ఒకప్పుడు ఆయన పేరు చెబితేనే ముఖ్యమంత్రి స్థానంలో ఉన్న వారు కూడా కాస్త వేగం తగ్గించేవారు. ఆయన ఏదైనా మాట్లాడుతున్నారంటెనే.. పనుల్ని పక్కన పెట్టి శ్రద్ధగా వినేటోళ్లు. రాష్ట్ర సీఎం నుంచి సాదాసీదా వ్యక్తి వరకు ఆయన మాటలకు అంత ప్రాధాన్యత ఇచ్చేవారు. కాలచక్రం ఎప్పుడూ ఒకేలా ఉండదు. ఓడలు బండ్లు.. బండ్లు ఓడలు కావటం సహజం. అయితే.. రాజకీయాల్లో హత్యలు ఉండవు.. ఉండేవన్ని ఆత్మహత్యలే అన్నట్లు.. నేతలు చేసే తప్పులు వారి భవిష్యత్తును డిసైడ్ చేస్తాయి. ఒకప్పుడు తన మాటలతో రాష్ట్ర ప్రభుత్వం నుంచి కేంద్రంలోని పెద్ద తలకాయిలు సైతం ఉలిక్కిపడే స్థాయి నుంచి.. ఇప్పుడు సగటు జీవి సైతం లైట్ తీసుకునే వరకు ఆయన స్థాయి వెళ్లింది. ఇంతకూ ఆయన ఎవరంటారా? తెలంగాణ మలిదశ ఉద్యమంలో కీలకంగా వ్యవహరించి..రాష్ట్ర సాధనలో భారీ షేర్ ఉన్న కోదండం మాష్టారు.
బాధ్యులెవరు?
అలాంటి వ్యక్తి ఇప్పుడు ఎలాంటి పరిస్థితుల్లో ఉన్నారో ప్రత్యేకంగా చెప్పాల్సిన అవసరం లేదు. ఎందుకిలా జరిగిందన్నది చూస్తే.. ఆయన చేతులారా చేసుకున్నదేనని చెప్పాలి. దీనికి తోడు.. ఆయన చుట్టు ఉన్న వారి మాటలు కూడా ఆయన్ను సరైన రీతిలో నడిచేలా చేయలేదని చెప్పాలి. తెలంగాణ ఉద్యమ సమయంలో ప్లానింగ్ మాస్టర్ గా.. తెలంగాణ వ్యాప్తంగా అత్యంత విశ్వసనీయత గల వ్యక్తిగా పేరున్న కోదండం మాష్టారు.. ఈ రోజున మందిలో ఒకరుగా మిగిలిపోయారు.
తెలంగాణ రాష్ట్ర సాధనలో జెఏసీ పేరుతో కీలకభూమిక పోషించిన ఆయన.. దాని క్రెడిట్ తీసుకునే విషయంలో ఆయన తటపటాయించటం దిద్దుకోలేని తప్పుగా చెప్పాలి. ఉద్యమంలో ఎంత ఉత్సాహంగా పని చేసినా.. రాజకీయ పునరేకీకరణలో కీలకంగా వ్యవహరించకపోతే అవకాశాలు కోల్పోవటం ఖాయం. కోదండం మాష్టారి విషయంలో జరిగింది కూడా ఇదే. ఎన్నికల వేళ అంటీముట్టనట్లుగా వ్యవహరించిన ఆయన.. కేసీఆర్ సర్కారు విషయంలోనూ ఆయన వ్యూహాత్మకంగా వ్యవహరించలేకపోయారు. రెండేళ్లు కామ్ గానే ఉన్నా.. ఆ తర్వాత అంశాల వారీగా గళం విప్పటం షురూ చేశారు.
