హీరోయిజం ఎలివేట్ అవ్వాలంటే విలన్ కూడా అంత బలంగా ఉండాలి. ఇదే ఫార్ములాను సల్మాన్ ఫాలో అవుతున్నాడు. సల్మాన్ తాజా చిత్రం ‘రాధే’ రెండు రోజుల్లో ప్రేక్షకుల ముందుకు రానుంది. ఇందులో విలన్ గా రణదీప్ హుడా నటించాడు. డ్రగ్ కింగ్ పిన్ రానా పాత్రను రణదీప్ హుడా పోషించాడు. రాధేగా సల్మాన్, రానాగా రణదీప్ పాత్రల మధ్య బీభత్సమైన పోరాట సన్నివేశాలు ఇందులో ఉంటాయట. ఇటీవలి బ్లాక్ బస్టర్ చిత్రాల్లో ‘ఎవెంజర్స్: ఇన్ఫినిటీ వార్’లో విలన్ ఎంత పవర్ ఫుల్లో తెలిసిందే కదా.
‘ఎవెంజర్స్: ఎండ్గేమ్’ పరిస్థితి కూడా అంతే. థానోస్ లాంటి బలమైన విలన్ ఉండబట్టే ఆ సినిమాలు అంత కమర్షియల్ విజయాన్ని సాధించగలిగాయి. సినిమా అంటేనే మంచి చెడుల మధ్య జరిగే పోరాటం. అంతెందుకు ‘బాహుబలి’లో భల్లాలదేవ లాంటి బలమైన పాత్ర ఉండబట్టే ఆ సినిమా అంత పెద్ద విజయం సాధించగలిగింది. ఇక రాధే విషయానికి వద్దాం. ఈ సినిమా ట్రైలర్ కు వచ్చిన క్రేజ్ అంతాఇంతా కాదు. ఈ సినిమాలో వాష్ రూమ్ లో హీరో, విలన్ ల మధ్య వచ్చే ఫైట్ హైలైట్ గా నిలుస్తుందట. రణదీప్ నటన గురించి
ప్రత్యేకించి చెప్పాల్సిన పనిలేదు. గత ఏడాది ‘ఎక్స్ట్రాక్షన్’ లో క్రిస్ హేమ్స్వర్త్ తో అతను ఎలా తలపడ్డాడో తెలుసు. ముఖ్యంగా కార్ ఛేజ్, కత్తి పోరాట దృశ్యాలు హైలైట్ గా నిలిచాయి. హాలీవుడ్ హంక్ క్రిస్ హేమ్స్వర్త్తో సమానంగా తలపడటం మాటలు కాదు. అందుకే సల్మాన్ సినిమాలో అతన్ని విలన్ గా ఎంపిక చేశారు. సల్మాన్ తో ఇంతకుముందు ‘సుల్తాన్’లో కూడా అతను నటించాడు. ఈ నెల 13న ‘రాధే’ విడుదల కావలసి ఉంది. థియేటర్లలోనూ, జీ ప్లెక్స్ ఓటీటీలోనూ ఒకేసారి విడుదల చేయాలని నిర్ణయించారు. మరి ఇప్పుడున్న కరోనా పరిస్థితుల్లో ఈ సినిమా ఓటీటీలో మాత్రమే విడుదలయ్యే అవకాశం ఉంది.
