‘మేన్ ఆఫ్ ఎక్స్‌లెన్స్’గా విజయనగరం కలెక్టర్

(విజయనగరం నుండి లియో న్యూస్ ప్రతినిధి)

విజయనగరం జిల్లా క‌లెక్ట‌ర్ డాక్ట‌ర్ ఎం.హ‌రి జ‌వ‌హ‌ర్‌లాల్‌కు మేన్ ఆఫ్ ఎక్స్‌లెన్స్ అవార్డు ల‌భించింది. జిల్లా కలెక్టర్‌గా ఆయ‌న చేసిన సేవ‌ల‌ను గుర్తించిన ఢిల్లీకి  చెందిన ఇండియ‌న్ ఎచీవ‌ర్స్ ఫోర‌మ్ ఈ ప్ర‌తిష్టాత్మ‌క జాతీయ‌ పుర‌స్కారానికి ఆయనను ఎంపిక చేసింది. దేశంలో వివిధ రంగాల్లో సుదీర్ఘ‌కాలం పాటు ఉత్త‌మ సేవ‌లందించిన వారిని గుర్తించి, ఇండియ‌న్ ఎచీవ‌ర్స్ ఫోర‌మ్ గ‌త 20 ఏళ్లుగా ఈ అవార్డుల‌ను బ‌హూక‌రిస్తోంది. ‌ ఇప్ప‌టికే ఈ జిల్లాకు జాతీయ‌, రాష్ట్ర స్థాయిలో ఎన్నో అవార్డుల‌ను సాధించి పెట్టిన క‌లెక్ట‌ర్ హ‌రిజ‌వ‌హర్ లాల్‌ మ‌రో విశిష్ట పుర‌స్కారానికి ఎంపిక కావ‌డంతో ఆయ‌న‌ను జిల్లా ప్రజలు అభినందిస్తున్నారు.

జిల్లాకు వ‌రం

డాక్ట‌ర్ ఎం.హ‌రి జ‌వ‌హ‌ర్‌లాల్ క‌లెక్ట‌ర్‌గా రావ‌డం విజయనగరం జిల్లాకు వ‌రం అని జాయింట్ క‌లెక్ట‌ర్ డాక్ట‌ర్ జి.సి.కిశోర్‌కుమార్ కొనియాడారు. మేన్ ఆఫ్ ఎక్స్‌లెన్స్ పుర‌స్కారానికి ఎంపికైన క‌లెక్ట‌ర్‌ను ప‌లువురు ఉన్న‌తాధికారులు, పాత్రికేయులు, వివిధ శాఖ‌ల జిల్లా అధికారులు, సిబ్బంది శాలువ‌ల‌తో స‌త్క‌రించి, పూల‌గుచ్ఛాల‌తో అభినందించారు.  ఈ సంద‌ర్భంగా జెసి కిశోర్ మాట్లాడుతూ  క‌లెక్ట‌ర్ హ‌రి జ‌వ‌హ‌ర్‌లాల్‌ జిల్లాను అన్నివిధాలా అభివృద్దివైపు న‌డిపిస్తూ, ఇప్ప‌టికే ప‌లు అవార్డుల‌ను సాధించిపెట్టార‌న్నారు. జిల్లా ఖ్యాతిని ఇనుమ‌డింప‌జేసిన ఘ‌న‌త ఆయ‌న‌కే ద‌క్కింద‌ని ప్ర‌శంసించారు. జిల్లా రెవెన్యూ అధికారి ఎం.గ‌ణ‌ప‌తిరావు మాట్లాడుతూ ప్ర‌తి అంశంలోనూ జిల్లాను ఇత‌ర జిల్లాల‌కంటే ముందు ఉంచాల‌న్న త‌ప‌న క‌లెక్ట‌ర్‌లో చూసాన‌ని అన్నారు. కారుణ్య నియామ‌కాల్లో, స‌చివాల‌య ఉద్యోగాల భ‌ర్తీలో, ఆర్ఓఎఫ్ఆర్ ప‌ట్టాల పంపిణీలో క‌లెక్ట‌ర్ చూపించిన చొర‌వ ఇందుకు నిద‌ర్శ‌న‌మ‌ని పేర్కొన్నారు. జిల్లా స‌మాచార‌, పౌర సంబంధాల అధికారి డి.ర‌మేష్ మాట్లాడుతూ త‌న అపార అనుభ‌వంతో జిల్లాను క‌లెక్ట‌ర్ అన్ని విధాలా ముందుకు న‌డిపిస్తున్నార‌ని కొనియాడారు.

Must Read ;- సెల్యూట్ విజయనగరం పోలీస్.. పోగొట్టుకున్న డబ్బు బాధితునికి అందజేత    

సమష్టి కృషే

సానుకూల దృక్ఫ‌థం, స‌మష్టి కృషే త‌న విజ‌యానికి కార‌ణ‌మ‌ని జిల్లా క‌లెక్ట‌ర్ డాక్ట‌ర్ ఎం.హ‌రి జ‌వ‌హ‌ర్‌లాల్ పేర్కొన్నారు. త‌న‌కు మేన్ ఆఫ్ ఎక్స్‌లెన్స్ అవార్డు రావ‌డం ప‌ట్ల ఆయ‌న స్పందిస్తూ, జిల్లా యంత్రాంగాన్ని అభినందించారు. సృజ‌నాత్మ‌కంగా ప‌నిచేసేందుకు అవాకాశం రావ‌డం కూడా ఒక వ‌ర‌మ‌ని, దానిని విజ‌య‌న‌గ‌రం జిల్లా త‌న‌కు క‌ల్పించింద‌ని చెప్పారు. మ‌న‌స్ఫూర్తిగా ప‌ని చేసుకుపోవ‌డం, త‌న‌కు జిల్లా యంత్రాంగం నుంచి సంపూర్ణ స‌హ‌కారం అంద‌డం త‌న విజ‌యాల‌కు కార‌ణాల‌ని పేర్కొన్నారు.  మేన్ ఆఫ్ ఎక్స్‌లెన్స్‌గా త‌న‌ను గుర్తించ‌డ‌మే కాకుండా, విజ‌య‌న‌గ‌రం జిల్లా పేరును కూడా ఎన్ఐఐఆర్‌డి రికార్డుల్లో చిర‌స్థాయిగా నిలప‌డం త‌న‌కు సంతోషంగా ఉంద‌న్నారు.

Also Read;- ఒన్ షాట్ టూ బరడ్స్.. దటీజ్ బొత్స.