వైసిపికి అధికారం 5ఏళ్ల ముచ్చటేనా..? 2024లో ఓటమికివే ఉరితాళ్లా..?
దేవుడి స్క్రిప్టు అని పదేపదే వల్లెవేసే వైఎస్ జగన్మోహన్ రెడ్డి మాటలే ఇప్పుడాయన చెవుల్లో గింగుర్లు అంటున్నాయి. ఏ రెండు కేసులైతే ఆయన్ను ముఖ్యమంత్రిని చేశాయో, అవే కేసులు ఇప్పుడాయన మెడకు చుట్టుకోవడం దేవుడి స్క్రిప్టుగాక ఇంకేంటి..? మొన్ననే ఎమ్మెల్యేల కోటా ఎమ్మెల్సీ ఎన్నికల్లో 23ఓట్లతో టిడిపి అభ్యర్ధి పంచుమర్తి అనురాధ ఘనవిజయం సాధించడం కూడా దేవుడి స్క్రిప్టే అని తెలుగుదేశం నాయకుల వ్యంగ్యోక్తులు తెలిసిందే. ఈ నేపథ్యంలోనే వైఎస్ వివేకా హత్య కేసు, కోడికత్తి కేసు రెండూ జగన్మోహన్ రెడ్డిని, అధికార పార్టీ వైసిపిని బెంబేలెత్తిస్తున్నాయి, నిద్రలేని రాత్రులనే మిగిల్చాయి..
2014మార్చిలో జగన్ బాబాయి వైఎస్ వివేకానందరెడ్డి కిరాతక హత్యను ప్రతిపక్షం తెలుగుదేశంపైకి నెట్టి, నారాసుర రక్తచరిత్ర అని సొంత మీడియాలో రాసి, టిడిపి నేతలు ఆదినారాయణ రెడ్డి, బిటెక్ రవి చేత చంద్రబాబు, లోకేశ్ చేయించారని ఎన్నికల్లో ప్రచారంచేసి, ప్రజల్లో అపోహలు సృష్టించి, సానుభూతి ఓటు పొంది అధికారాన్ని కైవసం చేసుకున్నాడు. ఒక మాజీ ముఖ్యమంత్రి తమ్ముడు, ప్రస్తుత ముఖ్యమంత్రి బాబాయి హత్య కేసు విచారణ గత నాలుగేళ్లుగా నాన్చుతూ రావడం విదితమే.. ప్రతిపక్షంలో ఉన్నప్పుడు సిబిఐ విచారణ డిమాండ్ చేసిన జగన్ సీఎం అయ్యాక సిబిఐ అవసరం లేదనడం, సొంత అన్న ప్రభుత్వమే తనతండ్రి హత్య కేసు నీరుగార్చడం సహించలేక వివేకా కుమార్తె సుప్రీంకోర్టుకెళ్లి సిబిఐ విచారణ కోరడం, 3ఏళ్ల 3నెలలుగా సిబిఐ ఎంక్వైరీకి అడ్డంకులు సృష్టిస్తూ, రాష్ట్రప్రభుత్వ సహాయ నిరాకరణ ఏ స్థాయిలో ఉందో ప్రజల కళ్లముందే ఉంది. 4కోర్టులు, 5గురు ఎంక్వైరీ ఆఫీసర్లు, 4ఏళ్లుగా ఒక కొలిక్కితేని నేపథ్యంలో సుప్రీంకోర్టు స్పందించి కేశవ రామ్ చౌరాసియా నేతృత్వంలో ఇంకో సిట్ వేసి ఏప్రిల్ 30లోపు దర్యాప్తు పూర్తిచేయాలని ఆదేశించింది, తాజాగా ఆ గడువును మరో 2నెలలు (జూన్ 30కు) పొడిగించింది.
