అవును వాళ్లిద్దరు కలిసి ఉద్యమంలో అడుగులు వేశారు. ఒకరి మనసు ఒకరు తెలుసుకున్నారు. ఇద్దరి అభిప్రాయాలను పంచుకున్నారు. ఒకరు బీసీ, మరొకరు రెడ్డి. అయితేనేం ఏడు అడుగులు వేశారు. దాంపత్య జీవితం పంచుకున్నారు. ఈటల రాజేందర్ ఒక తెలంగాణ ఉద్యమకారుడు. ఒక మంత్రిగానే అందరికీ పరిచయం. కానీ ఆయనకు ప్రేమకథ ఉందనే విషయం చాలామందికి తెలియదు. ఈటల రాజేందర్ తొమ్మిదో తరగతిలోనే హైదరాబాద్ కు వచ్చాడు. ఒకవైపు చదువుతూనే, మరోవైపు ఉద్యమాల్లో చురుగ్గానే పాల్గొనేవారు. పీడీఎస్ యూ నాయకుడిగానూ పనిచేశారు. ఆ సమయంలోనే ఈటలకు జమున పరిచయమయ్యారు. విద్యార్థి దశలోనే ప్రేమ చిగురించింది. జమున అన్నయ్యలు కూడా ఈటలకు ఫ్రెండ్స్ కావడం, తరచుగా ఒకరి ఇంటికి ఇంకొకరు వెళ్తుండటం.. కలిసి పనిచేయడం… లాంటివన్నీ ప్రేమకు దారి తీసాయి.
ఈటల ఫస్ట్ స్టెప్
చిన్నవయసులోనే ఒకరికొకరు ఇష్టపడినా.. డిగ్రీలు పూర్తి చేసినా పెళ్లి ప్రపోజల్ కు మాత్రం చాలా సమయమే పట్టింది. ఇదరి మనసులు కలిసినప్పటికీ, ప్రేమను వ్యక్తం చేయడానికి ఎన్నో ఏళ్లు పట్టింది. అయితే ఈటలనే మొదటగా ధైర్యం చేసి ‘నువ్వంటే నాకిష్టం’ అని చెప్పారు. జమునకు కూడా ఇష్టం ఉండటంతో ఓకే అన్నారు. కానీ ఒక్కటి కావడానికి మాత్రం ఎన్నో ఇబ్బందులను ఎదుర్కొన్నారు. కారణం ఇద్దరు కులాలు వేరు. ఒకరు బీసీ అయితే, మరొకరు రెడ్డి. అందుకే పెద్దలు అంత ఈజీగా ఒప్పుకోలేదు.
పెద్దలను ఒప్పించి…
అప్పట్లో పెళ్లి అంటే అంత ఈజీ కాదు. ఆర్థిక సమస్యలు, కుల కట్టుబాట్లు లాంటివి ఎన్నో ఆలోచనకు వస్తుండేవి. పెళ్లి ప్రస్తావన రాగానే.. ఈటల కుటుంబ సభ్యులు ఓకే చెప్పినా.. జమున ఫ్యామిలీ మెంబర్స్ ‘నో’ అన్నారు. దీంతో ఈటల జమున అన్నయ్యలతో మాట్లాడారు. అంతా తెలిసినా.. తమకేమి తెలియదన్నట్టే ఉండిపోయారు. ఇలా.. రోజులు, నెలలు, సంవత్సరాలు గడిచాయి. చివరకు ‘జమున మనసులో ఈటల ఉంది’ అని తెలుసుకున్నారు. ఇరువురు పెద్దలు పెళ్లికి ‘ఓకే’ చెప్పారు. అందుకే ఈటల దంపతులకు కుల పట్టింపు ఉండదు. వాళ్ల పిల్లలకు పూర్తి స్వేచ్ఛనిచ్చేవాళ్లు. రెడ్డి, బీసీ అనే తెడా లేకుండా పెంచి పెద్ద చేసి సక్సెస్ అయ్యారు.
తోడు-నీడ
మొదట్నుంచీ ఈటల రాజేందర్ ది ఉద్యమపంథా. అందుకే విద్యార్థి నాయకుడిగా పనిచేశారు. ఆ తర్వాత తెలంగాణ ఉద్యమానికి ఆకర్షితులై కేసీఆర్ తో కలిశారు. తెలంగాణ ఉద్యమంతో తనవంతు పాత్ర పోషించారు. ఎక్కవ సమయం ఉద్యమానికే టైం కేటాయిస్తుండేవారు. ఈటల మనసు తెలుసు ఏంటో తెలుసు కనుక జమునగారు సపోర్ట్ గా ఉంటూ వస్తున్నారు. జీవితంలో స్థిరపడేందుకు ఈటల ఎంతో శ్రమించారో, ఆయన వెనుక ఉండి జమునగారు అంతే కష్టపడ్డారు. ఈటల విజయాల్లో కీలకంగా వ్యవహరించారు. తెలంగాణ ఉద్యమం నాటి నుంచి స్వరాష్ర్టం ఏర్పడే వరకు.. ఈటల అడుగులో అడుగు వేశారు. ఆర్థిక మంత్రిగా, ఆరోగ్య శాఖ మంత్రిగా ఈటల నిత్యం బిజీబీజీ జీవితం గడిపినా, జమున మాత్రం కుటుంబ వ్యవహరాలను చాలా చక్కగా నిర్వర్తించేవాళ్లు. అనోన్యంగా జీవిస్తూ అందరికీ ఆదర్శమయ్యారు. దాదాపు 30 ఏళ్ల జీవితంలో సినిమాలు, షికార్లు లేకున్నా.. ‘‘మేము చాలా హ్యపీగా ఉంటాం’’ అని చెప్తున్నారు ఈటల రాజేందర్ దంపతులు.
