Thimmarusu Review :
కరోనా రెండో వేవ్ తర్వాత సినిమా థియేటర్లు ప్రారంభమయ్యాయి. ఓటీటీ స్టార్ గా పేరు సంపాదించిన సత్యదేవ్ హీరోగా రూపొందిన ‘తిమ్మరుసు’ చిత్రం ఈరోజు విడుదలైంది. శరణ్ కొప్పిశెట్టి దర్శకత్వంలో ఈస్ట్ కోస్ట్ ప్రొడక్షన్స్, ఎస్.ఒరిజినల్స్ పతాకంపై మహేష్ కోనేరు, సృజన్ ఈ చిత్రాన్ని నిర్మించారు. చాలా గ్యాప్ తర్వాత థియేటర్ లో విడుదలైన ఈ సినిమాకి ప్రేక్షకుల నుంచి ఎలాంటి స్పందన లభిస్తోంది? సినిమా ఎలా ఉంది? లాంటి విషయాలను తెలుసుకుందాం. ఈ రోజు మూడు సినిమాలు విడులయ్యాయి. ఈ సినిమాల ఫలితాలు ఎలా ఉంటాయన్న ఆసక్తి అటు ప్రజల్లోనూ చిత్ర వర్గాల్లోనూ ఉంది.
కథలోకి వెళితే..
న్యాయం కోసం పోరాడే ఓ లాయర్ కథ ఇది. రామచంద్ర (సత్యదేవ్) ఓ పాత కేసును తిరగతోడే వ్యవహారంలో ఏం సాధించాడు అన్నదే ప్రధాన కథ. ఓ క్యాబ్ డ్రైవర్ హత్యతో కథ మొదలవుతుంది. చివరికి ఆ హత్య వాసు (అంకిత్) అనే కుర్రాడి మెడకు చుట్టుకుంటుంది. ఫలితంగా అతను 8 ఏళ్లు జైలు శిక్షను అనుభవిస్తాడు. 2011లో ఈ హత్య జరుగుతుంది. వాసు జైలుపాలు కావడానికి పోలీస్ అధికారి భూపతి రాజు (అజయ్) కారణమవుతాడు. తిరిగి ఈ కథ 2019లో ప్రారంభమవుతుంది. లాయర్ రామచంద్ర ఈ కేసును మళ్లీ తిరగదోడతాడు.
కేసు లోపలికి వెళ్లే కొద్దీ కొత్త కొత్త విషయాలు బయటపడుతుంటాయి. ఈ కేసులో అతనికి సుధాకర్ (బ్రహ్మాజీ) సహాయకుడిగా ఉంటాడు. ఈ కేసును మళ్లీ తిరగదోడాల్సిన అవసరం రామచంద్రకు ఎందుకు ఏర్పడింది? ఈ విషయంలో వాసు అతనికి ఎలా సహకరించాడు? అసలు క్యాబ్ డ్రైవర్ హత్య వెనక ఎవరున్నారు? అన్నది ఇందులో కీలక అంశాలు. కొత్తగా వాలి అనే పాత్ర తెరపైకి వస్తుంది. వీటన్నిటినీ రామచంద్ర ఎలా ఛేదించాడు అన్నదే సినిమా.
ఎలా తీశారు? ఎలా చేశారు?
కథ కన్నా కథనంలో దర్శకుడు శరణ్ కొప్పిశెట్టి తన నైపుణ్యాన్ని చూపించాడు. స్క్రీన్ ప్లే ప్రధానంగా ఈ సినిమా సాగుతుంది. ఓ లాయర్ మైండ్ గేమ్ తో కథను ఆసక్తిగా నడిపించారు. సినిమా కోర్టు డ్రామాతో నడిచినా పోలీసు దర్యాప్తు తీరులోనే సాగుతుంది. కథ అల్లిన విధానంలోగానీ, సంభాషణల్లోగానీ, కథను నడిపించడంలోగాని దర్శకుడి ప్రతిభ అడుగడుగునా కనిపిస్తుంది. ఏంజరుగుతుందన్నది ఓ పట్టాన అంతుబట్టదు. కాకపోతే కొంతసేపు అసలు కథకన్నా కొసరు కథే కనిపిస్తుంది. తను ఏంచెప్పదలుచుకున్నాడో దాన్ని చెప్పడానికే దర్శకుడు ప్రాధాన్యమిచ్చినట్టు అనిపిస్తుంది.