వివేకా హత్య కేసు దేశంలో వ్యవస్థలకే విషమ పరీక్ష అయ్యింది. సొంతూళ్లో, సొంతింట్లో, సొంతోళ్లే అతి కిరాతకంగా తలపై, ఛాతీపై 7గొడ్డలి వేట్లు, 2లీటర్ల రక్తపు మడుగులో హత్యకు గురైతే జగన్ అనుచరులు, సొంత మీడియా ఆ రోజు ఉదయమే గుండెపోటు అనడం, కొన్ని గంటల్లోనే దాన్ని మార్చేసి, హత్యగా పేర్కొంటూ, ఆ నింద తెలుగుదేశంపై వేయడం చూశాం..సిబిఐ అడుగుపెట్టి ఇప్పటికి 3ఏళ్ల 3నెలలైనా, ఇప్పటికీ వాళ్ల విచారణ సాఫీగా జరగకుండా అడుగడుగునా అడ్డంకులు సృష్టించిందీ జగన్ ప్రభుత్వమే..దర్యాప్తు అధికారి రాం సింగ్ ను బెదిరించడం, స్థానిక పోలీస్ స్టేషన్ లో కేసులు పెట్టడం, ఆయన కోర్టుకెళ్లి బెయిల్ తెచ్చుకోవడం, రాష్ట్ర ప్రభుత్వ సహాయ నిరాకరణకు మచ్చుకు కొన్నే..
నిందితుల తరఫున ఢిల్లీస్థాయిలో వందల కోట్లు వెదజల్లి అడ్వకేట్లను పెట్టి పిటిషన్ల మీద పిటిషన్లు వేయించి ఎంక్వైరీని అడ్డుకున్న విధానం గతంలో ఎన్నడూ చూడలేదు. ఈ 4ఏళ్లలోనే కొందరు సాక్షుల అనుమానాస్పద మరణాలు మరో ట్విస్ట్. ఎప్పటికప్పుడు ఇంప్లీడ్ అవుతూ కేసు విచారణ సజావుగా జరిగేందుకు వివేకా కుమార్తె డా సునీత పోరాటం ప్రజల మెప్పు పొందింది. ఆమె పోరాట ఫలితంగానే చిక్కుముళ్లన్నీ విడివడి హంతకులెవరో, హత్య కారణమేంటో తెలిసేసరికి ఏదోరకంగా దీన్ని నిలువరించాలనే కుట్రకోణంతో, అధికారం అండతో నిందితులు, వాళ్ల వెనుకనున్న అదృశ్యశక్తులు చేస్తున్న నీచయత్నాలు, కుయుక్తులు అన్నీఇన్నీకావు.
కడప ఎంపీ సీటు కోసమే తండ్రీ కొడుకులు(వైఎస్ భాస్కర రెడ్డి, అవినాశ్ రెడ్డి) ఈ హత్యకు స్కెచ్ వేశారని, రాజకీయంగా అడ్డుగా ఉన్న వివేకాను అంతం చేస్తేనే తమకు రాజకీయ భవిష్యత్ ఉంటుందని, ఇందులో ఎర్ర గంగిరెడ్డి,దస్తగిరి,గజ్జల ఉమాశంకర్ రెడ్డి, సునీల్ యాదవ్ పాత్రధారులు మాత్రమేనని, అసలు సూత్రధారులు తాడేపల్లి ప్యాలెస్ నుండే చక్రం తిప్పారనేది ప్రజాబాహుళ్యంలో జరుగుతోన్న విస్తృత చర్చ..
ఇప్పటికే సిబిఐ ఆ నలుగురితో పాటు కడప ఎంపి అవినాశ్ రెడ్డి తండ్రి వైఎస్ భాస్కర్ రెడ్డిని అరెస్టు చేయడం జరిగింది. అరెస్ట్ కు భయపడే అవినాశ్ హైదరాబాద్ నుండి పారిపోయి, అమ్మను అడ్డం పెట్టుకుని కర్నూలు ఆస్పత్రిలో దాక్కోవడం, అక్కడికొచ్చిన సిబిఐ అధికారులను అడ్డుకోమని ఇతర ప్రాంతాలనుంచి పెద్దఎత్తున అరాచకశక్తులను కర్నూల్లో మొహరించి, ఉద్రిక్తతలు సృష్టించడాన్ని దేశం మొత్తం చూస్తోంది.. అతనొక ఎంపీగా, శాసన కర్తల స్థానంలో ఉండి శాసనాలనే లెక్కచేయక పోవడం, చట్టాలనే ధిక్కరించడం, అటు సిబిఐని, ఇటు కోర్టులను లెక్కపెట్టనితత్వం ఎవరి అండ చేసుకుని అనేది చెప్పాల్సిన పనిలేదు…పైగా ఎవరు పురమాయిస్తే ఆసుపత్రి బైట అతనికి కాపలాగా వైసిపి ఎమ్మెల్యేలు, నాయకులు, కార్యకర్తలతో బైఠాయించారో చెప్పాల్సింది కాదు…ఇదే సామాన్యుడకైతే అదే సిబిఐ ఇన్ని వెసులుబాట్లు ఇస్తుందా, ప్రభుత్వాలిలా ప్రేక్షకపాత్ర పోషిస్తాయా అనేదానిపైనే చర్చోపచర్చలు..