అప్పటికే తెలంగాణ రాష్ట్రం మీదా.. పాలన మీదా కేసీఆర్ పూర్తిగా పట్టు సాధించటం ఒక ఎత్తు అయితే.. ఎప్పటికైనా కోదండం మాష్టారితో తనకు వచ్చే చికాకుల లెక్కల్ని పద్దతి ప్రకారం తీర్చేశారు గులాబీ బాస్. ఈ వ్యూహాన్ని మాష్టారు అర్థం చేసుకునేసరికి జరగాల్సింది మొత్తం జరిగిపోయింది. గాలి తనకు వాటంగా లేదన్న విషయాన్ని గుర్తించటంలో విఫలం కావటం.. రాంగ్ టైంలో కేసీఆర్ మీద పోరాటం షురూ చేయటం కోదండం మాష్టారు చేసిన చారిత్రక తప్పిదాల్లో ఒకటిగా చెప్పాలి. అప్పటికే కోదండం మాష్టారిని పట్టించుకోవటం మానేయటంతో పాటు.. తనకున్న శక్తియుక్తులతో ఆయన వాయిస్ బయటకు రాకుండా చేయటంలో కేసీఆర్ సక్సెస్ అయ్యారని చెబుతారు.
ఎక్కడ స్విచ్ వేస్తే.. మరెక్కడ లైటు వెలుగుతుందన్న విషయంలో పండిపోయిన కేసీఆర్ కు.. కోదండం మాష్టారిని కోరల్లేని పాముగా అందరూ అనుకునే వరకు తీసుకెళ్లారు. వ్యవస్థలకు అనుగుణంగా నడుచుకునే పాలకులు కొందరైతే.. వ్యవస్థల్ని తనకు అనుగుణంగా మార్చుకునే వారు మరికొందరు. కేసీఆర్ రెండో రకం. ఇక.. సందర్భానికి తగినట్లుగా తనను తాను మార్చుకోవటంలోకేసీఆర్ కున్నంత టాలెంట్ కోదండం మాష్టారికి లేదనే చెప్పాలి. సీమాంధ్రుల కాలికి ముల్లు గుచ్చుకుంటే నా పంటితో తీస్తానని అలవోకగా చెప్పేయటం కేసీఆర్ కు చాలా తేలికైతే.. అలాంటి మాటలు కోదండం మాస్టారి నోటి నుంచి రావటం చాలా కష్టం. చుట్టూ పరిమితులు పెట్టుకొని రాజకీయాలు చేయటం చాలా కష్టం. ఆ విషయాన్ని గుర్తించటంలో ఆయన విఫలమయ్యారు. అన్నింటికి మించి రాజకీయాలు.. ఉద్యమాలు ఒకేలాంటివి కావన్న విషయం తెలిసినా.. అమలులో మాత్రం ఫెయిల్ అయ్యారు.
చివరకు ఆయన పరిస్థితి ఎలా తయారైందంటే.. తాను ఎమ్మెల్సీగా పోటీ చేస్తున్న వేళ.. తనకు మద్దతు ఇవ్వాలని ఇంటికి వెళ్లి అడిగినా.. నో అంటే నో అన్న విషయాన్ని ముఖాన చెప్పేసే వరకు వెళ్లింది. ఒకప్పుడు ఆయన తమను కలిసేందుకు వస్తున్నారంటే.. ముఖ్యమంత్రితో సహా కేంద్రమంత్రులు సైతం ఫుల్ అలెర్టుగా ఉండేవారు. ఇప్పుడు ఆయన వస్తున్నారంటే.. ఇంటి పార్టీ లాంటి నేతలు సైతం లైట్ తీసుకునే వరకు వెళ్లింది. ఒకప్పుడు ప్లానింగ్ మాస్టర్ గా వ్యవహరించిన ఆయన.. ఇప్పుడు ప్లాప్ స్టార్ కు కేరాఫ్ అడ్రస్ గా నిలిచారు. రాజకీయాలు ఎంత కర్కసంగా ఉంటాయన్న దానికి కోదండం మాస్టారుకు మించిన ఉదాహరణ మరొకటి ఉండదేమో?
