ఏపీ ప్రభుత్వం కొవిడ్ నియంత్రణ విషయంలో వైఫల్యాలపై మాట్లాడేందుకు టీడీపీ అధినేత, మాజీ సీఎం చంద్రబాబు నాయుడు బుధవారం ఆన్ లైన్ ద్వారా పత్రికా విలేకరుల సమావేశం ఏర్పాటు చేశారు. ఈ సమావేశంలో చంద్రబాబు మాట్లాడుతుండగా ఆయన సతీమణి నారా భువనేశ్వరి ఆకస్మికంగా ఎంట్రీ ఇచ్చారు. దీంతో చంద్రబాబునాయుడు ఆశ్చర్యపోవాల్సి వచ్చింది. అదే సమయంలో వీరిద్దరిని చూసిన టీడీపీ అభిమానులు సీతారాములుతో పోల్చుతూ సంతోషం వ్యక్తం చేస్తున్నారు. రెగ్యులర్‌గా చంద్రబాబు ఆన్ లైన్ మీటింగ్‌లు నిర్వహించే గదిలో బుధవారం ఆన్ లైన్ ప్రెస్ మీట్ ఏర్పాటు చేశారు. చంద్రబాబు మాట్లాడుతుండగా అల్పాహారం తీసుకుని భువనేశ్వరి వచ్చారు. అనుకోకుండా చోటు చేసుకున్నఈ పరిణామానికి చంద్రబాబు కూడా ఒకింత సర్‌ప్రైజ్ అయ్యారని చెప్పవచ్చు. ఆ స్నాక్స్ ఎక్కడ పెట్టాలనే డౌట్‌తో భువనేశ్వరి ఆలోచిస్తుండగా పక్కనే పెట్టమని సైగ చేశారు చంద్రబాబు. వెంటనే వెళ్లిపోయారు భువనేశ్వరి. సాధారణంగా ఆ స్థాయి నాయకులే కాదు..కాస్త చిన్న స్థాయి నాయకులైనా సహాయకులే ఎంట్రీ ఇస్తారు. అయితే చంద్రబాబు వ్యక్తిగత విషయాలు, ఆరోగ్యం,ఆహారం విషయంలో నారా భువనేశ్వరి చాలా కేర్ ఫుల్‌గా ఉంటారని చంద్రబాబు ఫ్యామిలీకి దగ్గరగా ఉన్నవారు చెబుతుంటారు. ఇదే మరోసారి రుజువైందని చెప్పవచ్చు.
గతంలోనూ భర్తకు బాసటగా..
14ఏళ్ల పాటు ముఖ్యమంత్రి, దాదాపు అదే సమయంలో ప్రతిపక్ష నేత, 40 ఏళ్ళ రాజకీయ అనుభవం, జాతీయ స్థాయిలో విజనరీ లీడర్‌గా గుర్తింపు ఉన్న ఏ నేత అయినా..కాస్త దర్పం ప్రదర్శిస్తారు. కాని చంద్రబాబు విషయంలో కేవలం హుందాతనమే ఉంటుందని, సింప్లిసిటీకి ప్రాధాన్యం ఇస్తారని చెబుతుంటారు. అదే సమయంలో చంద్రాబాబుకు అండగా ఆయన భార్త భువనేశ్వరి పలుమార్లు క్షేత్రస్థాయికి కూడా వచ్చారు. అందులో కొన్ని పరిశీలిస్తే.. రాష్ట్రంలో మూడు రాజధానుల ఏర్పాటుకు వ్యతిరేకంగా అమరావతి ప్రాంతంలో ప్రదర్శనలు, ఆందోళనలను చేపట్టిన రైతులకు నారా భువనేశ్వరి బాసటగా నిలిచారు. రెండుసార్లు క్షేత్రస్థాయికి వచ్చారు. రైతు సంక్షేమం కోసం తనవంతు సాయంగా ప్లాటినం గాజును విరాళంగా ఇచ్చారు.ఇటీవల చంద్రబాబును విశాఖపట్నం విమానాశ్రయంలో పోలీసులు నిర్భందించిన విషయం తెలిసిందే. ఈ చర్యతో ఆగ్రహించిన చంద్రబాబు విమానాశ్రయంలోనే భైఠాయించి ధీక్ష చేశారు. విషయం తెలుసుకున్ననారా భువనేశ్వరి హుటాహుటిన విశాఖకు వెళ్లారు. విమానాశ్రయంలోని వీఐపీ లాంజ్‌లో చంద్రబాబును కలిసి మాట్లాడారు. ఉదయం నుంచి జరిగిన పరిణామాలను అడిగి తెలుసుకున్నారు. చంద్రబాబును విశాఖ పట్నం ఎయిర్ పోర్టులో నిర్భందించిన విషయం తెలుసుకున్న టీడీపీ శ్రేణులు ఎయిర్ పోర్టుకు చేరుకున్నారు. గతంలో ఏపీకి ప్రత్యేక హోదా విషయంలో జరుగుతున్న దీక్షల్లోనూ భువనేశ్వరి పాల్గొన్నారు.
ఇక తాజాగా చంద్రాబాబు ప్రెస్ మీట్‌లో భువనేశ్వరి ఎంట్రీ వీడియో సోషల్ మీడియాలో వైరల్ అవుతోంది. వాస్తవానికి ప్రెస్ మీట్ నిర్ణీత షెడ్యూల్ కంటే పదినిమిషాల ముందు మొదలు కావడంతో ఆ విషయం భువనేశ్వరికి తెలియదని, ప్రెస్ మీట్‌కి ముందే అల్పాహారం ఇచ్చేందుకు వచ్చారని పార్టీ వర్గాలు చెబుతున్నాయి. కొన్నాళ్ల క్రితం చంద్రబాబు ఆన్ లైన్‌లో మాట్లాడుతుండగానే ఆయన మనుమడు దేవాన్ష్ ఎంట్రీ ఇచ్చిన విషయం తెలిసిందే.
