ఏపీ బీజేపీ నేతల వ్యాఖ్యలు మాజీ ముఖ్యమంత్రి, వైసీపీ అధినేత జగన్ మోహన్ రెడ్డిని టెన్షన్ పెడుతున్నాయనే చర్చ జరుగుతోంది.. ఇటీవల ఏపీ బీజేపీ చీఫ్ మాధవ్, తాజాగా విశాఖ ఎమ్ఎల్ఏ విష్ణు కుమార్ రాజుతోపాటు ఏపీకి చెందిన పలువురు కమలనాధులు చేస్తున్న కామెంట్స్ వైసీపీలో ఆందోళన పెంచుతున్నాయనే విశ్లేషణలు సాగుతున్నాయి.. జగన్ తప్పించుకోలేడని, లిక్కర్ స్కామ్లో పక్కా ఆధారాలు లభించాయని, జైలుకి వెళ్లడం ఖాయమని మాధవ్ ఇటీవల వ్యాఖ్యానించారు.. తాజాగా విష్ణుకుమార్ రాజు సైతం ఇవే కామెంట్స్ చేశారు.. బిగ్ బాస్ త్వరలోనే అరెస్ట్ అవడం ఖాయమని తేల్చి పారేశారు..
ఏపీ బీజేపీ దూకుడు జగన్ని టెన్షన్ పెడుతోంది. బీజేపీలోని కొందరు నాయకులు 2019 నుండి 24 వరకు జగన్కి సహకరించారనే ఆరోపణలు ఉన్నాయి.. అధికారంలో ఉన్న వైసీపీకి కొమ్ముకాశారనే వాదన ఉంది.. వైసీపీతో పొత్తు లేకపోయినా, ఆ పార్టీపై ఈగ వాలనివ్వలేదు కొందరు కమలనాధులు.. అయితే, ఏడాదిన్నరగా రాజకీయ సమీకరణాలు మారిపోయాయి.. బీజేపీ .. టీడీపీ, జనసేనతో పొత్తు పెట్టుకుంది.. ఇటు, రాష్ట్రంలో, అటు కేంద్రంలో మూడు పార్టీలు కలిసి ప్రభుత్వాలను ఏర్పాటు చేశాయి.. దీంతో, జగన్ టార్గెట్ చేస్తున్నారు బీజేపీ నేతలు..
టీడీపీ, జనసేన కంటే దూకుడుగా బీజేపీ నేతలు జగన్ అరెస్ట్పై తీవ్ర వ్యాఖ్యలు చేస్తుండడం వైసీపీకి మింగుడు పడడం లేదు.. కేంద్రంలోని పెద్దలు ముఖ్యంగా, ప్రధాని మోదీ, హోమ్ మంత్రి అమిత్ షా నుండి వచ్చిన కీలక ఆదేశాల మేరకే రాష్ట్ర బీజేపీ నేతలు రెచ్చిపోతున్నారని వైసీపీ హైకమాండ్కి అందుతోన్న సమాచారంగా భావిస్తున్నారు.. లిక్కర్ స్కామ్లో సిట్ దర్యాప్తు, వెలుగులోకి తీసుకువస్తున్న ఆధారాలను చూసి వైసీపీ నేతలే ఖంగు తింటున్నారు.. ఇంత అడ్డంగా, కోట్ల రూపాయల డంప్లతో బయటపడుతుండడాన్ని సొంత పార్టీ నేతలే జీర్ణించుకోలేకపోతున్నారు.. తమ పార్టీలోని కీలక నేతలు అడ్డంగా బుక్ అవడం ఖాయమని తాడేపల్లి ప్యాలెస్లో చర్చ సాగుతోంది.. మీడియా ఊహాగానాలకు, బీజేపీ నేతలు శృతి కలుపుతుండడం, జగన్ అరెస్ట్పై కమలనాధుల వరస వ్యాఖ్యలు చేస్తుండడం వైసీపీ నేతలను మరింత టెన్షన్ పెడుతోంది..
గతంలో జగన్ని భుజాన వేసుకోవడానికి కొందరు బీజేపీ నేతలు ముందుకు వచ్చేవారు.. తాజాగా సీన్ మారిపోవడంతో ఆ నేతలు మీడియా ముందుకు రావడం లేదు.. హైకమాండ్ దగ్గర వీరి తప్పుడు రిపోర్టులకు కాలం చెల్లింది.. జగన్ని సమర్ధిస్తే తమకు నూకలు చెల్లినట్లేనని భావించడంతోపాటు, ఢిల్లీ నుండి క్లియర్ కట్గా అందిన సంకేతాల ఆధారంగానే ఈ నేతలు రెచ్చిపోతున్నారని రాజకీయ పరిశీలకులు భావిస్తున్నారు.. వీరి వ్యాఖ్యలను పరిశీలిస్తే జగన్ అరెస్ట్ ఎప్పుడు అనేది త్వరలోనే తేలే చాన్స్ కనిపిస్తోంది.
