తక్కువ.
యూట్యూబ్ లో కూడా లైవ్ టీవీ ఆప్షన్ ఉంది. వీటినన్నిటినీ ఓటీటీ సంస్థలు సొంతం చేసుకోబోతున్నాయి. పైగా ఓటీటీలో వచ్చి ఇలాంటి కంటెంట్ కు యాడ్స్ ఉండవు. ఎలాంటి అవాంతరం లేకుండా వీటిని వీక్షించవచ్చు. లైవ్ టీవీ ఆప్షన్ కూడా వచ్చేస్తే శాటిలైట్ టీవీలకు కూడా కొంత ఇబ్బందే. కాకపోతే శాటిలైట్ టీవీలకున్న నెట్ వర్క్ ఓటీటీలకు ఉండదు. ఇలాంటి సంస్థలతో వీరు టైఅప్ పెట్టుకునే అవకాశాలు ఎక్కువ ఉన్నాయి. ప్రస్తుతం క్రీడా ప్రసారాలన్నీ లైవీ టీవీ ద్వారా ఓటీటీలు అందిస్తున్నాయి.
భవిష్యత్తులో ఈ తరహా పోటీ ఓటీటీల మధ్య ఎక్కువగా ఉండే అవకాశం ఉంది. కంటెంట్ లేకపోతే ఓటీటీ లాంటి పెద్ద కటౌట్ ఉన్నా ఏమీ చేయలేదు. అందుకే కంటెంట్ వేటలో ఈ ఓటీటీలు ఉన్నాయి. ఇప్పటిదాకా సినిమాలు, సీరియల్స్ ఒక్కటే వినోద సాధనం అనుకున్నాం. ఇప్పుడిలాంటి సాధానాలు ఇంకా పెరిగిపోయాయి. జనం అభిరుచులూ మారిపోతున్నాయి. వాటికి అనుగుణంగానూ ఓటీటీ సంస్థలు అడుగులు వేస్తున్నాయి.
ప్రాంతీయ ఓటీటీల మాట ఏంటి?
ప్రాంతీయ ఓటీటీలు కూడా తమ ప్రాంతీయ భాషల మీద పూర్తిగా కన్నేశాయి. ఇతర భాషల్లో వచ్చిన సినిమాల హక్కులు తీసుకుని వాటిని ఆయా ప్రాంతీయ భాషల్లోకి అనువదించి విడుదల చేస్తున్నాయి. వెబ్ సిరీస్, ఇతర కార్యక్రమాలను కూడా ఈ తరహాలోనే అనువదించి విడుదల చేస్తున్నాయి. ఇప్పటిదాకా సబ్ టైటిల్స్ మాత్రమే వేసి విడుదల చేసేవారు. ఇప్పుడు ఏకంగా వాటిని అనువదించి మరీ ప్రసారం చేస్తున్నారు. మన తెలుగులో ప్రాంతీయ ఓటీటీ ఆహా ఈ విషయంలో దూసుకుపోతోంది.
ఇప్పటికీ ఈ సంస్థకు 18 మిలియన్ల యూజర్లు ఉన్నారు. దీన్ని పూర్తి స్థాయి వినాద సాధనంగా మలిచేందుకు ఈ సంస్థ కృషిచేస్తోంది. చాలా మంది సినీ ప్రముఖులను ఈ కార్యక్రమాల్లో భాగస్వాములను చేస్తోంది. కొత్త తరహా కార్యక్రమాలకు రూపకల్పన చేస్తోంది. త్వరలోనే లైవ్ టీవీని కూడా ఈ సంస్థ ప్రారంభించినా ఆశ్చర్యపోవాల్సిన పనిలేదు. నెట్ ఫ్లిక్స్ లైవ్ టీవీ త్వరలోనే ప్రారంభం కానుంది. ‘ఆహా’ కూడా భవిష్యత్ టెక్నాలజీని దృష్టిలో ఉంచుకుని వేగంగా ముందడుగు వేస్తోంది.
– హేమసుందర్ పామర్తి
