( విశాఖపట్నం నుంచి లియో న్యూస్ ప్రతినిధి)
టిడిపి మాజీ మంత్రి, విశాఖ ఉత్తర నియోజకవర్గం ఎమ్మెల్యే గంటా శ్రీనివాసరావు కు కాలం కలిసి వస్తున్నట్లు లేదు. ఏ పార్టీ మారినా మంచి హోదాలో కొనసాగే ఆయన గత కొంత కాలంగా ఎమ్మెల్యే గానే కాలం వెళ్లదీయవలసి వస్తోంది. అధికార పార్టీ లోకి జంప్ చేసి అదృష్టం పరీక్షించుకుందామని అనుకుంటే.. అదీ కుదరడం లేదు. దేవుడు వరమిచ్చినా పూజారి కరుణించలేదు అన్నట్టు.. ఆయన చేరికకు పార్టీ హైకమాండ్ గ్రీన్ సిగ్నల్ ఇచ్చినా, స్థానిక సమీకరణలు, అభ్యంతరాల కారణంగా వాయిదాలు పడుతూ వస్తోంది.
తాజాగా ఆయనకు సంబంధించిన కొన్ని ఆస్తులు వేలం వేసేందుకు ఇండియన్ బ్యాంక్ ప్రకటన జారీ చేసింది. బ్యాంకు నుంచి తీసుకున్న రుణం చెల్లించడంలో విఫలం కావడంతో ఆ మొత్తం రూపాయలు 248 కోట్లకు చేరడంతో చట్టం ప్రకారం ఆస్తులు విక్రయించి రికవరీ చేసే ప్రయత్నం చేస్తోంది. ఈ నెల 25న ఈ వేలం ప్రక్రియ నిర్వహించనున్నారు. ఈ మేరకు ఇప్పటికే బ్యాంకు ఈ – ఆక్షన్ నోటీసు జారీ చేసింది. వేలం వేయనున్న ఈ ఆస్తుల్లో గంటా శ్రీనివాసరావుకు చెందిన ప్రాపర్టీస్ కూడా ఉన్నాయి.
ప్రత్యూష కంపెనీలో పార్ట్నర్ కావడంతో ఆస్తుల వేలం తప్పడం లేదు. ప్రత్యూష కంపెనీ ఓనర్లు P. రాజారావు, P.V ప్రభాకర్ రావు, K B సుబ్రహ్మణ్యం, N. అమూల్య లకు ఇప్పటికే బ్యాంకు అధికారులు ఈ మేరకు నోటీసులు జారీ చేశారు. వేలం వేయనున్న ఆస్తుల్లో మాజీ మంత్రి గంటా శ్రీనివాసరావుకు చెందిన త్రివేణి టవర్స్ లో ఫ్లాట్ కూడా ఉంది. వాటితో పాటు ఇతర ఆస్తులను వేలం వేసి బకాయిపడ్డ మొత్తానికి రాబట్టుకునేందుకు బ్యాంకు వేలం వేస్తోంది.