ఇక రెండో కేసు కోడికత్తి కేసు గురించి…విశాఖ ఎయిర్ పోర్టులో ఇది జరిగి ఇప్పటికి 4ఏళ్ల 7నెలలు.. 2018 అక్టోబర్ 25న జగన్మోహన్ రెడ్డి తన పాదయాత్ర ముగించుకుని హైదరాబాద్ వెళ్లేందుకు విశాఖ ఎయిర్ పోర్టుకొస్తే, వీఐపి లాంజ్ లో జరిగిన ఉదంతమిది..జగన్ అభిమాని అయిన జల్లెపల్లి శ్రీనివాసరావు, ఆయన్ను సీఎం చేసేందుకు ప్రజల్లో సానుభూతి కోసమే ఇలా చేశానని, పొడిచేముందు దాన్ని స్టెరిలైజ్ చేశానని, ఆ చిన్నగాటుతో ఎలాంటి ఇబ్బంది ఉండదని, అదే విషయం జగన్ కు కూడా చెప్పాననే నిందితుడిచ్చిన వాంగ్మూలం గమనార్హమైనది..పెద్దపెద్ద హత్యల్లో నిందితులైనవాళ్లు స్వేచ్చగా తిరుగుతుంటే, తన కొడుకిలా నాలుగున్నరేళ్లుగా జైల్లో మగ్గుతున్నాడని చెప్పుకోడానికి వచ్చిన శ్రీనివాస రావు తల్లిని కలిసేందుకు కూడా జగన్మోహన్ రెడ్డి నిరాకరించడాన్ని ఏమనాలి, ఎలా చూడాలి..
ఈ కేసులో బాధితుడైన జగన్మోహన్ రెడ్డి సాక్ష్యమిచ్చేందుకు కనీసం కోర్టుకెళ్లకుండా కొన్నేళ్లుగా ఎగ్గొట్టడం వెనుక మర్మం ఏమిటనేదే ప్రజలందరి ప్రశ్న.. ముఖ్యమంత్రినైన తాను కోర్టుకొస్తే ట్రాఫిక్ జామ్ అవుద్దని, సీఎం షెడ్యూల్ బిజీ వల్ల రాలేకపోతున్నానని, తానొస్తే సంక్షేమ పథకాల అమలుకు అంతరాయాలు కల్గుతాయనే కుంటిసాకులతో ఇన్నేళ్లుగా నెట్టుకొచ్చారు, పదేపదే పిటిషన్ల మీద పిటీషన్లు వేస్తున్నారు. నాలుగున్నరేళ్లుగా జైల్లో మగ్గుతున్న శ్రీను లైఫ్ షెడ్యూలే(జీవితమే) దెబ్బతింది మరి దానిమాటేంటి..?
కొడుకు దూరమై తీవ్ర మానసిక క్షోభతో వృద్ధాప్యంలో తల్లడిల్లుతున్న అతని తల్లిదండ్రుల మాటేంటి..? ఒక మనిషి జీవితం కన్నా ట్రాఫిక్ జామే ఎక్కువా, సీఎం షెడ్యూలే ఎక్కువా..? ఆ మాటకొస్తే ముఖ్యమంత్రి పర్యటనల సందర్భంగా ప్రతిరోజూ ఆయా నగరాల్లో, ప్రాంతాల్లో ట్రాఫిక్ జామ్ లు అవడం లేదా..? శ్రీకాకుళం జిల్లా పర్యటన సందర్భంగా ఎక్కడో 138కిమీ అవతల ఒడిశా సరిహద్దులోనే లారీలు ఆపేసి 13గంటలపాటు ట్రాఫిక్ జామ్ లో నరకం చూపించిన మాటేంటి..? వాటికి లేని ట్రాఫిక్ జామ్ లు, కోడికత్తి శీను కేసులో కోర్టుకెళ్లేందుకే అడ్డొస్తుందా..?