కాన్సెప్ట్ మూవీస్ తెరకెక్కించడంలో ఉండాల్సిన లక్షణాలన్నీ దర్శకుడికి ఉన్నాయి. నేపథ్యం సంగీతం కూడా ఆకట్టుకుంది. కోర్టు డ్రామాగా ఈ సినిమా తెరకెక్కినా కోర్టు సన్నివేశాలు మాత్రం నామ్ కే వాస్తేగా ఉన్నాయి. ఈ విషయంలో దర్శకుడు సరైన శ్రద్ధ పెట్టలేదని అనిపిస్తుంది. క్లైమాక్స్ కు వచ్చేసరికి తేల్చేసిన భావన కనిపిస్తుంది. కోర్టు సెట్ చూస్తే అదేదో షాపులో కూర్చుని వాదోపవాదాలు జరిగిన భావన కలుగుతుంది.
న్యాయవాది రామచంద్ర పాత్రకు సత్యదేవ్ నూటికి నూరు శాతం న్యాయం చేశాడు. పాత్ర పరిధి మేరకే నటించాడు. అతను ఓటీటీ స్టార్ గా ఎదిగాడంటే అతని ప్రతిభే అందుకు నిదర్శనం. ఇక్కడ మెచ్చుకోదగిన పాత్ర సుధాకరే అనే సుధది. అదే బ్రహ్మాజీ పోషించిన పాత్ర. బ్రహ్మాజీలోని నటుడిని ఉపయోగించుకుంటే ఎలాంటి ఫలితం ఉంటుందో ఈ సినిమా నిరూపించింది. అతని టైమింగ్ కు ఎంజాయ్ చేయని ప్రేక్షకుడు అంటూ లేడు. అది సంభాషణల రచయిత ప్రత్యేకత అనాలో, వాటిని తనదైన టైమింగ్ తో పండించిన బ్రహ్మాజీ ప్రతిభ అనాలో చెప్పలేం. ఈ సినిమాని రెండో హీరోలా భుజాన వేసుకున్న పాత్ర ఇది.
అను అనే పాత్రను పోషించిన ప్రియాంక జావాల్కర్ కు అంతగా ఇంపార్టెన్స్ లేదు. ఏదో హీరోయిన్ ఉండాలి కాబట్టి పెట్టినట్టుంది. చివరికి ఈ కేసును రామచంద్ర వ్యక్తిగత జీవితానికి ముడిపెట్టి ముగించారు. అలా చేయడం కూడా బాగుంది. ఇక అంకిత్ విషయానికి వస్తే పాత్రలో అతను చక్కగా ఒదిగిపోయాడు. సత్యదేవ్, బ్రహ్మాజీ, దర్శకుడు శరణ్ లకే ఈ సినిమా క్రెడిట్ దక్కుతుంది.
Thimmarusu Review :
నటీనటులు: సత్యదేవ్, ప్రియాంక జవాల్కర్, బ్రహ్మాజీ, అజయ్, అల్లరి రవిబాబు, అంకిత్, ప్రవీణ్, ఆదర్శ్ బాలకృష్ణ, ఝాన్సీ, వైవా హర్ష, సంధ్యా జనక్ తదితరులు.
సాంకేతివర్గం: సంగీతం శ్రీచరణ్ పాకాల, కెమెరా అప్పూ ప్రభాకర్, కళ కిరణ్ కుమార్ మన్నె, ఫైట్స్ వెంకట్ మాస్టర్, నిర్మాతలు మహేష్ కోనేరు, సృజన్.
నిర్మాణం: ఈస్ట్ కోస్ట్ ప్రొడక్షన్స్, ఎస్.ఒరిజినల్స్
దర్శకత్వం: శరణ్ కొప్పిశెట్టి
విడుదల తేదీ: 30-07-2021
ఒక్క మాటలో: శుభారంభం
రేటింగ్: 3/5
– హేమసుందర్ పామర్తి
Must Read ;- దూకుడు మీదే ఉన్న సత్యాదేవ్!