4ఏళ్ల క్రితం 2019జనవరి 17న ఏ క్యాసెట్ అయితే వేశారో అదే కేసెట్ వేశారు తాజా పిటిషన్ లో కూడా..కుట్ర కోణమని మళ్లీ ఈ పిటిషన్ లోనూ జగన్మోహన్ రెడ్డి పేర్కొన్నారు..ఇందులో ఏమాత్రం కుట్రకోణం లేదని నేషనల్ ఇన్వెస్టిగేషన్ అథారిటీ(ఎన్ ఐఏ) చెప్పింది..కోడికత్తి కేసులో లేని కుట్రకోణంపై ఏదో ఉందన్నట్లుగా, వివేకా హత్య కేసులో ఉన్న కుట్ర కోణాన్ని లేనట్లుగా పిటిషన్లపై పిటిషన్లు వేయడాన్ని ప్రజలే నిర్ద్వంద్వంగా ఖండిస్తున్నారు. ఎవరో సినీనటుడు ఎప్పుడో చేసిన వ్యాఖ్యలను అడ్డం పెట్టుకుని నిజంగానే అది ‘ఆపరేషన్ గరుడ’ అంటూ అప్పటి కాక్ అండ్ బుల్ స్టోరీతో కోడికత్తి కేసును ముడిపెట్టడం నిజంగా హాస్యాస్పదమే..
ఎన్నికల చివరి ఏడాది జగన్ గ్రాఫ్ ఇప్పటికే తిరగబడింది..సర్వేలన్నీ వైసిపి ఓటమి ఖాయమనేది పేర్కొంటున్న నేపథ్యంలో, ముఖ్యమంత్రి గ్రాఫ్ 10-15% పతనమైందని, సీఎంగా దేశంలో 19వ ర్యాంకులో ఉన్నాడనే వార్తలతో గాభరా మొదలైంది..ఇటీవల జరిగిన గ్రాడ్యుయేట్ల ఎమ్మెల్సీ ఎన్నికల్లో ఉత్తరాంధ్ర, కోస్తా, రాయలసీమ మూడుప్రాంతాల్లో మొత్తం 3స్థానాల్లో వైసిపి ఘోరంగా ఓటమికి బేజారెత్తారు.. ఎమ్మెల్యేల కోటా ఎమ్మెల్సీ ఎన్నికల్లో టిడిపి బిసి అభ్యర్ధిని పంచుమర్తి అనురాధ ఘన విజయం గోరుచుట్టుమీద రోకటి పోటయ్యింది.
నాలుగేళ్ల జగన్మోహన్ రెడ్డి పరిపాలనలో సాధించింది శూన్యమనేది ప్రజల్లోకి బలంగా వెళ్లింది. పోలవరం సహా 3ప్రాంతాల్లో నీటిపారుదల ప్రాజెక్టుల నిర్మాణ పనులు పడకేయించడం, అమరావతిలో రూ 2లక్షల కోట్ల సంపద ధ్వంసం చేయడం, 3రాజధానుల పేరుతో మూడు ముక్కలాట, నాలుగేళ్లలో 400 ఇళ్లు కూడా పేదలకు నిర్మించక పోవడం, వాటాల కోసం బెదిరించి కంపెనీలను పారిపోయేలా చేయడం, పెరిగిన నిరుద్యోగం, పేదల స్కీముల్లోనూ స్కాములకు పాల్పడటం, ల్యాండ్-శాండ్ మాఫియా, వైన్ –మైన్ మాఫియాలకు అదనంగా గంజాయి బ్యాచ్, బ్లేడ్ బ్యాచ్ అరాచక శక్తుల స్వైర విహారం, అశాంతి-అభద్రత, రూ 11లక్షల కోట్ల అప్పులతో రాష్ట్రం దివాలా తీసే స్థితికి చేరిన నేపథ్యంలో తెలంగాణ మంత్రుల అవహేళనలు, ఎగతాళిపై ప్రజానీకంలో ఆగ్రహావేశాలున్నాయి.
ఈ పరిస్థితుల్లో ఏ రెండు కేసులైతే(వివేకా హత్య, కోడికత్తి) జగన్మోహన్ రెడ్డిని గద్దెనెక్కించాయో ఆ రెండు కేసులే ఇప్పుడాయన ప్రభుత్వానికి, పార్టీకి ఉరితాళ్లుగా మారాయనేది అక్షర సత్యం..ఎవరినీ ఎక్కువకాలం మోసం చేయలేం, ఎప్పుడో ఒకప్పుడా మోసం బైటపడక తప్పదు, అందుకు తగ్గ శిక్ష తప్పదనేది చరిత్ర చెప్పిన సత్యం.
